ឥណ្ឌា៖ដំណើរការជំរឿនក្នុងរដ្ឋអាសាមបានបិទបញ្ចប់ដោយមានមនុស្សជិត ២លាននាក់អាចបាត់បង់សញ្ជាតិឥណ្ឌា
នៅក្នុងប្រទេសឥណ្ឌា ដំណើរការជំរឿនប្រកបដោយភាពចម្រូចសម្រាសខ្លាំងទើបបានបិទបញ្ចប់នៅក្នុងរដ្ឋអាសាមស្ថិតភាគឦសានប្រទេស។ កម្មវត្ថុនៃការធ្វើជំរឿននេះ គឺស្វែងរកអត្តសញ្ញាណជនអន្តោប្រវេសន៍ខុសច្បាប់មកពីប្រទេសបង់ក្លាដែស និងដែលបន្ទាប់មក ពួកគេបានទទួលសញ្ជាតិឥណ្ឌា។ ស្ថាប័នទទួលបន្ទុកធ្វើជំរឿនបានផ្សព្វផ្សាយសេចក្តីប្រកាសព័ត៌មានផ្លូវការមួយនាថ្ងៃសៅរ៍ ទី៣១ សីហាដោយបញ្ជាក់ថា មានមនុស្សជិត ២លាននាក់អាចប្រឈមនឹងការបាត់បង់សញ្ជាតិឥណ្ឌា ហើយពួកគេមានសិទ្ធិតវ៉ានៅតុលាការដើម្បីអាចរក្សាសញ្ជាតិឥណ្ឌារបស់ពួកគេបាន។ គួររម្លឹកថា អាសាមជារដ្ឋមួយដែលបញ្ហាសាសនា និងជាតិពិន្ធុស្ថិតជាបញ្ហាដ៏រសើបខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីប្រកាសព័ត៌មានផ្លូវការផ្សព្វផ្សាយក្នុងថ្ងៃសៅរ៍ ទី៣១ សីហាបានឲ្យដឹងថា មានមនុស្សចំនួន ៣១ ១០០ ០០០នាក់ត្រូវបានចុះក្នុងបញ្ជីជាតិពលរដ្ឋ និងមាន ១ ៩០០ ០០០នាក់ផ្សេងទៀតដែលភាគច្រើនជាអ្នកកាន់សាសនាអ៊ីស្លាមមិនមាននៅក្នុងបញ្ជីជាតិនោះទេ។ គឺមនុស្សទាំង ១ ៩០០ ០០០នាក់នេះហើយដែលកំពុងប្រឈមនឹងការបាត់បង់សញ្ជាតិឥណ្ឌា ព្រោះពួកគេមិនអាចបង្ហាញភស្តុតាងដែលបញ្ជាក់ថា គ្រួសាររបស់ពួកគេជាជនជាតិឥណ្ឌានៅមុនខែមេសា ឆ្នាំ ១៩៧១។ ជម្រើសយកឆ្នាំ ១៩៧១ ជាលក្ខខណ្ឌសម្រាប់រដ្ឋអំណាចក្នុងរដ្ឋអាសាមមិនមែនជាជម្រើសចៃដន្យទេ ព្រោះជាឆ្នាំដែលមានជនភៀសខ្លួនមកពីប្រទេសបង់ក្លាដែសក្បែរខាងរត់ទៅរស់នៅក្នុងរដ្ឋអាសាម។
រដ្ឋអំណាចក្នុងរដ្ឋអាសាមបានបញ្ជាក់ថា មានជនជាតិបង់ក្លាដែសប្រមាណជា ២ ០០០ ០០០នាក់បានទទួលសញ្ជាតិឥណ្ឌាដោយខុសច្បាប់។ នេះហើយជាហេតុផលដែលបានជំរុញ និងលើកទឹកចិត្តរដ្ឋអំណាចឲ្យធ្វើជំរឿនដើម្បីចង់ដឹងថា តើពលរដ្ឋរូបណាជាជនជាតិឥណ្ឌាដែលមានគ្រួសារជាជនជាតិឥណ្ឌាពិតប្រាកដ។ ទោះជាយ៉ាងនេះក្តី កុំថាឡើយជនជាតិឥណ្ឌាមានដើមកំណើតបង់ក្លាដែស ឬដើមកំណើតផ្សេង សូម្បីតែជនជាតិឥណ្ឌាពីកំណើតក៏ពិបាករកភស្តុតាងទៅបង្ហាញសញ្ជាតិរបស់ខ្លួនដែរនៅជិត ៥០ឆ្នាំក្រោយមក។ គ្រួសារអ្នកកាន់សាសនាអ៊ីស្លាមជាជនរងគ្រោះមុនគេនៅក្នុងយុទ្ធនាការជំរឿនពេលនេះ ហើយអ្នកត្រេកត្រអាល គឺក្រុមអ្នកជាតិនិយមហិណ្ឌូដែលកំពុងកាន់អំណាច។
រដ្ឋមន្រ្តីក្រសួងមហាផ្ទៃដែលជាអ្នកជាតិនិយមហិណ្ឌូម្នាក់បានចាត់ទុកក្រុមជនអន្តោប្រវេសន៍បង់ក្លាដែសជាសត្វកណ្តៀរ។ យ៉ាងណាក៏ដោយ មនុស្សទាំង ១ ៩០០ ០០០នាក់ដែលមិនស្ថិតក្នុងបញ្ជីជាតិពលរដ្ឋមានពេល ៤ខែដើម្បីប្តឹងទៅតុលាការ។ បើបណ្តឹងរបស់ពួកគេត្រូវបានបដិសេធ ពួកគេនឹងត្រូវបញ្ជូនទៅកាត់ទោសនៅតុលាការសម្រាប់ជនបរទេស។ បើតុលាការមួយនេះបញ្ជាក់ពីការគ្មានឈ្មោះក្នុងបញ្ជីជាតិពលរដ្ឋមែន ពួកគេនឹងត្រូវបាត់បង់សញ្ជាតិឥណ្ឌា។ ពេលនោះ ពួកគេនឹងក្លាយជាមនុស្សគ្មានទឹកដី ព្រោះភាគច្រើនបានអះអាងថាពួកគេគ្មានសញ្ជាតិបង់ក្លាដែសទេ។ នៅចុងបញ្ចប់ ពួកគេអាចនឹងបញ្ចប់ជីវិតចុងក្រោយនៅក្នុងពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ