កូនក្មេង១២នាក់និងគ្រូបង្វឹកបាល់ទាត់ដែលបាត់ខ្លួនក្នុងរូងភ្នំត្រូវបានរកឃើញនៅរស់រានមានជីវិត
នៅទីបំផុតទៅ ក្រុមអ្នកមុជទឹកថៃនិងអង់គ្លេស បានរកឃើញកូនក្មេង១២នាក់ រួមទាំងគ្រូបង្វិកបាល់ទាត់ម្នាក់ កាលពីយប់មិញ )២ខែកក្កដា(បន្ទាប់ពីបាត់ខ្លួននៅក្នុងរូងភ្នំអស់រយៈពេល៩ថ្ងៃ។ បច្ចុប្បន្នពួកគេមិនទាន់យកចេញពីក្នុងរូងភ្នំនៅឡើយទេ ដោយរងចាំក្រុមសង្គ្រោះបន្ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
នៅទីបំផុតទៅ ប្រតិបត្តិការស្វែងរកកូនក្មេងបាត់ខ្លួននៅក្នុងរូងភ្នំ១២នាក់ និងគ្រូបង្វិកបាល់ទាត់ម្នាក់នៅក្នុងប្រទេសថៃ ជិតបញ្ចប់ហើយ បន្ទាប់ពីគេបានរកឃើញក្រុមក្មេងៗទាំងនោះ នៅមានជីវិតនៅឡើយ។ ពួកគេត្រូវបានរកឃើញដោយក្រុមអ្នកមុជទឹកថៃ និងអង់គ្លេស នៅក្នុងរូងភ្នំនាប្រមាណជាម៉ោង ៩និង៤៥នាទីយប់ ថ្ងៃចន្ទ ទី ២ ខែកក្កដា នៅចំងាយ៤០០ម៉ែត្របន្ទាប់ពីល្អាងធំមួយដែលគេឲ្យឈ្មោះថា "ឆ្នេរសមុទ្រប៉ាត់តាយ៉ា" (Pattaya Beach) ប្រទេសថៃ ជាកន្លែងដែលមនុស្សមួយចំនួនមិនបានគិតដល់។
ទោះបីជាយ៉ាងណាក៏ដោយ អភិបាលខេត្តឈៀងរ៉ៃ លោក Narongsak Osotthanakorn បាននិយាយនៅព្រឹកថ្ងៃអង្គារនេះថា ពួកគេទាំង១៣នាក់ នៅមិនទាន់យកចេញពីក្នុងរូងភ្នំភ្លាមៗនៅឡើយទេ ដោយរងចាំរហូតទាល់តែពួកគេមានសុវត្ថិភាពគ្រប់គ្រាន់។ ពួកគេត្រូវបានផ្តល់អាហារនិងទឹកដើម្បីបរិភោគឲ្យមានកម្លាំងឡើងវិញ បន្ទាប់ពីពួកគេបានអត់អាហារនិងទឹក អស់រយៈពេល១០ថ្ងៃមកហើយ។ ប៉ុន្តែ ពួកគេ មិនមាននណាម្នាក់ធ្លាក់ខ្លួនឈឺ ឬរងរបួសនោះឡើយ។
គួរជម្រាបជូនថា រូងភ្នំដែលកូនក្មេងទាំង១២នាក់ដែលមានអាយុពី១១ដល់១៦ឆ្នាំ និងគ្រូបង្វឹកកីឡាបាល់ទាត់ម្នាក់ បានចូលនិងជាប់កុនតាំងពីថ្ងៃសៅរ៍ ទី២៣ មិថុនាមកនេះ មានឈ្មោះ Tham Luang និងមានប្រវែងជាង ១០គីឡូម៉ែត្រ ស្ថិតក្នុងខេត្តឈៀងរ៉ៃ ក្បែរព្រំដែនប្រទេសឡាវ និងភូមា។ តាំងពី៩ថ្ងៃមកនេះ រដ្ឋអំណាចថៃ បានប្រើគ្រប់មធ្យោបាយ និងធនធានមនុស្សប្រមាណជាង១០០០នាក់ ដើម្បីស្វែងរកពួកគេ ក្នុងនោះ មានទាំងកងកម្លាំងទាហានអាមេរិកាំង ចិន និងកម្លាំងមុជទឹកជនជាតិអង់គ្លេសផង។ ទន្ទឹមគ្នានេះ ក៏មានការរៀបចំពិធីបន់ស្រន់របស់ឱពុកម្តាយកូនក្មេង ព្រមទាំងពិធីសូត្រធម៌របស់ព្រះសង្ឃនៅក្បែរច្រកចូលរូងភ្នំនោះដែរ។
យ៉ាងណាក៏ដោយ នេះចាត់ទុកថា ជាដំណឹងល្អសម្រាប់ប្រជាជនថៃ ដែលគេបានរកឃើញក្រុមក្មេងៗនិងគ្រូបង្វិកបាល់ទាត់ទាំង១៣នាក់នៅរស់រានមានជីវិត ខណៈដែលនាយករដ្ឋមន្ត្រីថៃ លោក ប្រាយុទ្ធ ចាន់អូចា បានចេញមកជូនពរឲ្យក្មេងៗទាំងនោះ មានសុវត្ថិភាព និងឆាប់វិលទៅរកប្រក្រតីភាពឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ