ម៉ូស្គូចោទក្រុងគៀវថាប្រព្រឹត្តអំពើប្រល័យពូជសាសន៍ ប្រឆាំងនឹងជាតិរុស្ស៊ី
ដោយ ចោទប្រកាន់នេះ ស្ថាប័នស៊ើបអង្កេតរុស្ស៊ី ចងក្រងសំណុំរឿងព្រហ្មទណ្ឌ ទល់នឹងថ្នាក់ដឹកនាំយោធា និងនយោបាយអ៊ុយក្រែន តាមបទប្រល័យពូជសាសន៍តែម្តង ចំពោះ ការសម្លាប់រង្គាល និងដោយចេតនា បណ្តាជនមានដើមកំណើតជាជាតិរុស្ស៊ី រស់នៅតំបន់ ខាងកើតអ៊ុយក្រែន។ ប្រតិកម្មភ្លាមភ្លែត ពីខាងក្រុងគៀវ គឺថា រុស្ស៊ី លូកដៃចូលកិច្ចការផ្ទៃក្នុង អ៊ុយក្រែន ហើយគាំទ្រពួកឧទ្ទាមផ្តាច់ទឹកដីអ៊ុយក្រែន។
ចុះផ្សាយនៅថ្ងៃ៖
ស្ថាប័នស៊ើបអង្កេតរុស្ស៊ី ល្ងាចថ្ងៃ២៩កញ្ញា បានធ្វើការចោទប្រកាន់ ជាផ្លូវការទៅលើកងទ័ពអ៊ុយក្រែន ដែលចេះតែប្រើ ហើយប្រើទៀត សព្វាវុធធុនធ្ងន់ បៃបយ៉ាង ប្រព័ន្ធរ៉ុកកែតធុន BM-21 បាញ់ស្រោច ស្រេចតែចិត្ត ទៅលើសង្កាត់លំនៅអ្នកស្រុកតែម្តង បណ្តាលឲ្យគេ ស្លាប់រង្គាល ដោយគ្មានទោសពៃរ៍អ្វីសោះ។
គិតតាំងពីថ្ងៃ ១២ មេសា មក ពេលដែលកងទ័ពអ៊ុយក្រែនវាតប្រតិបត្តិការ ហៅថា ”ប្រឆាំង ភេរវនិយម” នៅប៉ែកខាងកើតអ៊ុយក្រែន គឺជាង ៥ខែកន្លះកន្លងទៅ មានបណ្តាជនស៊ីវិល ឈាមជ័ររុស្ស៊ី រស់នៅទីនោះ ធ្លាក់ខ្លួនស្លាប់អស់ជាង២.៥០០នាក់ ទៅហើយ ផ្ទះសំបែងគេ ជាង ៥០០ខ្នងត្រូវបានកំទេច ហើយអ្នកស្រុកនៅទីនោះ ចំនួនដល់ទៅជាង៣សែននាក់ បានបង្ខំចិត្ត សង្គ្រោះជីវិត ដោយបោះបង់ចោលលំនៅខ្លួន មកសុំជម្រក ជ្រកកោន នៅលើដែនដីរុស្ស៊ី។
ស្ថាប័នស៊ើបអង្កេតរុស្ស៊ីសន្និដ្ឋានថា ទង្វើពួកយោធាអ៊ុយក្រែន ដែលបំពេញទៅតាមបញ្ជា ដ៏សែនឧក្រិដ្ឋ របស់ថ្នាក់ដឹកនាំនយោបាយក្រុងគៀវ គឺពិតជា សំដៅធ្វើឲ្យផុតពូជរុស្ស៊ី នៅលើ ដែនដីអ៊ុយក្រែន។ អំពើនេះ គឺរំលោភយ៉ាងកម្រោលលើ អនុសញ្ញា ឆ្នាំ១៩៤៨ ស្តីអំពីឧក្រិដ្ឋកម្មប្រល័យពូជសាសន៍ និង ការផ្តន្ទាទោស ចំពោះឧក្រិដ្ឋកម្មនេះ។
រំលងតែប៉ុន្មានម៉ោងសោះ មហាអយ្យការអ៊ុយក្រែន បានផ្តើមកសាងសំណុំរឿងព្រហ្មទណ្ឌ ទល់នឹងអ្នកមុខ អ្នកការមួយចំនួន នៃស្ថាប័នស៊ើបអង្កេតរុស្ស៊ី តាមបទចោទប្រកាន់ដូចតទៅ ៖ បទជួយចូក ចែវគាំទ្រ អង្គការភេរវនិយម , បទជ្រៀតជ្រែកចូលក្នុង សកម្មភាពនៃអង្គការរដ្ឋ ខាងការពារសណ្តាប់ធ្នាប់ នៅអ៊ុយក្រែន , បទលូកដៃកកូរ ក្នុងក្រមព្រហ្មទណ្ឌអ៊ុយក្រែន។
មហាអយ្យការអ៊ុយក្រែនចាត់ទុកសកម្មភាព នៃស្ថាប័នស៊ើបអង្កេតរុស្ស៊ី ជាការគាំទ្រត្រង់ៗដល់ ពួកឧទ្ទាមផ្តាច់ទឹកដីអ៊ុយក្រែន ដែលមានន័យជាការរំលោភ លើបូរណភាពដែនដីរដ្ឋអ៊ុយក្រែន។
ជាការកត់សម្គាល់ កាលពីដើមខែ កញ្ញានេះ អង្គការអន្តរជាតិក្រៅរដ្ឋាភិបាល Amnesty International បានចោទភាគីទាំងសងខាង ដែលជាប់ក្នុងជម្លោះ នៅអ៊ុយក្រែន ថា សុទ្ធតែបាន ប្រព្រឹត្តឧក្រិដ្ឋកម្មយោធា ដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ