RSF៖ ស្ថានភាពគំរាមកំហែងលើអ្នកកាសែត កាន់តែធ្ងន់ធ្ងរទូទាំងពិភពលោក
អង្គការអ្នករាយការណ៍គ្មានព្រំដែន ទើបតែចេញរបាយការណ៍ប្រចាំឆ្នាំរបស់ខ្លួន ស្តីពីសិទ្ធិសេរីភាពសារព័ត៌មានទូទាំងពិភពលោក។ យោងតាមរបាយការណ៍ថ្មីនេះ អ្នកកាសែតទូទាំងពិភពលោក កាន់តែទទួលរងនូវការគំរាមកំហែង បំភិតបំភ័យកាន់តែខ្លាំង។ បន្ថែមពីនេះទៀត នៅតាមប្រទេសខ្លះ ដែលមាន ទំនោរនយោបាយផ្តាច់ការ បានប្រើប្រាស់យុទ្ធសាស្ត្រតាមដាន រឹតត្បិតសិទ្ធិសេរីភាព ធ្វើការរបស់អ្នកយកព័ត៌មាន ព្រមទាំងបានបំផុសបំផុលព័ត៌មានក្លែងក្លាយ ដើម្បីបង្កាច់បង្ខូច ដល់បណ្តាញព័ត៌មាន ដែលមានវិជ្ជាជីវៈត្រឹមត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
យោងតាមរបាយការណ៍ប្រចាំឆ្នាំ២០១៩ របស់អង្គការអ្នករាយការណ៍គ្មានព្រំដែន (RSF) បានឲ្យដឹងថា ការស្អប់គុំគួន កំហឹង និងអំពើហិង្សា ធ្វើទៅលើអ្នកកាសែត បានកើនឡើង កាន់តែខ្លាំង។ ក្នុងចំណោម១៨០ប្រទេស ដែលគេបានធ្វើការអង្កេត គឺមានតែ២៤%ទេ ដែលការគោរពសិទ្ធិសេរីភាពសារព័ត៌មាន មានលក្ខណៈល្អ ឬ ល្អគួរសម។ ចំនួននេះបានថយចុះ បើប្រៀបធៀបទៅឆ្នាំមុន ដែលមាន២៦%។
សម្តីគំរាមកំហែង សំឡុតបំភ័យទៅលើអ្នកកាសែត ពីសំណាក់ថ្នាក់ដឹកនាំនយោបាយប្រទេសខ្លះ បានបង្កើតឲ្យមានបរិយាកាសទូទៅ ដែលស្អប់ ឬខឹងសម្បារ ទៅលើអ្នកកាសែត។ យោងតាមការអង្កេត សកម្មភាពហិង្សាលើរូបរាងកាយ ការជេរប្រមាថ ការចាប់ដាក់ឃុំដោយគ្មានឆ្លងកាត់ការជំនុំជំះ បានកើនឡើងកាន់តែច្រើន។ ការងារ ជាអ្នកកាសែត បានក្លាយជាការងារដែលកាន់តែគ្រោះថ្នាក់។
នៅសហរដ្ឋអាមេរិក គេសង្កេតឃើញថា អ្នកកាសែត កាន់តែបារម្ភពីសុវត្ថិភាព។ អ្នកកាសែតអាមេរិក ដែលត្រូវគេគម្រាមសំលាប់ មានកាន់តែច្រើន។ ហើយចំនួនអ្នកកាសែតអាមេរិក ដែលបង្ខំចិត្ត ត្រូវតែមានអង្គរក្សការពារខ្លួន បានកើនឡើងខ្ពស់ជាងពេលណាៗទាំងអស់។ នៅអឺរ៉ុបវិញ ស្ថានភាពសុវត្ថិភាព របស់អ្នកកាសែត ក៏បានចុះថយខ្លាំងដែរ ជាមួយនឹងករណីឃាតកម្មមួយចំនួន នៅប្រទេសម៉ាល់ត៍ ស្លូវ៉ាគី និងប៊ុលហ្ការីជាដើម។
នៅវៀតណាម និងនៅចិន បណ្តាញព័ត៌មានផ្លូវការ ដែលបំរើឃោសនា ឲ្យគណបក្សដឹកនាំប្រទេស បានវាទទីកាន់តែធំ ធ្វើឲ្យវិស័យសារព័ត៌មានសេរី កាន់តែគ្មានតុល្យភាព។ មិនត្រឹមតែប៉ុណ្ណោះ រដ្ឋអំណាចប្រទេសទាំងនេះ បានប្រើប្រាស់ វិធានាការតាមដានយ៉ាងស្អិត ទៅលើការចុះផ្សាយរបស់បណ្តាញព័ត៌មានឯករាជ្យ ដោយអ្នកកាសែត ជាច្រើននាក់ត្រូវជាប់ឃុំ ដោយសារតែការសរសេររិះគន់ ឬប៉ះពាល់ដល់ការដឹកនាំ។
ព្រមជាមួយគ្នានេះ រដ្ឋាភិបាលចិនមានយុទ្ធសាស្ត្រថ្មី ដែលសំដៅបំប៉ោង បំផុសបំផុលព័ត៌មានមិនបានការ ឬព័ត៌មានប្រឌិត ដើម្បីបំភ័ន្តមតិសាធារណៈឲ្យវង្វេង នៅលើបណ្តាញសង្គម។ គំរូនេះ កំពុងត្រូវបានប្រទេសមួយចំនួន ដែលទទួលឥទ្ធិពលពីចិន យកទៅអនុវត្តតាម ដើម្បីការពាររបបដឹកនាំផ្តាច់ការ។ នេះបើតាមការលើកឡើង របស់លោក Christophe Deloire អគ្គលេខានៃអង្គការអ្នករាយការណ៍គ្មានព្រំដែន។
តែយ៉ាងនេះក្តី របាយការណ៍នេះ បានបង្ហាញចំណុចវិជ្ជមាន សុទិដ្ឋិនិយមខ្លះ ស្តីពីគំរូល្អ នៃការអនុវត្ត និងការការពារសិទ្ធិសេរីភាពសារព័ត៌មាន ដូចជានៅប្រទេសន័រវ៉េស ប្រទេសហ្វាំងឡង់ និងប្រទេសកូស្តារីកាជាដើម។ បន្ថែមពីនេះទៀត ប្រទេសមួយចំនួន ដូចជា ម៉ាឡេស៊ី ម៉ាល់ឌីវ អេត្យូពី និងហ្កំប៊ី ជាដើម បានកែប្រែមុខមាត់យ៉ាងល្អ គួរឲ្យសរសើរ ក្នុងវិស័យសេរីភាពសារព័ត៌មាន បន្ទាប់ពីប្រទេសទាំងនេះ បានផ្លាស់ប្តូររដ្ឋាភិបាលថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ