អ្នកនាំពាក្យក្រសួងកសិកម្ម៖ ភាគីពាក់ព័ន្ធត្រៀមជួបគ្នាដើម្បីចរចាជាមួយវៀតណាមឲ្យមកទិញស្រូវ
តាមគម្រោងក្រសួងកសិកម្ម ត្រៀមបើកកិច្ចប្រជុំជាមួយភាគីពាក់ព័ន្ធ ដើម្បីស្វែងរកដំណោះស្រាយលើតម្លៃស្រូវដែលកំពុងធ្លាក់ថ្លៃនៅក្រោមតម្លៃ៧០០រៀលក្នុងមួយគីឡូក្រាម។ ជំនួបនៅថ្ងៃទី៣០មករា ផ្ដោតទៅលើការចរចាជាមួយវៀតណាមឲ្យមកទិញស្រូវពីកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
អ្នកនាំពាក្យក្រសួងកសិកម្មលោក ស្រី វុទ្ធី បានអះអាងនៅថ្ងៃនេះថា ប្រឈមនឹងតម្លៃស្រូវ ដែលកំពុងធ្លាក់ថ្លៃ វិធានការមួយក្នុងចំណោមវិធានការជាច្រើនទៀតរបស់ក្រសួងកសិកម្មគឺចរចាជាមួយឈ្មួញវៀតណាមឲ្យមកទិញស្រូវពីកម្ពុជា នៅខេត្តខ្មែរជាប់ព្រំដែនវៀតណាមទាំងអស់ដូចជា ខេត្តតាកែវ កណ្ដាល ព្រៃវែង និងខេត្តកំពង់ចាមជាដើម។
ឆ្លើយទៅនឹងសំណួរដែលថា កសិករខ្មែរអាចប្រឈមនឹងការធ្លាក់តម្លៃស្រូវ កាន់តែចុះថោកទេ នៅពេលកម្ពុជាហៅវៀតណាមកទិញស្រូវពីកម្ពុជាក្នុងកាលៈទេសៈបច្ចុប្បន្ន ដែលកំពុងតែប្រឈមនឹងការចុះថោកស្រាប់បែបនេះ? អ្នកនាំពាក្យក្រសួងកសិកម្មឲ្យដឹងថា ព្រោះតែបារម្ភទើបកម្ពុជាចរចាជាមួយវៀតណាម ដើម្បីឲ្យឈ្មួញវៀតណាមមកទិញស្រូវពីកម្ពុជា។ ម្យ៉ាងទៀត ក្រៅពីថៃ កម្ពុជានិងវៀតណាម ក៏ជាដៃគូរស្រាប់ក្នុងការទិញលក់ស្រូវនេះផង។
កន្លងមកតំណាងកសិករ ក៏ធ្លាប់ទទូចឲ្យរដ្ឋាភិបាលចរចាជាមួយចិនពន្លឿនការទិញអង្ករ ដើម្បីសង្គ្រោះការធ្លាក់ថ្លៃស្រូវ បន្ទាប់ពីចិនសន្យាទិញអង្ករកម្ពុជា៤០ម៉ឺនតោន។ ក្រៅពីទីផ្សារចិនអ្នកជំនាញផ្នែកកសិកម្មផ្ដល់យោបល់ដល់រដ្ឋាភិបាលថា គួរតែចេញថវិកាផ្ទាល់ខ្លួនទិញស្រូវស្តុកទុក។
ប៉ុន្តែយ៉ាងណាមិញ គិតមកដល់ថ្ងៃទី២៨មករានេះ តម្លៃស្រូវក្នុងខេត្តមួយចំនួនរក្សាបានតម្លៃ៧០០រៀលក្នុងមួយគីឡូក្រាម ខណៈខេត្តតាកែវនិងបន្ទាយមានជ័យតម្លៃស្រូវធ្លាក់មកនៅក្រោមតម្លៃ៧០០រយរៀល។ ការធ្លាក់ចុះតម្លៃស្រូវនៅពេលនេះត្រូវបានតំណាងកសិករអះអាងថា ដោយសារតែឈ្មួញកណ្ដាលយកលេសថា អឺរ៉ុបផ្ដើមយកពន្ធលើអង្ករកម្ពុជា។
លោក ថេង សាវឿន ប្រធានសម្ព័ន្ធសហគមន៍កសិករកម្ពុជា បានអះអាងជាថ្មីនៅថ្ងៃនេះថា តម្លៃស្រូវក្នុងខេត្តបន្ទាយមានជ័យធ្លាក់មកនៅតម្លៃ៦៥០រៀល ខណៈតម្លៃស្រូវនៅក្នុងខេត្តមួយចំនួនដូចជា កំពង់ធំ ព្រៃវែង កំពត ជាដើមរក្សាបានតម្លៃ៧០០រៀលក្នុងមួយគីឡូក្រាម។
ដោយឡែក លោក សួន បវរ អភិបាលខេត្តបន្ទាយមានជ័យបានអះអាងថា តម្លៃស្រូវក្រអូប ដែលជាប្រភេទស្រូវនាំចេញសម្រាប់ឆ្នាំនេះ ១តោនមានតម្លៃ១លាន២សែនរៀល ពោលគឺមិនបានធ្លាក់ថ្លៃឡើយ។ ចំណែកឯតម្លៃស្រូវ ដែលធ្លាក់ថ្លៃនោះគឺមកពីគុណភាពស្រូវមិនល្អដោយសារការលិចទឹកទើបឈ្មួញបញ្ចុះតម្លៃ។ នេះបើតាមអភិបាលខេត្តបន្ទាយមានជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ