រដ្ឋអាជ្ញាអាមេរិកចោទប្រកាន់មន្ត្រីចារកិច្ចរុស្ស៊ី ១២នាក់ ក្នុងសំណុំរឿងលូកដៃក្នុងការបោះឆ្នោតប្រធានាធិបតីអាមេរិក
នៅអាមេរិក, ថ្ងៃសុក្រទី១៣កក្កដានេះ រដ្ឋអាជ្ញាពិសេសដែលទទួលបន្ទុកស៊ើបអង្កេត រឿងការចូលលូកដៃរបស់រុស្ស៊ី ក្នុងការបោះឆ្នោតនៅអាមេរិក បានចោទប្រកាន់ ជាផ្លូវការ លើមន្ត្រីចារកិច្ចរុស្ស៊ី ចំនួន១២នាក់ ពីបទបានចូលទៅលួចទិនន្ន័យ ក្នុងប្រព័ន្ធកុំព្យូរទ័រ របស់គណបក្សប្រជាធិតេយ្យ។ ចំពោះរុស្ស៊ី ការចោទប្រកាន់នេះ គឺគ្រាន់តែដើម្បីបំពុលបរិយាកាសនៃជំនួបរបស់លោក ពូទីន និងលោក ត្រាំ ដែលត្រូវជួបគ្នានាពេលដ៏ខ្លីខាងមុខតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
រដ្ឋអាជ្ញាពិសេសរបស់អាមេរិក បានបញ្ជាក់ថា មនុស្សទាំង១២នាក់នោះ គឺសុទ្ធតែជាចារកិច្ចរបស់រុស្ស៊ី និងមិនពាក់ព័ន្ធនឹងជនជាតិអាមេរិកឡើយ។ ពួកគេទាំងនោះ បានប្រើបច្ចេកវិជ្ជាទំនើបចូលលួចទិន្នន័យក្នុងកុំព្យូទ័រ របស់បក្សប្រជាធិបតេយ្យ និងក្នុងអ៊ីម៉ែលរបស់លោកស្រី ហ៊ីឡារី ឃ្លីនតុន ដើម្បីធ្វើឲ្យមានការផ្លាស់ប្តូរលទ្ធផលបោះឆ្នោតអាមេរិក ឆ្នាំ២០១៦។ លោករដ្ឋអាជ្ញាពិសេសរបស់អាមេរិក បានសង្កត់ធ្ងន់ទៀតថា ពួកចារកិច្ចនោះ ក៏បានលួចទិន្នន័យរបស់អ្នកបោះឆ្នោតមួយលាននាក់ពីគេហទំព័ររបស់ក្រុមប្រឹក្សាបោះឆ្នោតជាតិអាមេរិកទៀត។
ពីថ្ងៃសុក្រទី១៣កក្កដាដែរ លោកត្រាំ បានថ្លែងប្រតិកម្មពីប្រទេសអង់គ្លេស ថា ការចោទប្រកាន់របស់រដ្ឋអាជ្ញាអាមេរិកនេះ គឺជារឿងដែលឆ្កួតលីលាបំផុត ហើយលោក ត្រាំ ក៏ធ្លាប់ចាត់ទុកក្រុមអ្នកចង់ជីកកកាយរឿងបោះឆ្នោតនេះដែរថា ជាពួកមេធ្មប់។ ហើយនាពេលកន្លងទៅ លោកត្រាំថែមទាំងបានដកតំណែងមេប៉ូលីស FBI ថែមទៀតផង។
ចំណែកភាគីរុស្ស៊ី គឺតែងតែបដិសេធច្រានចោលតែរហូតមក ហើយម្សិលមិញ ក៏នៅតែថាគ្មានពាក់ព័ន្ធរឿងលូកដៃលូកជើងក្នុងការបោះឆ្នោតអាមេរិកអ្វីនោះទេ។ តំណាងរដ្ឋាភិបាលក្រេមឡាំង បានចាត់ទុកការចោទប្រកាន់របស់រដ្ឋអាជ្ញាពិសេសរបស់អាមេរិកថា គឺគ្រាន់តែដើម្បីបំពុលបរិយាកាសដែលលោកត្រាំនិងលោកពូទីន ត្រូវជួបគ្នាដោយកក់ក្តៅតែប៉ុណ្ណោះ។
ជាការកត់សម្គាល់ ការសម្រេចចោទប្រកាន់របស់រដ្ឋអាជ្ញាពិសេសរបស់អាមេរិកនេះ គឺធ្វើឡើងតែបីថ្ងៃប៉ុណ្ណោះ មុនជំនួបផ្លូវការរបស់លោកប្រធានាធីបតីអាមេរិកនិងប្រធានាធិបតីរុស្ស៊ី ឈានចូលមកដល់។ តាមគម្រោង លោកដូណាល់ ត្រាំ និងលោកវ៉្លាឌីមៀរ ពូទីន នឹងជួបគ្នា នៅថ្ងៃទី១៦កក្កដាខាងមុខ នៅក្នុងទីក្រុងហែលសិនគី ប្រទេសហ្វាំងឡង់។ ជាជំនួបកំពូលមួយទល់នឹងមួយជាលើកដំបូង ចាប់តាំងពីលោក ដូណាល់ ត្រាំ បានជាប់ឆ្នោតឡើងកាន់តំណែងជាប្រធានាធិបតីអាមេរិកមក។
ក៏ប៉ុន្តែ អ្នកប្រឆាំងលោកត្រាំ នៅអាមេរិក បានស្នើឲ្យលោក ត្រាំ លុបចោលជំនួបជាមួយលោកពូទីន។ សូម្បីតែលោក ចន ម៉ាក់ឃេន សមាជិកព្រឹទ្ធសភាមកពីបក្សសាធារណរដ្ឋ ដូចលោកត្រាំ ក៏ចង់ឲ្យប្រធានាធបិតីអាមេរិក លុបចោលជំនួបនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ