ចិនវិនិយោគយ៉ាងសន្ធឹកសន្ធាប់នៅអាហ្សង់ទីន
ចិនដែលជាអតិថិជនទិញប្រេង និងធនធានរ៉ែរបស់អាហ្សង់ទីន បានបង្ហាញចំណាប់អារម្មណ៍កាន់តែខ្លាំងទៅលើប្រទេសអាមេរិកឡាទីនមួយនេះ។ នៅក្នុងដំណើរទស្សនកិច្ចទៅប្រទេសអាហ្សង់ទីន លោកប្រធានាធិបតីចិន ស៊ី ជីនពីងបានប្រកាសកាលពីថ្ងៃសុក្រម្សិលមិញ ពីកិច្ចព្រមព្រៀងវិនិយោគយ៉ាងសម្បើមរបស់ចិន នៅក្នុងប្រទេសអាហ្សង់ទីន។ អាហ្សង់ទីនដែលកំពុងជួបវិបត្តិសេដ្ឋកិច្ចក្នុងស្រុក បានបើកដៃទទួលសមានចិត្តរបស់ទីក្រុងប៉េកាំងយ៉ាងពេញទំហឹង។
ចុះផ្សាយនៅថ្ងៃ៖
ស្តាប់ - ០២:០២
ប្រធានាធិបតីចិន លោកស៊ី ជីនពីងចាប់ផ្តើមថ្ងៃទីមួយ នៃទស្សនកិច្ចបីថ្ងៃរបស់លោកនៅអាហ្សង់ទីន ជាមួយនឹងការចុះហត្ថលេខាលើកិច្ចព្រមព្រៀងវិនិយោគរបស់ចិន នៅអាហ្សង់ទីន។ ជារួម នៅក្នុងគម្រោងជាង២០ដែលចុះហត្ថលេខារវាងចិន និងអាហ្សង់ទីន ចិនគ្រោងនឹងបោះទុនប្រមាណ ៧៥០០លានដុល្លារ ដើម្បី វិនិយោគទៅលើផ្នែកថាមពល ហេដ្ឋារចនាសម្ព័ន្ធរបស់អាហ្សង់ទីន។
យោងតាម ប្រធានខុទ្ធការល័យប្រធានាធិបតី អាហ្សង់ទីន ធនាគារចិននឹងផ្តល់ប្រាក់កម្ចីប្រមាណ ៤៧០០លានដុល្លារ សម្រាប់សាងសង់ទំនប់វារីអគ្គិសនីពីរ នៅអាហ្សង់ទីន។ លើសពីនោះ ចិននឹងជួយអាហ្សង់ទីនដើម្បីសាងសង់មជ្ឈមណ្ឌលនុយក្លេអ៊ែរទីបួន ដើម្បីអាចឲ្យអាហ្សង់ទីនផលិតថាមពលអគ្គិសនី។ ចិននឹងវិនិយោគផងដែរទឹកប្រាក់ប្រមាណពីពាន់លានដុល្លារ ដើម្បីអភិវឌ្ឍផ្លូវដែក ដែលអាហ្សង់ទីនប្រើសម្រាប់ដឹកជញ្ជូនទំនិញ ជាពិសេសចំណីអាហារ។ គួរបញ្ជាក់ថា អាហ្សង់ទីនជាទីផ្សារដ៏ធំ សម្រាប់ក្រុមហ៊ុនចំណីអាហាររបស់ចិន ហើយចិនជាអតិថិជនទិញប្រេង និងធនធានរ៉ែរបស់អាហ្សង់ទីន។ ចិនជាដៃគូពាណិជ្ជកម្មធំទីបីរបស់អាហ្សង់ទីន បន្ទាប់ពីក្រុមប្រទេសនៅអាមេរិកឡាទីន និងសហភាពអឺរ៉ុប។
អ្នកស្រាវជ្រាវម្នាក់ នៅសកលវិទ្យាល័យបូស្តុន ក្នុងប្រទេសអាមេរិកបានចាត់ទុកអាហ្សង់ទីនស្ថិតនៅក្នុងស្ថានភាពជាអ្នកសុំទាន។ បច្ចុប្បន្ននេះ អាហ្សង់ទីនកំពុងទ័លលុយ និងអាចប្រឈមនឹងវិបត្តិខ្វះថវិកាសម្រាប់បង់សងទៅអ្នកជំនួញ ដែលជាម្ចាស់បំណុល។ នៅចុងខែកក្កដា នេះគេនឹងអាចដឹងថា តើរដ្ឋាភិបាលអាហ្សង់ទីននឹងអាចមានប្រាក់ដើម្បីសងម្ចាស់បំណុលដែរឬទេ? គ្មានប្រាក់សង នោះរដ្ឋាភិបាលអាហ្សង់ទីននឹងអាចបាត់បង់ទំនុកចិត្តពីអ្នកវិនិយោគ ដែលនឹងអាចឈប់ឲ្យអាហ្សង់ទីនខ្ចីលុយតទៅទៀត។
ជំនួយសន្ធឹកសន្ធាប់របស់ចិននៅពេលនេះ គឺដូចជាអំណោយធ្លាក់ពីលើមេឃសម្រាប់រដ្ឋាភិបាលអាហ្សង់ទីនដែលកំពុងទ័លគំនិត និងកំពុងរងគំនាបពី តុលាការអាមេរិកាំង។ កាលពីដើមខែមិថុនា តុលាការកំពូលរបស់អាមេរិកបានដម្កល់សេចក្តីសម្រេចរបស់តុលាការក្រុងញូវយ៉កដែលតម្រូវឲ្យរដ្ឋាភិបាលអាហ្សង់ទីនសងលុយ ១៣០០លានដុល្លារ ទៅម្ចាស់បំណុល អាមេរិកាំង ឈ្មោះ NML Capital និង Aurelius Capital Management។ ដោយអាងទៅលើជំនួយចិន រដ្ឋាភិបាលអាហ្សង់ទីនពេលនេះ អាចបែរខ្នងមិនខ្វល់នឹងតុលាការរបស់មហាអំណាចអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ