ប្រធានគណៈកម្មាធិការជាតិអូឡាំពិកអាមេរិកលាលែងចេញពីមុខតំណែង
ចុះផ្សាយនៅថ្ងៃ៖
ស្តាប់ - ០៤:០៤
ក្រោយពីបានរងសម្ពាធរិះគន់ពីគ្រប់មជ្ឈដ្ឋាន ទីបំផុត លោក Scott Blackmun ប្រធានគណៈកម្មាធិការជាតិអូឡាំពិកអាមេរិកបានប្រកាសលាឈប់ពីមុខតំណែង។ សេចក្តីសសម្រេចនេះត្រូវបានធ្វើឡើង ក្រោយពីមានការចោទប្រកាន់ថាស្ថាប័នអូឡាំពិកអាមេរិកបានរក្សាភាពស្ងៀមស្ងាត់ចំពោះអំពើបៀតបៀនផ្លូវភេទលើអត្តពលិកនារីនៃក្រុមជម្រើសជាតិអាមេរិក។ ថ្មីៗនេះ រឿងអាស្រូវរំលោភបំពានផ្លូវភេទបានផ្ទុះឡើងនៅក្នុងពិភពកីឡាអត្តពលកម្មអាមេរិក។ គ្រូពេទ្យម្នាក់ប្រចាំសហព័ន្ធអត្តពលកម្មអាមេរិកត្រូវបានតុលាការកាត់ទោសឲ្យជាប់ពន្ធនាគារសរុបចំនួនរយៈពេល១៧៥ឆ្នាំ។
តាមរយៈសេចក្តីប្រកាសព័ត៌មានមួយចុះថ្ងៃទី២៨ ខែកុម្ភៈកន្លងទៅនេះ ប្រមុខដឹកនាំវិស័យកីឡាអាមេរិករូប គឺលោក Scott Blackmun បានប្រកាសលាឈប់ពីមុខតំណែង។ មានអាយុ ៦០ឆ្នាំ បុរសរូបនេះបានកាន់កាប់មុខតំណែងប្រធានគណៈកម្មាធិការជាតិអូឡាំពិកអាមេរិកអស់រយៈពេល៨ ឆ្នាំ។ បើទោះបីជាគាត់បានលើកយកហេតុផលសុខភាពមកបកស្រាយ ក៏ដោយ ព្រោះកន្លងមក គាត់ធ្លាប់មានអាការៈជំងឺមហារីកក្រពេញប្រូស្តាត ប៉ុន្តែ ការលាលែងតំណែងនេះត្រូវបានគេដឹងថា ដោយសារតែពាក់ព័ន្ធនឹងរឿងអាស្រូវបំពានផ្លូវភេទរបស់គ្រូពេទ្យម្នាក់ប្រចាំសហព័ន្ធអត្តពលកម្មអាមេរិក។
កាលពីដើមខែកុម្ភៈកន្លងនេះ សមាជិកព្រឹទ្ធសភាអាមេរិកចំនួនពីររូបបានសរសេរលិខិតរួមគ្នាមួយ ដើម្បីទាមទារឲ្យលោក Scott Blackmun ប្រធានគណៈកម្មាធិការជាតិអូឡាំពិកអាមេរិកលាលែងចេញពីមុខតំណែង។ នៅក្នុងខ្លឹមសារលិខិតនោះ សមាជិកព្រឹទ្ធសភាទាំងពីររូបនោះបានផ្អែកលើអំណះអំណាងនៃអត្ថបទស៊ើបអង្កេតមួយរបស់សារព័ត៌មាន Wall Street Journal។ បើយោងតាមសារព័ត៌មានដ៏ល្បីឈ្មោះមួយនេះបានឲ្យដឹងថា តាមពិតទៅ គណៈកម្មាធិការជាតិអូឡាំពិកអាមេរិកបានទទួលពាក្យបណ្តឹងជុំវិញការរំលោភបំពានផ្លូវភេទនេះ តាំងពីខែកក្កដា ឆ្នាំ២០១៥ មកម្ល៉េះ។ ប៉ុន្តែ នាពេលនោះ ថ្នាក់ដឹកនាំអូឡាំពិកអាមេរិកហាក់ធ្វើព្រងើយកន្តើយមិនបានធ្វើអន្តរាគមន៍អ្វីបន្តិចណាឡើយ។
ដោយសារតែស្ថិតនៅក្នុងស្ថានភាពចម្រូងចម្រាសបែបនេះទើបប្រមុខអូឡាំពិកអាមេរិកបានសម្រេចចិត្តលាឈប់ពីមុខតំណែង។
សូមរំលឹកជូនថា កាលពីថ្ងៃទី២៤ ខែមករាកន្លងទៅនេះ តុលាការប្រចាំរដ្ឋ Michigan បានប្រកាសសាលក្រមផ្តន្ទាទោសគ្រូពេទ្យឈ្មោះ Larry Nassar ឲ្យជាប់ពន្ធនាគារសរុបរយៈពេល ១៧៥ ឆ្នាំ។ គ្រូពេទ្យឯកទេសផែ្នកព្យាបាលឆ្អឹងដោយម៉ាស្សារូបនេះត្រូវបានចោទប្រកាន់ពីបទប្រព្រឹត្តអំពើរំលោភបំពានផ្លូវភេទលើអត្តពលិកនារីអាមេរិកចំនួនប្រមាណ ២៦៥ នាក់ក្នុងរយៈពេល ២២ ឆ្នាំចុងក្រោយនេះ។ ចន្លោះពីឆ្នាំ១៩៩៤ ដល់ឆ្នាំ២០១៦ គ្រូពេទ្យរូបនេះបានបម្រើការឲ្យសហព័ន្ធអត្តពលកម្មអាមេរិក, គណៈកម្មាធិការជាតិអូឡាំពិកអាមេរិក និងសាកលវិទ្យាល័យរដ្ឋ Michigan។ ជនរងគ្រោះសុទ្ធសឹងតែអត្តពលិកនារីស្ថិតក្នុងវ័យកុមារ ឬវ័យជំទង់។
មានអាយុ៥៤ឆ្នាំ គ្រូពេទ្យរូបនេះបានព្យាបាលអត្តពលិកនារីអាមេរិកនៅគ្លីនិកកីឡាប្រចាំសាកលវិទ្យាល័យរដ្ឋ Michigan និងគ្លីនិកប្រចាំសហព័ន្ធអត្តពលកម្មអាមេរិក។ ក្នុងរយៈពេលជួបព្យាបាលអត្តពលិកនារីម្នាក់ៗ ដោយយកលេសត្រូវធ្វើម៉ាស្សាព្យាបាលរបួសឆ្អឹង ឬចង្កេះ គ្រូពេទ្យម៉ាស្សារូបនោះតែងបានឆ្លៀតឱកាសប៉ះពាល់ ឬស្ទាបអង្អែលរាងកាយជនរងគ្រោះ។ រឿងអាស្រូវនេះបានផ្ទុះឡើង ក្រោយពីសារព័ត៌មានបានលាតត្រដាងកាលពីឆ្នាំ២០១៦។ ក្រោយពីបានចាប់ខ្លួន គ្រូពេទ្យរូបនោះបានទទួលការជំនុំជម្រះក្តីចំនួនបីដាច់ដោយឡែកពីគ្នា។ ក្នុងចំណោមនោះ មានរឿងក្តីពាក់ព័ន្ធនឹងការផ្ទុករូបភាពអាសអាភាសកុមារដោយតុលាការបានកាត់ទោសឲ្យជាប់ពន្ធនាគាររយៈពេល ៦០ ឆ្នាំ។
ចំពោះរឿងក្តីរំលោភបំពានផ្លូវភេទលើអត្តពលិកនារីអាមេរិក សវនាការបានចំណាយពេលជាច្រើនថ្ងៃ។ នារីជាជនរងគ្រោះចំនួន ១៥៦ នាក់បានឡើងមកធ្វើសក្ខីកម្មជាបន្តបន្ទាប់។ នារីរងគ្រោះទាំងនោះសុទ្ធតែបានរៀបរាប់ដូចគ្នាពីការរំលោភបំពានផ្លូវភេទពីសំណាក់គ្រូពេទ្យរូបនោះ។ ដោយរងការចោទប្រកាន់ចំនួន៧ករណី តុលាការប្រចាំរដ្ឋ Michigan បានកាត់ទោសគ្រូពេទ្យនោះឲ្យជាប់ឃុំពន្ធនាគារសរុប១៧៥ ឆ្នាំ។ បើយោងតាមសាលក្រមតុលាការ ជនជាប់ចោទគ្មានសិទ្ធិសុំដោះលែងខ្លួនឲ្យមានសេរីភាពមុនពេលបញ្ចប់ទោសឡើយ។ ដោយយោងតាមស្ថានទម្ងន់ទោសដ៏ធ្ងន់ធ្ងរនេះ ជនជាប់ចោទរូបនេះនឹងចំណាយពេលមួយជីវិតរបស់ខ្លួនរស់នៅក្នុងមន្ទីរឃុំឃាំងរហូតដល់ថ្ងៃស្លាប់។
សូមរំលឹកជូនថា ក្រោយពីមានការផ្ទុះរឿងអាស្រូវរំលោភផ្លូវភេទក្នុងពិភពកីឡាអត្តពលកម្មអាមេរិក សំឡេងតវ៉ាមកពីគ្រប់មជ្ឈដ្ឋានបានបានផ្ទុះឡើងប្រឆាំងនឹងបណ្តាសហព័ន្ធកីឡាអាមេរិក។ ពិសេស គឺស្ថាប័នជាតិអូឡាំពិកអាមេរិកដែលបានសំងំបិទភែ្នកបណ្តែតបណ្តោយឲ្យរឿងរ៉ាវនេះកើតឡើងអស់រយៈពេលរាប់សិបឆ្នាំ។ គេកំពុងឆ្ងល់ថា ហេតុអ្វីបានគេអាចបណ្តែតបណ្តោយឲ្យគ្រូពេទ្យម្នាក់នេះប្រព្រឹត្តអំពើរំលោភផ្លូវភេទលើអត្តពលិកនារីអស់រយៈពេលជាច្រើនឆ្នាំដោយពុំមានការខ្វាយខ្វល់អ្វីបន្តិចឡើយ។
បច្ចុប្បន្ននេះ លោកស្រី Susanne Lyons ត្រូវបានតែងតាំងបណ្តោះជាប្រធានអាសន្នគណៈកម្មាធិការជាតិអូឡាំពិកអាមេរិក។ ស្របពេលគ្នានេះផងដែរ អ្នកទទួលខុសត្រូវជាច្រើនរូបប្រចាំសហព័ន្ធអត្តពលកម្មអាមេរិកបានលាលែងចេញពីមុខតំណែងជាបន្តបន្ទាប់។ ទាំងគណៈកម្មាធិការជាតិអូឡាំពិកអាមេរិក ទាំងសហព័ន្ធអត្តពលកម្មអាមេរិក កំពុងតែបើកការស៊ើបអង្កេតផ្ទៃក្នុងមួយ។ ចំណែកគ្រូបង្វិកអត្តពលកម្មនៃក្រុមជម្រើសជាតិនារីអាមេរិកក៏ត្រូវបានសហព័ន្ធព្យួរមុខងារបណ្តោះអាសន្នដោយរង់ចាំលទ្ធផលនៃការស៊ើបអង្កេតផ្ទៃក្នុងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ