លោកស៊ីជីនពីងទៅហុងកុងដើម្បីរំឭកខួប២០ឆ្នាំនៃការផ្ទេរហុងកុងពីអាណានិគមអង់គ្លេស
លោកប្រធានាធិបតីចិន ស៊ី ជីនពីង បានធ្វើដំណើរទៅដល់ហុងកុងនៅថ្ងៃព្រហស្បតិ៍នេះ ដើម្បីធ្វើការរំឭកខួប២០ឆ្នាំ នៃការផ្ទេរដែនដីហុងកុង ពីការគ្រប់គ្រងរបស់អង់គ្លេសត្រឡប់មកឲ្យចិនវិញ កាលពីថ្ងៃទី១ ខែកក្កដា ឆ្នាំ១៩៩៧។ ដំណើរទស្សនកិច្ចរបស់លោកស៊ី ជីនពីងត្រូវបានធ្វើឡើង ក្រោមការរឹតបន្តឹងសន្តិសុខយ៉ាងតឹងរ៉ឹង ហើយមេដឹកនាំចលនាទាមទារប្រជាធិបតេយ្យហុងកុង ដែលតែងតែនាំគ្នាធ្វើបាតុកម្មប្រឆាំងនឹងអាជ្ញាធរក្រុងប៉េកាំងនោះ ត្រូវបានអាជ្ញាធរចាប់ឃុំខ្លួន តាំងពីថ្ងៃពុធម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ដំណើរទស្សនកិច្ចរបស់លោកស៊ី ជីនពីង ទៅកាន់ដែនដីហុងកុងនៅពេលនេះត្រូវធ្វើឡើង នៅក្នុងកាលៈទេសៈដ៏ពិសេសមួយ។ ក្រៅពីជាដំណើរទស្សនកិច្ចលើកទីមួយចាប់តាំងពីលោកស៊ីជីនពីងឡើងកាន់តំណែងជាប្រធានាធិបតីកាលពីឆ្នាំ២០១៣ និងជាខួប២០ឆ្នាំនៃការផ្ទេរដែនដីហុងកុងពីអង់គ្លេស វាគឺជាដំណើរទស្សនកិច្ចដែលកើតឡើង នៅក្នុងពេលដែលបរិយាកាសនយោបាយនៅហុងកុងកំពុងស្ថិតក្នុងសភាពតានតឹងខ្លាំង។
គួរបញ្ជាក់ឡើងវិញថា ក្រោយពីត្រូវបានផ្ទេរពីអង់គ្លេសមកឲ្យចិន ដែនដីហុងកុងត្រូវបានដាក់ឲ្យស្ថិតក្នុងប្រព័ន្ធគ្រប់គ្រងមួយ ដែលគេឲ្យឈ្មោះថា “ប្រទេសមួយ ប្រព័ន្ធគ្រប់គ្រងពីរ” ពោលគឺ ហុងកុងជាដែនដីរបស់ចិន តែមានប្រព័ន្ធគ្រប់គ្រងដាច់ដោយឡែកពីក្រុងប៉េកាំង។
ក៏ប៉ុន្តែ ចាប់តាំងពីឆ្នាំ២០១៤មក សកម្មជនប្រជាធិបតេយ្យហុងកុង ជាពិសេស សកម្មជននិស្សិតបាននាំគ្នាងើបឡើងតវ៉ាប្រឆាំងនឹងរដ្ឋាភិបាលចិនដីគោក ដោយពួកគេចោទថាកំពុងពង្រីកឥទ្ធិពលមកលើនយោបាយរបស់ហុងកុង ហើយគំរាមកំហែងដល់សិទ្ធិសេរីភាពរបស់ប្រជាជនហុងកុង។
សកម្មជនប្រជាធិបតេយ្យនេះ ដែលមានសមាជិកខ្លះជាប់ឆ្នោតក្លាយជាសមាជិកសភាហុងកុងផងនោះ បានបន្តការតវ៉ាប្រឆាំងស្ទើរតែជាប់ជាប្រចាំ ហើយកាលពីប៉ុន្មានថ្ងៃមុននេះ ពួកគេក៏បាននាំគ្នាឆ្លៀតយកឱកាសខួប ២០ឆ្នាំ នៃការផ្ទេរដែនដីហុងកុងនេះ មកធ្វើការតវ៉ាប្រឆាំងនឹងរដ្ឋាភិបាលក្រុងប៉េកាំងផងដែរ។
ប្រឈមមុខនឹងចលនាប្រឆាំងបែបនេះហើយ បានជាដំណើរទស្សនកិច្ចរបស់លោកស៊ីជីនពីង នៅហុងកុងត្រូវបានធ្វើឡើង ដោយមានការរក្សាសន្តិសុខយ៉ាងតឹងរ៉ឹងបំផុត ដោយផ្នែកខ្លះនៃក្រុងហុងកុងត្រូវបានបិទស្ទើរតែទាំងស្រុង ចំណែកឯសកម្មជនប្រជាធិបតេ្យប្រមាណជាង ២០នាក់ ក្នុងនោះក៏រួមមានទាំង មេដឹកនាំចលនានិស្សិត យ៉ូស្ហួរ វង និង សមាជិកសភាវ័យក្មេង ណាថាន់ ឡ ផងដែរ ត្រូវបានប៉ូលិសហុងកុងចាប់ឃុំខ្លួន តាំងពីថ្ងៃពុធម្សិលមិញ។
ទោះជាយ៉ាងណា គេឃើញថា លោកស៊ី ជីនពីង ហាក់ដូចជាចង់ព្យាយាមរំងាប់ក្តីបារម្ភរបស់ប្រជាជនហុងកុង ដោយលោកបានលើកឡើងនៅពេលធ្វើដំណើរមកដល់ព្រលានយន្តហោះហុងកុងថា លោកចង់ឲ្យដែនដីហុងកុងនៅតែស្ថិតក្រោមប្រព័ន្ធគ្រប់គ្រងតាមបែប "ប្រទេសមួយ ប្រព័ន្ធគ្រប់គ្រងពីរ" ប្រកបដោយស្ថិរភាព និងគង់វង់យូរអង្វែងទៅមុខតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ