ភូមា៖តើជម្រើសតុលារការអន្តរជាតិមួយណា និងមានអ្នកពាក់ព័ន្ធណាខ្លះដែលអាចទទួលទោសក្នុងបទប្រល័យពូជសាសន៍លើពួករ៉ូហ៊ីងយ៉ា?
ចុះផ្សាយនៅថ្ងៃ៖
ស្តាប់ - ០៥:១៦
នៅថ្ងៃចន្ទ ទី២៧ សីហា ក្រុមអ្នកស៊ើបអង្កេតរបស់អង្គការសហប្រជាជាតិបានផ្សព្វផ្សាយលទ្ធផលនៃការស៊ើបអង្កេតស្តីពីស្ថានភាពរបស់ពួករ៉ូហ៊ីងយ៉ានៅក្នុងប្រទេសភូមា។ របាយការណ៍បានចោទត្រង់ៗលើមន្រ្តីយោធាជាន់ខ្ពស់ភូមានចំនួន ៦រូប ក្នុងនោះមានមេទ័ពឧត្តមសេនីយមីន អ៊ុងឡាងពីបទប្រល័យពូជសាសន៍លើជនជាតិភាគតិចរ៉ូហ៊ីងយ៉ាង អ្នកកាន់សាសនាអ៊ីស្លាម។ ក្រៅពីចង្អុលមុខកងទ័ពភូមា របាយការណ៍ក៏បានទម្លាក់កំហុសដាក់រដ្ឋាភិបាលភូមាពីបទបានចូលរួមឃុបឃិតដែរ។ អ្វីដែលក្រុមអ្នកស៊ើបអង្កេតរបស់អង្គការសហប្រជាជាតិបានទាមទារពេលនេះ គឺការលាចុះពីតំណែងរបស់ឧត្តមសេនីយមីន អ៊ុងឡាង និងការអូស ក ជនដៃទៅកាត់ទោសនៅតុលាការអន្តរជាតិពីបទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្រ្គាមលើពលរដ្ឋរ៉ូហ៊ីងយ៉ា។ តើជម្រើសតុលាការអន្តរជាតិមួយណា និងមានអ្នកពាក់ព័ន្ធណាខ្លះដែលអាចទទួលទោសក្នុងឧក្រិដ្ឋកម្មទាំងនេះ?
អ្វីៗហាក់លែងស្រពិចស្រពិលទៀតឡើយសម្រាប់ក្រុមអ្នកស៊ើបអង្កេតរបស់អង្គការសហប្រជាជាតិស្តីពីស្ថានការពលរដ្ឋរ៉ូហ៊ីងយ៉ាងនៅក្នុងប្រទេសភូមា។ ជនស៊ីវិលត្រូវបានសម្លាប់ចោល ស្រ្តីត្រូវបានចាប់រំលោភ ផ្ទះសម្បែងត្រូវបានដុតបំផ្លាញ ការបាត់ខ្លួនដោយបង្ខំ ការធ្វើទារុណកម្ម និងទាសភាព ទាំងនេះសុទ្ធសឹងជាអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្រ្គាមដែលច្បាប់អន្តរជាតិបានហាមឃាត់ និងដែលត្រូវបានទ័ពភូមាយកទៅប្រើដើម្បីបំបាត់ពូជរ៉ូហ៊ីងយ៉ានៅក្នុងរដ្ឋរ៉ាក់ឃីន។ សូមជម្រាបជូនថា តាំងពីពេលដែលពួករ៉ូហ៊ីងយ៉ាជាង ៧០០ ០០០នាក់បានភៀសខ្លួនគេចពីការធ្វើទុក្ខបុកម្នេញរបស់ទាហានភូមាទៅជ្រកកោណក្នុងទឹកដីប្រទេសបង់ក្លាដែសក្បែរខាងក្នុងខែសីហា ឆ្នាំ ២០១៧ មក នេះជាលើកទី១ ដែលអង្គការសហប្រជាជាតិបានប្រើពាក្យ « ប្រល័យពូជសាសន៍ » លើពួករ៉ូហ៊ីងយ៉ា។
របាយការណ៍របស់អង្គការសហប្រជាជាតិបានបញ្ជាក់ច្បាស់ៗថា ផែនការបោសសំអាតពួករ៉ូហ៊ីងយ៉ាពីសំណាក់ទ័ពភូមាជាផែនការដែលបានរៀបចំទុកជាមុន និងមានការបញ្ជាពីមន្រ្តីយោធាជាន់ខ្ពស់ រួមទាំងការចូលរួមឃុបឃិតពីរដ្ឋាភិបាលស៊ីវិលភូមាទៀតផង។ នៅត្រង់ចំណុចនេះ អង្គការសហប្រជាជាតិចង់និយាយសំដៅលើលោកស្រីអ៊ុង សានស៊ូជី រដ្ឋមន្រ្តីការបរទេសដែលមិនបានធ្វើអ្វីទាល់តែសោះដើម្បីរារាំងការធ្វើទុក្ខបុកម្នេញលើពួករ៉ូហ៊ីងយ៉ា។ អ្វីដែលក្រុមអ្នកស៊ើបអង្កេតរបស់អង្គការសហប្រជាជាតិទាមទារចង់បានពេលនេះ គឺការលាចុះពីតំណែងភ្លាមរបស់ឧត្តមសេនីយមីន អ៊ុងឡាង និងការអូស ក រូបលោក ព្រមទាំងមន្រ្តីជាន់ខ្ពស់ ៥រូបទៀតទៅកាត់ទោសនៅតុលាការអន្តរជាតិក្នុងបទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្រ្គាម។
សំណួរ តើត្រូវជ្រើសរើសយកតុលារការអន្តរជាតិមួយណា?។ អាចមានចម្លើយ ៣ ចំពោះសំណួរនេះ ទី១ គឺតុលាការព្រហ្មទណ្ឌអន្តរជាតិ។ ក៏ប៉ុន្តែ និងដើម្បីអាចឲ្យតុលាការមួយនេះផ្តើមចាត់វិធានការលើរឿងនេះបាន លុះត្រាណាតែមានការស្នើសុំពីក្រុមប្រឹក្សាសន្តិសុខតាមរយៈសេចក្តីសម្រេចចិត្តមួយជាមុនសិន។ តែបញ្ហានៅត្រង់ថា ចិនដែលជាមិត្តរបស់ភូមា និងតែងចាត់ទុកវិបត្តិរ៉ូហ៊ីងយ៉ាជាបញ្ហាផ្ទៃក្នុងរបស់ភូមា ពិតជាប្រើសិទ្ធិវេតូមិនគាំទ្រឡើយ។ ទន្ទឹមគ្នានេះ ប្រទេសរុស្ស៊ីដែលមានសិទ្ធិវេតូដូចចិន និងដែលឧត្តមសេនីយមីន អ៊ុងឡាងទើបបានបំពេញទស្សនកិច្ចក៏អាចនឹងប្រើសិទ្ធិវេតូប្រឆាំងដែរ។
ប្រសិនការព្យាយាមនៅក្នុងជម្រើសទី១ តាមរយៈតុលាការព្រហ្មទណ្ឌអន្តរជាតិនេះមិនអាចទៅរួច នៅសល់ជម្រើស ទី២ នោះគឺការបង្កើតតុលាការអន្តរជាតិពិសេសមួយដូចករណីប្រទេសរវ៉ាន់ដា ឬករណីអតីតប្រទេសយូកូស្លាវី។ ប្រសិនបើជម្រើសទី២ នេះនៅតែមិនអាចចេញរួចទៀត នៅមានជម្រើសទី៣ ដែលជាជម្រើសចុងក្រោយ។ ជម្រើសទី៣ នេះ គឺលោកស្រីអគ្គរដ្ឋអាជ្ញាតុលាការព្រហ្មទណ្ឌអន្តរជាតិហ្វាទូ បេនស៊ូដាអាចស្នើដល់ក្រុមចៅក្រមឲ្យពង្រីកយុត្តាធិការរបស់ខ្លួនទៅលើប្រទេសដែលមិនមែនជាសមាជិករបស់តុលាការព្រហ្មទណ្ឌអន្តរជាតិ ដូចករណីភូមា។ យន្តការមួយនេះអាចធ្វើបានក៏ដោយសារតែវិបត្តិរ៉ូហ៊ីងយ៉ាមិនមែនកើតមាននៅត្រឹមផ្ទៃក្នុងភូមាប៉ុណ្ណោះទេ តែបានឆ្លងរាលដាលដល់ប្រទេសបង់ក្លាដែសដែលជាសមាជិករបស់របស់តុលាការព្រហ្មទណ្ឌអន្តរជាតិ។
ប្រសិនបើក្រុមចៅក្រមផ្តល់ភ្លើងខៀវតាមសំណើសុំរបស់លោកស្រីហ្វាទូ បេនស៊ូដា នោះអគ្គរដ្ឋអាជ្ញាតុលាការព្រហ្មទណ្ឌអន្តរជាតិរូបនេះអាចនឹងផ្តើមបើកការស៊ើបអង្កេតបឋមរបស់ខ្លួន។ នីតិវិធីមួយនេះអាចនឹងឈានដល់ការចេញដីការឃាត់ខ្លួនអ្នកទទួលខុសត្រូវភូមាដែលអង្គការសហប្រជាជាតិបានដៅលើមន្រ្តីយោធាជាន់ខ្ពស់ចំនួន ៦រូប មានទាំងមេបញ្ជាការឧត្តមសេនីយមីន អ៊ុងឡាងម្នាក់ផង។ តែគេមិនត្រូវភ្លេចនិយាយទេថា អំណាចរបស់តុលាការព្រហ្មទណ្ឌអន្តរជាតិមានកម្រិតដែលមិនអាចបង្ខំប្រទេសភូមាឲ្យចាប់ជនជាប់ចោទបញ្ជូនទៅឲ្យខ្លួនបានឡើយ។ ម្យ៉ាងទៀត បើជនជាប់ចោទរត់ភៀសខ្លួនទៅជ្រកកោនប្រទេសផ្សេង ក៏តុលាការព្រហ្មទណ្ឌអន្តរជាតិមិនអាចបង្ខំប្រទេសនោះឲ្យចាប់បញ្ជូនជនជាប់ចោទទាំងនោះទៅឲ្យខ្លួនបានដែរ។
ពាក់ព័ន្ធនឹងលោកស្រីអ៊ុង សានស៊ូជីដោយមានសំណួរចោទឡើងថា តើលោកស្រីអាចនឹងមានចំណែកទទួលខុសត្រូវក្នុងផែនការបោសសំអាតពួករ៉ូហ៊ីងយ៉ាឬអត់?។ ពិតជាមាន នេះបើតាមក្រុមអ្នកស៊ើបអង្កេតរបស់អង្គការសហប្រជាជាតិ។ តែលោកស្រីអាចមិនត្រូវជាប់ការស៊ើបអង្កេត ព្រោះនៅភូមា ក្រសួងការពារជាតិ និងក្រសួងមហាផ្ទៃស្ថិតក្រោមការគ្រប់គ្រងរបស់កងទ័ពដែលលោកស្រីអ៊ុង សានស៊ូជីមិនអាចលូកដៃបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ