អង់គ្លេសចង់ក្លាយជាប្រទេសវិនិយោគធំទី១នៅអាហ្វ្រិក
លោកស្រីនាយករដ្ឋមន្ត្រី Theresa May ចង់ឱ្យអង់គ្លេសក្លាយប្រទេសវិនិយោគធំជាងគេលំដាប់ទី១ នៅអាហ្វ្រិក។ ការថ្លែងក្តីស្រមៃយ៉ាងដូច្នេះ គឺធ្វើឡើងថ្ងៃទី២៨សីហា នៅប្រទេសអាហ្វ្រិកខាងត្បួង ជាទីដែលលោកស្រីធ្វើដំណើរទស្សនកិច្ចមួយជុំអាហ្វ្រិក។ សូមជ្រាបថា លោកស្រីនាយករដ្ឋមន្ត្រីអង់គ្លេស គឺទើបតែទៅជាន់ទឹកដឹកអាហ្វ្រិក ជាលើកទី១មួយតែប៉ុណ្ណោះ ចាប់តាំងពីបានឡើងកាន់តំណែងនៅឆ្នាំ២០១៦មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
លោកស្រីនាយករដ្ឋមន្ត្រី Theresa May ពន្យល់ថា ការវិនិយោគរបស់អង់គ្លេសនៅអាហ្វ្រិក គឺឈរលើស្មារតីនៃភាពរីកចម្រើនរួមគ្នា និងសុវត្ថិភាពទាំងសងខាង ហើយវាការចាំបាច់ណាស់ដែលត្រូវបង្កើតការងារឲ្យបានច្រើននៅអាហ្វ្រិក ដើម្បីរួមចំណែកកាត់បន្ថយចំណាកស្រុក ដែលហូរដូចទឹកបាក់ទំនប់ទៅទ្វីបអឺរ៉ុប។ ហើយការវិនិយោគរបស់អង់គ្លេស គឺនឹងជួយឲ្យមានកំណើនសេដ្ឋកិច្ច និងរក្សាស្ថិរភាពនៅអាហ្វ្រិកផងដែរ។
គួរគូសបញ្ជាក់ថា មហិច្ឆតារបស់លោកស្រី May ចង់ក្លាយជាប្រទេសវិនិយោគទុនធំជាងគេនៅអាហ្វ្រិកនេះ គឺធំជាងគេ តែក្នុងចំណោមប្រទេសមហាអំណាចឧស្សាហ៍លូតលាស់ខ្លាំង ហៅកាត់ថា G7 តែប៉ុណ្ណោះ ដែលមាន អាមេរិក ជប៉ុន អង់គ្លេស អាល្លឺម៉ង់ បារាំង អ៊ីតាលី និងកាណាដា (G8 + រុស្ស៊ី តែត្រូវដកចេញកាលពីឆ្នាំ២០១៤)។ ក៏ប៉ុន្តែ អង់គ្លេស ច្បាស់ជាត្រូវប្រឈមមុខនឹងគូប្រជែង យ៉ាងហោចពីរជាចម្បង។ ទី១ ដែនដីអាហ្វ្រិក គឺជា ទីលានចាស់របស់បារាំង ហើយទី២ គឺមហាយក្សចិន ដែលបានចូលទៅវាតទីយ៉ាងកក្រើករួចស្រេចហើយ។ ជាក់ស្តែង ជំនួបកំពូលសេដ្ឋកិច្ចចិនអាហ្វ្រិក នឹងត្រូវរៀបចំដោយមហាយក្សចិន នៅសប្តាហ៍ក្រោយនេះ ។
ដោយដឹងយ៉ាងដូច្នេះ លោកស្រីនាយករដ្ឋមន្ត្រី បញ្ជាក់ថា អង់គ្លេសត្រូវធ្វើការជាមួយដៃគូចាស់ ដែលជាក្បាលម៉ាស៊ីនរបស់អឺរ៉ុប។ ចំណែកការប្រឈមជាមួយចិននៅអាហ្វ្រិកនោះ លោកស្រី May បកស្រាយថា គេមិនអាចប្រកួតប្រជែងជាមួយមហាយក្សមួយចំនួនដែលកំពុងវិនិយោគនៅអាហ្វ្រិកស្រាប់ហើយនោះទេ ក៏ប៉ុន្តែ អ្វីដែលអង់គ្លេសអាចជូនអាហ្វ្រិកបាន នោះគឺការវិនិយោគទុនមួយ ដែលមានលក្ខណៈយូរអង្វេង ជាមួយនឹងគុណភាពខ្ពស់។
សូមជ្រាបថា សុបិនដ៏សម្បើមរបស់អង់គ្លេសនេះ គឺត្រូវលោកស្រី Theresa May ប្តេជ្ញាចិត្តថាធ្វើឲ្យសម្រេចចាប់ពីពេលនេះ រហូតនៅឆ្នាំ២០២២។ អ្នកវិភាគសេដ្ឋកិច្ច កត់សម្គាល់ថា អង់គ្លេស នឹងត្រូវប្រឈមមុខនឹងការលំបាកច្រើនផ្នែកសេដ្ឋកិច្ច បន្ទាប់ពីដើរចេញពីសហភាពអឺរ៉ុបជាផ្លូវការ។ ហេតុនេះហើយ ទើបអង់គ្លេស សង្ឃឹមថានឹងអាចស្រង់ដើមបានខ្លះ សម្រាប់បះប៉ូវការខូតខាតសេដ្ឋកិច្ច តាមរយៈការវិនិយោគនៅអាហ្វ្រិកនេះឯង។ ក្នុងដំណាក់កាលដំបូននេះ អង់គ្លេស គ្រោងដាក់កញ្ចប់ទុន ប្រមាណជា ៥ពាន់ ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ