ក្រុមអ្នកសង្កេតការណ៍៖ ពួកជីហាត សម្លាប់កងកម្លាំងគាំទ្ររដ្ឋាភិបាលស៊ីរី ២១នាក់
នៅថ្ងៃអាទិត្យ ទី៣ មីនានេះ ក្រុមជីហាតនៅស៊ីរី ដែលមានទំនាក់ទំនងជិតស្និទ្ធជាមួយនឹងពួកអាល់កៃដា បានសម្លាប់កងកម្លាំងរបស់រដ្ឋាភិបាលស៊ីរីចំនួន ២១ នាក់ នៅជិតខេត្តអ៊ីឡិប។ ការវាយប្រហារថ្មី ពីសំណាក់ក្រុមជីហាតជ្រុលនិយមនេះ គឺជាការបង្ហូរឈាមដ៏ឃោរឃៅខ្លាំងបំផុតមួយ និងជាអំពើរំលោភបំពានលើ កិច្ចព្រមព្រៀងឈប់បាញ់ ដែលមានរយៈពេល ៦ខែ។ នេះបើតាមក្រុមអ្នកអង្កេតការណ៍អន្តរជាតិ។
ចុះផ្សាយនៅថ្ងៃ៖
ក្រុមអ្នកឃ្លាំមើលសិទ្ធិមនុស្សនៅក្នុងប្រទេសស៊ីរី បានឲ្យដឹងថានៅព្រឹកព្រលឹមថ្ងៃអាទិត្យទី៣ មីនា កងទ័ពរបស់រដ្ឋាភិបាលស៊ីរីចំនួន ២១ បានស្លាប់ដោយសារការវាយប្រហារពីសំណាក់ពួកអង្គការរដ្ឋអ៊ីស្លាម-ជីហាត។ ក្រោយការវាយប្រយុទ្ធគ្នានេះ ទាហានរបស់ពួកជីហាតចំនួន ៥ នាក់ក៏បានស្លាប់ផងដែរ។
លោករ៉ាម៊ី អាប់ដែល រ៉ាម៉េន (Rami Abdel Rahman) នាយករបស់ក្រុមអ្នកសង្កេតការណ៍អង់គ្លេសបាននិយាយថាតួលេខមនុស្សស្លាប់នាថ្ងៃអាទិត្យនេះ គឺជាចំនួនដ៏ច្រើនបំផុតមួយ ក្នុងចំណោមគ្រោះថ្នាក់ផ្សេងៗទៀតដែលបានកើតឡើងរាប់ចាប់តាំងពីកិច្ចព្រមព្រៀងឈប់បាញ់ដាក់ឲ្យអនុវត្តន៍ដោយប្រទេសរុស្ស៊ី និងតួកគីរួចមក។
គួររំឭកជូនថា ក្រោមកិច្ចព្រមព្រៀងឈប់បាញ់នៅថ្ងៃទី១៧ កញ្ញា ឆ្នាំ២០១៨ កន្លងទៅ ប្រទេសតួកគីត្រូវប្រើឥទ្ធិពលរបស់ខ្លួនបញ្ចុះបញ្ចូលឲ្យពួកសកម្មប្រយុទ្ធដែលមាននិន្នាការប្រឆាំងនឹងរដ្ឋាភិបាលស៊ីរី បញ្ចប់នូវរាល់ការវាយប្រហារផ្សេងៗ និងដកអាវុធធុនធ្ងន់របស់ពួកគេវិញទាំងអស់ចេញពីតំបន់គ្មានកងទ័ព។
កិច្ចព្រមព្រៀងនេះ បង្កើតឡើងក្នុងគោលបំណងបញ្ឈប់រាល់សកម្មភាពវាយប្រហារនានា រវាងរដ្ឋាភិបាលស៊ីរីនិងប្រទេសរុស្ស៊ីដែលជាសម្ព័ន្ធមិត្ត ជាមួយនឹងបណ្តាក្រុមអ្នកប្រឆាំង ដើម្បីកុំឲ្យស្ថានការណ៍ក្នុងប្រទេសស៊ីរីធ្លាក់ដុនដាបខ្លាំងពេក។ តែទោះជាយ៉ាងណាក្តី កិច្ចព្រមព្រៀងនេះហាក់គ្មានប្រសិទ្ធិភាពអ្វីនោះឡើយ។
ជាក់ស្តែង ចាប់តាំងពីមានកិច្ចព្រមព្រៀងនេះមក ក្រុមជីហាតជ្រុលនិយម នៅតែពង្រឹងការគ្រប់គ្រងរបស់ខ្លួននៅក្នុងខេត្តអ៊ីឡិប ហើយប្រទេសតួកគីវិញ ហាក់ដូចជាមិនមានឆន្ទៈ អនុវត្តន៍ការប្តេជ្ញាចិត្តរបស់ខ្លួនដូចមានចែងនៅក្នុងកិច្ចព្រមព្រៀងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ