អាមេរិកបានបញ្ជូនអ្នកទោស ៦នាក់នៅពន្ធនាគារ Guantanamo ទៅកាន់ប្រទេសអ៊ុយរូហ្គាយ
នៅថ្ងៃអាទិត្យ ទី៧ ធ្នូ ក្រសួងការពារជាតិអាមេរិកបានប្រកាសឲ្យដឹងពីការបញ្ជូនអ្នកទោសចំនួន ៦នាក់ពីពន្ធនាគារ Guantanamo ក្នុងប្រទេសគុយបាទៅកាន់ប្រទេសអ៊ុយរូហ្គាយ។ អ្នកទោសទំាង ៦នាក់ដែលបានជាប់ក្នុងគុក Guantanamo តំាងពី ១០ឆ្នំាមកហើយនោះ មានជនជាតិស៊ីរីចំនួន ៤នាក់ ទុយនីស៊ីម្នាក់ និងម្នាក់ទៀតជាជនជាតិប៉ាឡេស្ទីន។ ការបញ្ជូនអ្នកទោសនៅ Guantanamo ទៅកាន់ប្រទេសអ៊ុយរូហ្គាយពេលនេះត្រូវបានធ្វើឡើង ដោយផ្អែកលើកិច្ចព្រមព្រៀងរវាងទីក្រុងវ៉ាស៊ីតោន និងទីក្រុងម៉ុងតេវីដេអូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
យោងតាមកិច្ចព្រមព្រៀងរវាងអាមេរិក និងអ៊ុយរូហ្គាយ អ្នកទោសទំាង ៦នាក់នឹងត្រូវទទួលស្វាគមន៍ដូចជាជនភៀសខ្លួនផ្សេងទៀតដែលកំពុងស្នាក់នៅក្នុងប្រទេសអ៊ុយរូហ្គាយដែរ មានន័យថា ពួកគេនឹងទទួលបានទីកន្លែងស្នាក់នៅ អាចបំពេញការងារ និងមានសិទ្ធិទទួលជំនួយសង្គមផ្សេងៗ។ ទន្ទឹមគ្នានេះ និងបើតាមការបញ្ជាក់របស់លោកប្រធានាធិបតីអ៊ុយរូហ្គាយពីពី មូយីកា អ្នកទោសទំាងនោះអាចនឹងចាកចេញពីប្រទេសអ៊ុយរូហ្គាយនៅពេលណាក៏បាន ប្រសិនបើពួកគេចង់ចេញ ពោលគឺខុសពីការទាមទារចង់បានរបស់លោកប្រធានាធិបតីអាមេរិកអូបាម៉ាដែលតម្រូវឲ្យពួកនេះត្រូវស្នាក់នៅក្នុងប្រទេសអ៊ុយរូហ្គាយយ៉ាងតិច ២ឆ្នំានោះ។
គួរជម្រាបជូនថា លោកប្រធានាធិបតីអ៊ុយរូហ្គាយពីពី មូយីកាដែលជាអតីតឧទ្ទាមទ័ពព្រៃ និងដែលអណត្តិរបស់លោកត្រូវចប់ឆាប់ៗខាងមុខធ្លាប់បានចេញមុខទាមទារឲ្យទ្វីបអាមេរិកឡាទីនទទួលយកអ្នកទោសនៅ Guantanamo។ រីឯលោកតាបារ៉េ វ៉ាកេដែលត្រូវស្នងតំណែងពីលោកមូយីកាក៏បានគំាទ្រគំនិតផ្តួចផ្តើមនេះ ដោយចាត់ទុកជាទង្វើមនុស្សធម៌សុទ្ធសាធ។ ដោយឡែក លោកមូយីកាបានរម្លឹកជាថ្មីថា គោលបំណងរបស់លោកក្នុងការទទួលយកអ្នកទោសនៅ Guantanamo គឺដើម្បីជួយលោកអូបាម៉ាដែលបានសន្យាបិទពន្ធនាគារយោធា Guantanamo ក្នុងប្រទេសគុយបាដ៏ចម្រូងចម្រាស។ គឺជាគុកដែលអាមេរិកក្នុងជំនាន់លោកប្រធានាធិបតី Georges W.Bush បានបង្កើតឡើងសម្រាប់ដាក់ពួកភេរវជន។ កន្លងមក កម្មវត្ថុរបស់លោកអូបាម៉ាដែលចង់យកអ្នកទោសនៅ Guantanamo ទៅឃុំឃំាងនៅពន្ធនាគារក្នុងទឹកដីអាមេរិកំាងបានប្រឈមនឹងការជំទាស់យ៉ាងខ្លំាងពីសភា។
តែលោកប្រធានាធិបតីអ៊ុយរូហ្គាយបានបញ្ជាក់ថា លោកបានសុំជាថ្នូរពីអាមេរិកវិញ ឲ្យបញ្ឈប់ការដាក់ទ័ណ្ឌកម្មលើប្រទេសគុយបា ព្រមទំាងដោះលែងអ្នកទោសចំនួន ៤នាក់ ពិសេសជនជាតិគុយបា ៣នាក់ជាសមាជិករបស់ក្រុម « Cuban five » ដែលត្រូវបានអាមេរិកកាត់ទោសក្នុងឆ្នំា ១៩៩៨ ពីបទធ្វើចារកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ