ថ្មីៗនេះនាយកដ្ឋានជំរុញពាណិជ្ជកម្មអន្ដរជាតិនិងក្រសួងពាណិជ្ជកម្មថៃបានរៀបចំកម្មវិធីផ្សព្វផ្សាយភាពយន្តថៃនៅកម្ពុជាឡើងវិញបន្ទាប់ពីអវត្តមានភាពយន្តថៃលើកញ្ចក់ទូរទស្សន៍ខ្មែរអស់រយៈពេលជាងមួយទស្សវត្ស។ការអនុញ្ញាតឲ្យបញ្ចាំងភាពយន្តថៃតាមរយៈប្រព័ន្ធផ្សព្វផ្សាយកម្ពុជាជាថ្មីនាពេលនេះបានទទួលរងការរិះគន់និងតវ៉ាប្រឆាំងពីសំណាក់សិល្បករព្រមទាំងប្រជាពលរដ្ឋខ្មែរមួយចំនួន។រិះគន់និងតវ៉ាប្រឆាំងព្រោះពួកគេអះអាងថាវាអាចទាញទម្លាក់វិស័យភាពយន្តខ្មែរឲ្យដុនដាបដូចកាលពី១០ឆ្នាំមុន។តើការចាក់បញ្ចាំងភាពយន្តថៃពិតជាធ្វើឲ្យវិស័យភាពយន្តខ្មែរធ្លាក់ចុះប្រជាប្រិយភាពជាថ្មីទៀតមែនឬយ៉ាងណា?និងថាតើការចាក់បញ្ចាំងភាពយន្តថៃជាឧបសគ្គឬឱកាសសម្រាប់ការអភិវឌ្ឍវិស័យភាពយន្តនៅកម្ពុជា?
ជាង១០ឆ្នាំក្រោយមក ខ្សែភាពយន្តនិងរឿងភាគថៃ កំពុងតែត្រឡប់មកបង្ហាញខ្លួនជាថ្មីនៅកម្ពុជា នៅតាមរោងភាពយន្តទំនើបៗ និងប៉ុស្តិ៍ទូរទស្សន៍មួយចំនួន។ សិល្បករ អ្នកដឹកនាំរឿង និងប្រជាពលរដ្ឋខ្មែរមួយចំនួន បានសម្ដែងការមិនពេញចិត្ត ចំពោះការចាក់បញ្ចាំងភាពយន្តថៃឡើងវិញនៅកម្ពុជានាពេលនេះ ដោយអះអាងថា ក្នុងអំឡុងពេល១០ឆ្នាំចុងក្រោយនេះ វិស័យភាពយន្តខ្មែរបាន និងកំពុងតែរីកដុះដាលយ៉ាងសន្សឹមៗ គួរជាទីមោទនៈ។ ហើយថា ការចាក់បញ្ចាំងភាពយន្តថៃឡើងវិញនាពេលនេះ អាចទាញទម្លាក់វិស័យភាពយន្តខ្មែរ ឲ្យធ្លាក់ចុះដុនដាប ដូចកាលពីជាង១០ឆ្នាំមុន។
មានការពិតមួយ ដែលគេត្រូវតែទទួលស្គាល់។ ជនជាតិខ្មែរមួយភាគធំ និយមចូលចិត្តទស្សនាភាពយន្តថៃ បើទោះបីជាវាផ្ដល់គំរូអាក្រក់ដល់សង្គមខ្មែរក៏ដោយ។ អតីតព្រះមហាក្សត្រខ្មែរ ព្រះបរមរតនកោដ្ឋ នរោត្តម សីហនុ ដែលជាផលិតករភាពយន្តពោរពេញដោយសមត្ថភាពមួយព្រះអង្គនោះ ធ្លាប់មានព្រះរាជឱង្ការថា រឿងភាគថៃជារឿងពាលា មានតែស្រីវាយគ្នាដណ្ដើមប្រុស ពុំគួរណាប្រជាជនខ្មែរនាំគ្នាទស្សនាសោះឡើយ។
គ្មានភាពយន្តថៃផ្សាយតាមកញ្ចក់ទូរទស្សន៍ខ្មែរ មិនមែនមានន័យថា ប្រជាពលរដ្ឋខ្មែរឈប់ទស្សនារឿងភាគថៃនោះទេ។ រឿងភាគថៃនៅតែពេញនិយមជានិច្ច នៅតាមហាងជួលឌីស។ រឿងដុំថៃ ជាពិសេសរឿងខ្មោច នៅតែអាចទាក់ទាញអ្នកទស្សនាបានពេញៗរោងកុនមួយ នៅចំកណ្ដាលក្រុងភ្នំពេញ។ អវត្តមានភាពយន្តថៃ ប៉ុស្តិ៍ទូរទស្សន៍ខ្មែរចាប់ផ្ដើមបញ្ចាំងរឿងភាគចិនបកប្រែ និងចុងក្រោយនេះ រឿងភាគកូរ៉េ និងឥណ្ឌា ដែលទទួលបានការគាំទ្រយ៉ាងច្រើនលើសលប់ ពីសំណាក់ទស្សនិកជននៅតាមផ្ទះ។
យ៉ាងណាក៏ដោយ អវត្តមានខ្សែភាពយន្តថៃនៅតាមប្រព័ន្ធផ្សព្វផ្សាយកម្ពុជា តាំងពីឆ្នាំ២០០៣ បានធ្វើឲ្យភាពយន្តខ្មែរ រស់ឡើងវិញ បើទោះបីជាមិនរស់រវើកក៏ដោយ។ នៅតាមរោងកុន គេឃើញមានភាពយន្តខ្មែរដាក់បញ្ចាំងជាញឹកញាប់។ ប៉ុស្តិ៍ទូរទស្សន៍ជាច្រើនដែលធ្លាប់តែបញ្ចាំងរឿងភាគថៃ បានងាកមកចាប់ផ្ដើមផលិតនិងចាក់ផ្សាយរឿងភាគខ្មែរជាបន្តបន្ទាប់។ ប៉ុន្តែការងើបឡើងវិញ នៃវិស័យភាពយន្តខ្មែរ ក្នុងរយៈពេលមួយទស្សវត្សចុងក្រោយនេះ មិនអាចធានាបាននូវគុណភាពឡើយ។ វាគ្រាន់តែបានធ្វើឲ្យសិល្បករខ្មែរ និងផលិតករភាពយន្តខ្មែរ មានការងារធ្វើតែប៉ុណ្ណោះ។
ខណៈដែលពិភពលោកកំពុងតែវិលទៅមុខ ភាពយន្តខ្មែរហាក់ដូចជានៅទ្រឹង ឬពេលខ្លះហាក់ដូចជាដើរថយក្រោយផង។ រោងកុនទំនើបៗមួយចំនួននៅភ្នំពេញ មានកូតាដាក់បញ្ចាំងភាពយន្តខ្មែរដែលមានគុណភាព ពី១០ ទៅ២០រឿងក្នុងមួយឆ្នាំ ប៉ុន្តែកូតានេះមិនទាន់អាចសម្រេចបានទេ។ ព្រោះអ្វី? មិនបាច់និយាយដល់ភាពយន្តខ្មែរមានគុណភាពនោះទេ គ្រាន់តែផលិតភាពយន្តឲ្យគ្រប់កូតាចាក់នៅតាមរោងកុន ក៏ធ្វើមិនបានផង។ យូរៗម្ដង ទើបគេអាចទស្សនា ខ្សែភាពយន្តខ្មែរប្រកបដោយគុណភាព នៅតាមរោងកុននានា។
នេះសរបញ្ជាក់ឲ្យឃើញយ៉ាងច្បាស់ថា ការចាក់បញ្ចាំងភាពយន្តថៃ មិនមែនជាកត្តាធ្វើឲ្យវិស័យភាពយន្តខ្មែរ ធ្លាក់ចុះប្រជាប្រិយភាពនោះទេ។ ហើយវាក៏មិនមែនជាឧបសគ្គសម្រាប់ការអភិវឌ្ឍវិស័យភាពយន្តនៅកម្ពុជាដែរ។ មានឬគ្មានការបញ្ចាំងភាពយន្តថៃ ភាពយន្តខ្មែរនឹងដាំក្បាលចុះ ប្រសិនបើគុណភាពនៅតែគ្មានអ្វីប្រែប្រួលយ៉ាងដូច្នេះ។ ខណៈដែលគុណភាពភាពយន្តខ្មែរនៅមានកម្រិត ការចាក់បញ្ចាំងភាពយន្តថៃនៅកម្ពុជានាពេលនេះ អាចជាឱកាសសម្រាប់ផលិតករភាពយន្តខ្មែរ តារាសម្ដែងខ្មែរ និងអ្នកពាក់ព័ន្ធក្នុងវិស័យភាពយន្តទាំងឡាយ រៀនសូត្រ និងអភិវឌ្ឍស្នាដៃរបស់ខ្លួនឲ្យមានគុណភាព។ ប្រសិនបើភាពយន្តខ្មែរ និងថៃ មានសាច់រឿងទាក់ទាញដូចគ្នា មានតួសម្ដែងសម និងស្អាតដូចគ្នា មានបច្ចេកទេសថតល្អដូចគ្នា សួរថាតើខ្មែរណាមិនគាំទ្រខ្មែរគ្នាឯងនោះ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ