បុរសខ្លាំងទាំង២នាក់ ព្រមជួបគ្នាជាលើកដំបូងនៅចុងខែឧសភា
បន្ទាប់ពីបានឌឺដងដាក់គ្នាគ្រប់ពាក្យសម្តីអាក្រក់ៗរួចមក នៅថ្ងៃព្រហស្បតិ៍នេះ លោកប្រធានាធិបតីអាមេរិក ដូណាល់ ត្រាំ បានសម្រេចចិត្តជាប្រវត្តិសាស្ត្រមួយ ព្រមជួបពិភាក្សាគ្នាជាលើកដំបូង ជាមួយលោក គីម ជុងអ៊ុន នៅចុងខែឧសភាខាងមុខ។ ជាជំនួប ដែលសេតវិមាន រំពឹងអាចមានកិច្ចព្រមព្រៀងបញ្ឈប់កម្មវិធីអាវុធនុយក្លេអ៊ែររបស់កូរ៉េខាងជើង។ សម្រាប់លោក គីម ជុងអ៊ុន វិញ ជំនួបនេះ អាចធ្វើឲ្យមានការបង្រួបបង្រួមបងប្អូនកូរ៉េទាំង ២ឡើងវិញ។ ប្រទេសសម្ព័ន្ធមិត្តរបស់អាមេរិក និងឧបទ្វីបកូរ៉េ បានសម្តែងការភ្ញាក់ផ្អើល តែក៏ស្វាគមន៍ចំពោះដំណើរវត្តន៍ជាវិជ្ជមាននេះដែរ។ យ៉ាងណាមិញ អ្វីៗគឺនៅតែស្ថិតក្នុងការសង្កេតមើលគ្នាទៅវិញទៅមកនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ទីប្រឹក្សាសន្តិសុខជាតិកូរ៉េខាងត្បូង លោក Chung Eui-yong បានឈរប្រកាសនៅមុខសេតវិមានអាមេរិកតែម្តង នៅព្រឹកថ្ងៃព្រហស្បតិ៍នេះថា ជំនួបរវាងលោកប្រធានាធិបតីអាមេរិក និងមេដឹកនាំកូរ៉េខាងជើង ច្បាស់ណាស់នឹងធ្វើឡើងនៅចុងខែឧសភាខាងមុខ។ ជាការប្រកាសបន្ទាប់ពីលោក បានបញ្ចប់ដំណើរទស្សនកិច្ចកាលពីពេលថ្មីៗនេះ ក្នុងទីក្រុងព្យុងយ៉ាង ទីដែលលោកបានជួបពិភាក្សាជាមួយលោក គីម ជុងអ៊ុន ហើយបានលឺផ្ទាល់ត្រចៀកពីបំណងបញ្ឈប់កម្មវិធីអាវុធនុយក្លេអ៊ែរ និងការសម្តែងភាពតក់ក្រហល់របស់លោកគីម ជុងអ៊ុន ដែលចង់ជួបលោកដូណាល់ ត្រាំ។
ពេលមកដល់អាមេរិក លោក Chung Eui-yong ក៏បានពាំនាំពាក្យសម្តីទាំងនេះ មកប្រាប់លោកត្រាំ ហើយលោកប្រធានាធិបតីអាមេរិករូបនេះ ទំនងជារំភើបចិត្តដែរ រួចក៏បានយល់ព្រមជួបលោកគីម ជុងអ៊ុន និងថាវាជារឿងអស្ចារ្យ ដែលអាចញុំាងឲ្យព្យុងយ៉ាងបញ្ឈប់កម្មវិធីអាវុធនុយក្លេអ៊ែរបាន។ យ៉ាងណាក៏ដោយ អាមេរិក នៅតែបន្តការចារណាពីការដាក់ទណ្ឌកម្មដដែលលើប្រទេសកូរ៉េខាងជើង។
បន្ទាប់ពីបានដឹងដំណឹងនេះ នាយករដ្ឋមន្ត្រីជប៉ុន លោកស៊ិនហ្សូ អាបេ បានសម្តែងការភ្ញាក់ផ្អើល ប៉ុន្តែក៏បានសម្តែងការកោតសរសើរចំពោះដំណើរផ្លាស់ប្តូរជាវិជ្ជមាននេះ ព្រោះជប៉ុនដែលជាប្រទេសជិតខាងរបស់ឧបទ្វីបកូរ៉េ ពិតណាស់ថាបានធុញទ្រាន់នឹងការសាកល្បងបាញ់មីស៊ីលជាញឹកញយរបស់កូរ៉េខាងជើង នាពេលកន្លងមក។ ប៉ុន្តែចិន ដែលជាសម្ព័ន្ធមិត្តរបស់កូរ៉េខាងជើង នៅមិនទាន់បង្ហាញប្រតិកម្មណាមួយនៅឡើយទេ។
គេនៅមិនទាន់ដឹងទេ ថាតើជំនួបកំពូលរវាងបុរសខ្លាំងទាំង ២នាក់ ដែលធ្លាក់ឌឺដងផ្ចាញ់ផ្ចាលដាក់គ្នានេះ នឹងធ្វើឡើងនៅទីណា។ ស្តាប់ទៅទីកន្លែង វាមិនសមជាបញ្ហាសោះ ប៉ុន្តែបើសម្លឹងមើលពីអត្តចរឹតរបស់មេដឹកនាំទាំង ២ យើងអាចកត់សម្គាល់បានថា ប្រសិនបើជំនួបនេះ ធ្វើឡើងនៅសេតវិមានអាមេរិក នោះមានន័យថាលោកគីម ជុងអ៊ុន ត្រូវចាកចេញពីកូរ៉េខាងជើងជាលើកដំបូង តាំងពីពេលលោកកាន់អំណាច កាលពីឆ្នាំ ២០១១ ដើម្បីទៅគោរពលោកត្រាំ។ លោកគីម ជុងអ៊ុន មិនដែលចេញទៅក្រៅប្រទេសម្តងណាទេ សូម្បីតែពេលដែលលោកប្រធានាធិបតីចិន ស៊ី ជីនពីង ឡើងកាន់អំណាច កាលពីឆ្នាំ ២០១៣ ក៏លោកមិនបានឆ្លៀតទៅចូលរួមដែរ ដែលកាលណោះប៉េកាំង ខឹងជាខ្លាំងចំពោះអត្តចរឹតមេដឹកនាំនៃប្រទេសជិតខាងនេះ ហើយក៏បានសម្រេចជាមួយសហគមន៍អន្តរជាតិផ្សេងទៀត ដាក់ទណ្ឌកម្មលើកូរ៉េខាងជើង។
ប៉ុន្តែបើសិនជាជំនួបនេះ ធ្វើឡើងនៅព្យុងយ៉ាង នោះមានន័យថា បុរសចំណាស់ ដែលធ្លាប់ដៀលលោកគីម ថាជាក្មេងព្រហើននោះ នឹងត្រូវទៅគោរពក្មេងនោះ ដល់ផ្ទះវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ