UN៖នាវាដឹកទំនិញកូរ៉េខាងជើង៤ ត្រូវហាមឃាត់មិនឲ្យចូលចត នៅតាមកំពង់ផែទូទាំងពិភពលោក
ដើម្បីអនុវត្ត ការដាក់ទណ្ឌកម្មសេដ្ឋកិច្ច ទៅលើកូរ៉េខាងជើងឲ្យមានប្រសិទ្ធិភាព អង្គការសហប្រជាជាតិ បានសម្រេចហាមឃាត់នាវាដឹកទំនិញចំនួន៤ មិនឲ្យចូលចត នៅតាមកំពង់ផែណាទាំងអស់ នៅទូទាំងពិភពលោក។ នាវាទាំង៤ នេះ ត្រូវបានគេជឿថា បានដឹកទំនិញ របស់កូរ៉េខាងជើង យកទៅក្រៅប្រទេស បំពាននឹងវិធានការទណ្ឌកម្ម របស់អង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:១២
នេះគឺជាលើកទីមួយហើយ ដែលអង្គការសហប្រជាជាតិ ហាមឃាត់នាវាដឹកទំនិញ មិនឲ្យចូលចត នៅតាមកំពង់ផែ។ លោក Hugh Griffiths អ្នកទទួលបន្ទុកសំណុំរឿងកូរ៉េខាងជើង នៅអង្គការសហប្រជាជាតិ បានកោះប្រជុំតំណាងប្រទេសសមាជិក អង្គការសហប្រជាជាតិ នៅថ្ងៃទី ៩ តុលា ដើម្បីប្រាប់ដំណឹង ស្តីពីការហាមឃាត់ នាវាដឹកទំនិញ ចំនួន៤ មិនឲ្យចូលចតតាមកំពង់ផែ នានា។ មន្ត្រីទូតរបស់កូរ៉េខាងជើង ក៏មានវត្តមានក្នុងពេល ប្រកាសដំណឹងនេះដែរ តែមិនបានប្រតិកម្មអ្វីទាំងអស់។ សេចក្តីសម្រេចនេះ ត្រូវបានគណកម្មការ ទទួលបន្ទុកសំណុំរឿងទណ្ឌកម្ម លើកូរ៉េខាងជើង សម្រេច កាលពីថ្ងៃទី ៥ តុលា។
លោក Hugh Griffiths បានអះអាងថា ឆ្លងកាត់ការតាមដានស៊ើបអង្កេត នាវាទាំង៤ គឺជានាវាដឹកទំនិញចេញចូលកូរ៉េខាងជើង ដូចជា ដឹកធ្យូងថ្ម ដែក ប្រេងឥន្ធនៈ និងត្រី ជាដើម។ ទំនិញទាំងអស់នេះ សុទ្ធតែត្រូវបានកំណត់ហាមឃាត់ ឬកាត់បន្ថយការនាំចូល ដែលមានចែងនៅក្នុងសេចក្តីសម្រេចទណ្ឌកម្ម របស់ក្រុមប្រឹក្សាសន្តិសុខ កាលពីថ្ងៃទី ១១ កញ្ញា។ តែយ៉ាងណា មន្ត្រីរូបនេះ បានបដិសេធ មិនផ្តល់ព័ត៌មានលំអិត ថានាវាទាំង៤នោះ មាននាវាអ្វី របស់ក្រុមហ៊ុនណា ខ្លះទេ។
ប៉ុន្តែបើតាមប្រភព ពីអ្នកដែលស្និទនឹងសំណុំរឿងនេះ បានឲ្យដឹងថា នាវាដឹកទំនិញទាំងបួន គឺទីមួយ មានឈ្មោះ PETREL 8 ពាក់ទង់ជាតិកោះកូម៉រ ទីពីរឈ្មោះ HAO FAN 6 ពាក់ទង់ជាតិកោះ Saint Kitts ទីបី ឈ្មោះ TONG SAN 2 ពាក់ទង់ជាតិកូរ៉េខាងជើង និងទីបួន ឈ្មោះ JIE SHUN មិនទាន់ស្គាល់ប្រភពច្បាស់។ តែបើតាមការតាមដានកន្លងមក នាវា JIE SHUN នេះត្រូវគេចាប់បានច្រើនដង ហើយមានពាក់ទង់ជាតិកម្ពុជា។
មន្ត្រីអង្គការសហប្រជាជាតិ បានលើកឡើងថា ការហាមឃាត់នេះ មិនមែនធ្វើឡើង ដើម្បីចង់ធ្វើបាបកូរ៉េខាងជើងទេ។ តែទណ្ឌកម្មទាំងអស់ គឺធ្វើឡើង ក្នុងកម្មវត្ថុ ឲ្យកូរ៉េខាងជើង ភ្ញាក់រលឹក ហើយត្រលប់មកចូលតុចរចា ស្តីពីកម្មវិធីអភិវឌ្ឍន៍នុយក្លេអ៊ែរ របស់ខ្លួន។ កូរ៉េខាងជើង ត្រូវដឹងថា នុយក្លេអ៊ែររបស់ខ្លួន កំពុងគំរាម និងបំភ័យ ដល់ស្ថិរភាពរបស់តំបន់អាស៊ីប៉ាស៊ីហ្វិកទាំងមូល។
លោក Hugh Griffiths បានបញ្ជាក់ថា រហូតមកដល់ពេលនេះ របបកូរ៉េខាងជើង នៅតែអាចរកស៊ី ដោយលាក់លៀម និងគេចឃ្វៀង ពីទណ្ឌកម្មអន្តរជាតិបានដដែល ដោយសារតែមានប្រទេសមួយចំនួន នៅតែបើកចំហរផ្លូវ។ ដើម្បីឲ្យទណ្ឌកម្មមានប្រសិទ្ធិភាព គឺត្រូវការការចូលរួម ឲ្យបានសកម្ម ពីប្រទេសទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ