AIE៖អាមេរិកនឹងក្លាយជាប្រទេសនាំប្រេងឆៅចេញច្រើនជាងគេក្នុងលោកចាប់ពីឆ្នាំ ២០២១
នៅថ្ងៃចន្ទ ទី១២ មីនា ទីភ្នាក់ងារថាមពលអន្តរជាតិហៅកាត់ AIE បានចេញផ្សាយរបាយការណ៍ប្រចាំឆ្នាំស្តីពីស្ថានភាពប្រេងឆៅក្នុងលោក។ របាយការណ៍បានប្រមើលមើលថា សហរដ្ឋអាមេរិក ប្រេស៊ីល និងប្រទេសន័រវែសដែលមិនមែនជាសមាជិកក្នុងអង្គការនៃក្រុមប្រទេសនាំប្រេងឆៅចេញហៅកាត់ Opep នឹងបន្តបង្កើនការបូមប្រេងឆៅរបស់ខ្លួននៅ ៥ឆ្នាំខាងមុខ។ តាមរបាយការណ៍របស់ AIE ដដែល សហរដ្ឋអាមេរិកដែលធ្លាប់ជាប្រទេសនាំប្រេងឆៅចូលនឹងបន្តបង្កើនការបូមប្រេងឆៅរបស់ខ្លួនរហូតក្លាយជាប្រទេសនាំប្រេងឆៅចេញច្រើនជាងគេក្នុងលោកចាប់ពីឆ្នាំ ២០២១ ទៅ។
ចុះផ្សាយនៅថ្ងៃ៖
ស្តាប់ - ០២:១៦
គឺជារបាយការណ៍មួយដែលទីភ្នាក់ងារថាមពលអន្តរជាតិហៅកាត់ AIE បានប្រមើលមើលពីតម្រូវការ និងការផ្គត់ផ្គង់ប្រេងឆៅក្នុងលោកចន្លោះឆ្នាំ ២០១៩ និងឆ្នាំ ២០២៤។ តែអ្វីដែល AIE បានចាប់អារម្មណ៍ខ្លាំង គឺកំណើននៃការបូមប្រេងឆៅពីក្រុមប្រទេសដែលមិនមែនជាសមាជិកក្នុងអង្គការនៃក្រុមប្រទេសនាំប្រេងឆៅចេញហៅកាត់ Opep ដូចយ៉ាងសហរដ្ឋអាមេរិក ប្រេស៊ីល និងប្រទេសន័រវែស។ AIE បានឲ្យដឹងថាចាប់ពីពេលនេះទៅឆ្នាំ ២០២៤ សហរដ្ឋអាមេរិកនឹងបង្កើនការបូមប្រេងឆៅបន្ថែមចំនួន ៤លានបារីលក្នុងមួយថ្ងៃរហូតធ្វើឲ្យខ្លួនក្លាយជាប្រទេសនាំប្រេងឆៅចេញច្រើនជាងគេក្នុងលោកចាប់ពីឆ្នាំ ២០២១ ទៅ។
បន្ទាប់ពីសហរដ្ឋអាមេរិក ប្រទេសប្រេស៊ីល និងប្រទេសន័រវែសក៏នឹងត្រូវបង្កើនការបូមប្រេងឆៅរបស់ខ្លួនដូចគ្នាក្នុងរយៈពេល ៥ឆ្នាំខាងមុខ។ គួររម្លឹកថាសព្វថ្ងៃ តម្រូវការប្រេងឆៅក្នុងលោកហាក់បានពឹងខ្លាំងលើក្រុមប្រទេសសមាជិកអង្គការ Opep ហើយអារ៉ាប៊ីសាអូឌីតជាប្រទេសដែលបាននាំប្រេងឆៅចេញច្រើនជាងគេក្នុងលោក។ តែចាប់ពីឆ្នាំ ២០២១ ទៅ សហរដ្ឋអាមេរិកនឹងដណ្តើមកន្លែងអារ៉ាប៊ីសាអូឌីត ហើយក្រុមប្រទេសដែលទិញប្រេងឆៅពីគេនឹងអាចទិញពីប្រទេសផ្សេងក្រៅពីក្រុមប្រទេសនៃអង្គការ Opep។ តាមរបាយការណ៍របស់ AIE ដដែល ផលិតកម្មប្រេងឆៅរបស់ក្រុមប្រទេសមិនស្ថិតក្នុងអង្គការ Opep នឹងកើនពី ៦ ១០០ ០០០បារីលក្នុងមួយថ្ងៃដល់ទៅ ៦៨ ៧០០ ០០០បារីលក្នុងមួយថ្ងៃនៅឆ្នាំ ២០២៤។
តែទន្ទឹមនឹងកំណើនផលិតកម្មរបស់ក្រុមប្រទេសមិនមែនសមាជិកអង្គការ Opep AIE បានប្រមើលមើលពីការធ្លាក់ចុះនៃផលិតកម្មប្រេងឆៅពីក្រុមប្រទេសជាសមាជិកអង្គការ Opep។ ទោះជាយ៉ាងនេះក្តី AIE បានចាត់ទុកការវិវត្តន៍ក្នុងវិស័យមួយនេះថាជាការពង្រឹងសន្តិសុខទីផ្សារប្រេងក្នុងលោក ពិសេសតម្លៃរបស់វា។ ទាក់ទងនឹងតម្រូវការវិញត្រូវបាន AIE ប្រមើលមើលថា មិនមានសន្ទុះកើនខ្លាំងគួរឲ្យចាប់អារម្មណ៍ទេ ពោលកើនប្រមាណជា ៧ ១០០ ០០០បារីលក្នុងមួយថ្ងៃសម្រាប់រយៈពេលពីឆ្នាំ ២០១៩ ដល់ឆ្នាំ ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ