សន្ធិសញ្ញាពិភពលោកប្រឆាំងការនេសាទខុសច្បាប់ចូលជាធរមាន
នៅថ្ងៃអាទិត្យ៥មិថុនានេះ អង្គការស្បៀងស្បៀងអាហារពិភពលោក ហៅកាត់ថា FAO បានប្រកាសនូវការចូលជាធរមាននៃកិច្ចព្រមព្រៀងអន្តរជាតិ ចែងប្រឆាំងការនេសាទខុសច្បាប់។ គេអាចហៅកិច្ចព្រមព្រៀងនេះថា ជាសន្ធិសញ្ញាទី១ មានលក្ខណៈបង្ខិតបង្ខំ ដើម្បីការពារធនធានត្រី។ ប្រទេសជាង៣០បានចុះហត្ថលេខាលើកិច្ចព្រមព្រៀងនេះ។ ប៉ុន្តែ ចិននិងជប៉ុន ដែលមានទីផ្សារត្រីដ៏ធំក្នុងពិភពលោក មិនបានចុះហត្ថលេខាទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ចាប់ពីថ្ងៃអាទិត្យ៥មិថុនានេះទៅ សន្ធិសញ្ញាអន្តរជាតិប្រយុទ្ធប្រឆាំងការនេសាទខុសច្បាប់ ចូលជាធរមានហើយ នៅតាមបណ្តាប្រទេសដូចជាថៃ អ៊ីស្លង់ នរវែស អូស្ត្រាលី គុយបា អាហ្វ្រិកខាងត្បូង រឺសូម៉ាលីជាដើម។
សន្ធិសញ្ញា អន្តរជាតិនេះមានទិសដៅធានាអោយបាននូវការនេសាទដ៏ត្រឹមត្រូវ ហើយដែលអាចផ្គត់ផ្គង់តំរូវការពិភពលោក។ ប្រទេសហត្ថលេខីនៃសន្ធិសញ្ញាត្រូវចាត់វិធានការរារាំងកុំអោយមានការ នាំត្រីដែលគេនេសាទខុសច្បាប់ អាចយកចេញទៅលក់នៅទីផ្សារ។ ពួកគេត្រូវចែករំលែកព័ត៌មាន រវាងគ្នានឹងគ្នា អោយបានទូលំទូលាយ ទាក់ទងកប៉ាល់ដែលអាចជាប់សង្ស័យថា នេសាទខុសច្បាប់ក្នុងទ្រង់ទ្រាយធំ រឺក៏ត្រូវត្រួតពិនិត្យបណ្តាកប៉ាល់ដែលជាប់សង្ស័យជាដើម។
បណ្តាប្រទេសទាំងនេះមានសិទ្ធិបដិសេធមិនអោយកប៉ាល់ដែលជាប់សង្ស័យ បានចូលមកចុះចតចាក់សាំងក្នុងដែនទឹកខ្លួន។ ចាប់ពីពេលនេះទៅ កប៉ាល់បរទេសដែលចង់ចូលកំពង់ផែ ត្រូវសុំច្បាប់អនុញ្ញាតជាមុនសិន ហើយត្រូវផ្តល់ព័ត៌មានច្បាស់លាស់ទាក់ទងនឹងអត្តសញ្ញាណ សកម្មភាព រឺក៏បរិមាណត្រីដែលមានលើកប៉ាល់របស់ខ្លួន។
យោងតាមអង្គការស្បៀងអាហារពិភពលោក (FAO) ការបើកបរផ្លូវទឹកគ្មានការអនុញ្ញាតត្រឹមត្រូវ ការនេសាទប្រភេទត្រីដែលគេការពារ ការប្រើប្រាស់ឧបករណ៍នេសាទខុសច្បាប់ ការមិនគោរពកូតានេសាទ សុទ្ធសឹងជាសកម្មភាពដែលឧស្សាហ៍កើតឡើងញឹកញាប់។ សកម្មភាពទាំងនេះបណ្តាលអោយប៉ះពាល់ដល់ការបន្តពូជរបស់ត្រី ហើយក៏អាចធ្វើអោយបាត់បង់ពូជត្រីផងដែរ។
ទោះយ៉ាងនេះក្តី មហាអំណាចចិននិងជប៉ុនដែលមានទីផ្សារត្រីដ៏ធំក្នុងពិភពលោក មិនបានចុះហត្ថលេខាលើសន្ធិសញ្ញានេះទេ។ អង្គការFAO អំពាវនាវអោយរាល់ប្រទេសដែលពុំទាន់បានចុះហត្ថលេខា ប្រញាប់មកចុះហត្ថលេខា ដើម្បីចូលរួមប្រយុទ្ធប្រឆាំងការនេសាទខុសច្បាប់ ពិសេសការពារធនធានត្រីក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ