បុរសកូរ៉េខាងត្បូងម្នាក់ដុតសម្លាប់ខ្លួនឯងមុខទូតជប៉ុន ព្រោះជម្លោះស្ដីពីការប្រើកម្លាំងពលកម្មដោយបង្ខំ
ជម្លោះរវាងជប៉ុននិងកូរ៉េខាងត្បូង តាំងពីជិតមួយសតវត្សរ៍ទៅហើយ នៅតែអូសបន្លាយរហូតមកទល់បច្ចុប្បន្ន។ នៅថ្ងៃសុក្រ ទី១៩កក្កដានេះ បុរសកូរ៉េខាងត្បូងម្នាក់ បានដុតសម្លាប់ខ្លួនឯងនៅមុខស្ថានទូតជប៉ុនប្រចាំទីក្រុងសេអ៊ូល ដើម្បីប្រឆាំងតវ៉ានឹងជប៉ុន។ ជប៉ុនដែលមិនព្រមសារភាពទទួលស្គាល់ពីកំហុសរបស់ខ្លួន ទាក់ទងនឹងការប្រើកម្លាំងពលកម្មដោយបង្ខំ នៅក្នុងសម័យសង្គ្រាមលោកលើកទី២។
ចុះផ្សាយនៅថ្ងៃ៖
បុរសដែលដុតខ្លួនឯងនៅមុខស្ថានទូតជប៉ុន គឺជាជនរងគ្រោះម្នាក់ នៃអំពើទាសភាពក្នុងសម័យសង្គ្រាមលោកលើកទី២។ ក្នុងពេលធ្វើដំណើរទៅដុតខ្លួនឯង បុរសកូរ៉េខាងត្បូងវ័យ៧០ឆ្នាំរូបនេះ ប្រាប់អ្នកស្គាល់គ្នាតាមទូរសព្ទថា ទង្វើរបស់គាត់ គឺជាសក្ខីភាពនៃការប្រឆាំងតវ៉ានឹងប្រទេសជប៉ុន។
ប្រទេសជប៉ុន និងកូរ៉េខាងត្បូង មានជម្លោះនឹងគ្នា នៅក្នុងសំណុំរឿងការប្រើប្រាស់កម្លាំងពលកម្មដោយបង្ខំ នៅក្នុងសម័យសង្គ្រាមលោកលើកទី២។ កូរ៉េខាងត្បូងទាមទារឲ្យជប៉ុនសារភាពទទួលស្គាល់ពីកំហុសរបស់ខ្លួន និងផ្ដល់ប្រាក់ឧបត្ថម្ភដល់ពលរដ្ឋកូរ៉េខាងត្បូង ដែលបានបម្រើការងារឲ្យជប៉ុននៅក្នុងសម័យនោះ។ ជម្លោះការទូតនេះ បានប្រែក្លាយទៅជាជម្លោះពាណិជ្ជកម្ម កាលពីដើមខែកក្កដានេះ បន្ទាប់ពីជប៉ុនបានប្រកាសរឹតបន្តឹងលក្ខខណ្ឌនៃការនាំចេញគ្រឿងបន្លាស់អេឡិចត្រូនិកទៅកូរ៉េខាងត្បូង។ ការរឹតបន្តឹងនេះ បានធ្វើឲ្យក្រុមហ៊ុនបច្ចេកវិទ្យាកូរ៉េខាងត្បូង រងផលប៉ះពាល់យ៉ាងខ្លាំង។
ជាការឆ្លើយតបវិញ និងដើម្បីបញ្ជាក់ពីសេចក្ដីស្នេហាជាតិ ពលរដ្ឋកូរ៉េខាងត្បូង បានធ្វើពហិការមិនទទួលទានស្រាបៀររបស់ជប៉ុន។ ការលក់ស្រាបៀរជប៉ុនដែលធ្លាប់តែពេញនិយមនៅកូរ៉េខាងត្បូង បានធ្លាក់ចុះប្រមាណ២៥ភាគរយ នៅក្នុងរយៈពេលពីរសប្ដាហ៍ដើមខែកក្កដានេះ។ នៅក្នុងរយៈពេលដូចគ្នាដែរ ការលក់ស្រាបៀររបស់កូរ៉េខាងត្បូងខ្លួនឯង កើនឡើងប្រមាណ៧ភាគរយ។ អ្នកជំនាញផ្នែកទីផ្សារបានគូសបញ្ជាក់ថា ការប្រែប្រួលដូច្នេះ មិនធ្លាប់មានពីមុនមកទេ។
បន្ថែមពីពហិការរបស់អ្នកបរិភោគ សមាគមម្ចាស់ហាងទំនិញរបស់កូរ៉េខាងត្បូង ដែលមានសមាជិកចំនួនជិត៤ពាន់នាក់ បានសម្រេចចិត្តឈប់លក់ទំនិញរបស់ជប៉ុន។ ទំនិញជប៉ុន ជាពិសេសស្រាបៀរតែម្ដង លក់ដាច់ខ្លាំងណាស់នៅកូរ៉េខាងត្បូង។ មិនលក់ស្រាបៀរជប៉ុន គឺជាការខាតបង់ដ៏ធំមួយសម្រាប់ម្ចាស់ហាង ប៉ុន្តែពួកគេមិនស្ដាយក្រោយទេ ដោយចាត់ទុកការសម្រេចចិត្តរបស់ខ្លួនថា ជាការលះបង់ដើម្បីជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ