រុស្ស៊ីបង្កើនដោយស្ងាត់ៗ សហប្រតិបត្តិការ ជាមួយ កៀហ្ស៊ីស៊ីស្ថាន
ចុះផ្សាយនៅថ្ងៃ៖
ស្តាប់ - ០៤:០៥
គឺក្នុងផ្ទៃ នៃព្រឹត្តិការណ៍ពុះខ្ជោលនៅអ៊ុយក្រែន ដែលធ្វើឲ្យគេនាំគ្នាចាប់អារម្មណ៍ រុស្ស៊ីឆ្លៀតបង្កើនសហប្រតិបត្តិការ ដែលគេមិនសូវចាប់ភ្លឹកទេ ជាមួយនឹងរដ្ឋថ្មីមួយផ្សេងក្នុងលំហ អតីតសហភាពសូវៀត ពោលគឺប្រទេស កៀហ្ស៊ីស៊ីស្ថាន នៅតំបន់អាស៊ីកណ្តាល ជាទីដែលរុស្ស៊ីមានមូលដ្ឋានយោធាផ្តាច់មុខតែឯង ក្រោយពីស.រ.អា. បានដកខ្លួនចេញពីមូលដ្ឋានទ័ពអាកាស នៅទីនោះ កាលពី២ខែកន្លះមុន។
ជាការសម្គាល់ កៀហ្ស៊ីស៊ីស្ថាន ស្ថិតក្នុងចំណោមអតីតសាធារណរដ្ឋសូវៀត ដែលធ្លាប់បោកកញ្ជោ្រកដោយអ្វីដែលហៅថា “បដិវត្តន៍មានព័ណ”។ មុនដំបូង ឆ្នាំ២០០៣ នៅហ្ស័កហ្ស៊ី រដ្ឋក្នុងតំបន់នាយភ្នំកូកាស មានប្រព្រឹត្តទៅ “បដិវត្តន៍ផ្កាកុលាប” បន្ទាប់មក ឆ្នាំ២០០៤ នៅ អ៊ុយក្រែន គឺ ”បដិវត្តិព័ណលឿងទុំ” ហើយក្នុងឆ្នាំ២០១៤នេះ មានផ្ទុះឡើង ជាបដិវត្ត “ម៉ៃដាន” ឈ្មោះទីលានឯករាជ្យ កណ្តាលក្រុងគៀវ ជាទីដែលក្រុមយុវជនដៃដល់ បានធ្វើបាតុកម្មអុកឡុក អស់រាប់ខែជាប់រហូតដល់ផ្តួលប្រធានាធិបតីមានទំនោរមកខាងរុស្ស៊ី។ គួរនិយាយថា ខុស ពីនៅហ្ស័កហ្ស៊ី និងអ៊ុយក្រែន ដែលគោលដៅបដិវត្តនោះ គឺបង្រះខ្លួនចេញពីឥទ្ធិពលរុស្ស៊ី ហើយប្រកាន់យកទិសទៅខាងបស្ចិមលោក នៅកៀហ្ស៊ីស៊ីស្ថាន មានកើតឡើង ដល់ទៅ២ដង ជា ”បដិវត្តផ្កាទុយលីប” ម្តងក្នុងឆ្នាំ ២០០៥ និងម្តងទៀតក្នុងឆ្នាំ ២០១០ រួចទាំងពីរលើកនេះ គឺបញ្ហាផ្ទៃក្នុងសុទ្ធសាធ ផ្តួលរបបសែនពុករលួយ និងគ្រួសារនិយម លុះទាល់តែកាលណោះ ត្រូវគេដាក់ឈ្មោះថា ជាដែនដីខ្វះស្ថិរភាព។ ប៉ុន្តែ ចាប់ពីឆ្នាំ២០១១មក រដ្ឋាភិបាលថ្មីស្អាតស្អំ ចេះក្តាប់ស្ថានការណ៍បានពេញដៃ ឲ្យមានលំនឹង។
សម្រាប់រុស្ស៊ី កៀហ្ស៊ីស៊ីស្ថាន ជាប្រទេសមានន័យយុទ្ធសាស្ត្រ ដោយនៅទីនោះមានសំណង់ យោធារុស្ស៊ីដល់ទៅ៤កន្លែង រួចពីក្នុងនោះ គឺមូលដ្ឋានទ័ព ឈ្មោះ “កង់តា” នៅមិនឆ្ងាយប៉ុន្មាន ពី រដ្ឋធានីប៊ីស្កេក ជាទីដែលរុស្ស៊ីដាក់ឲ្យឈរជើង គឺយោធា ៦០០នាក់ ព្រមទាំងយានយន្ត និង យន្តហោះចម្បាំងមួយចំនួន។ អស់ជាង១២ឆ្នាំ កៀហ្ស៊ីស៊ីស្ថាន បានដើរតួ ជាប្រទេសតែមួយគត់ លើផែនដី ដែលមានមូលដ្ឋានយោធារបស់រុស្ស៊ីផង របស់ស.រ.អា.ផង។ មូលដ្ឋានកងអាកាសអាមេរិក ឈ្មោះ “ម៉ាណាស់” បានស្ថិតនៅចម្ងាយតែ៣០គ.ម.ប៉ុណ្ណោះ ពីមូលដ្ឋាន “កង់តា” របស់រុស្ស៊ី ប៉ុន្តែនៅឯជ្រុងម្ខាងផ្សេងពីរដ្ឋធានី ប៊ីស្កេក។ មូលដ្ឋាន “ម៉ាណាស់” ត្រូវបានស.រ.អា. ជួលប្រើប្រាស់ តាំងពីចុងឆ្នាំ២០០១ សម្រាប់ដឹកទ័ពនិងសម្ភារៈយោធា របស់បណ្តាប្រទេស ក្នុងបក្សអូតង់ ទៅគាស់រំលើងសំបុកពួកភេរវជនតាលីបង់ នៅអាហ្វហ្កានីស្ថាន ដែលជាប់ចោទក្នុងការវាយប្រហារ កំទេចអគារភ្លោះពីរនៃមជ្ឈមណ្ឌលពាណិជ្ជកម្ម ក្រុងញូវយ៉ក កាលពីថ្ងៃ ១១កញ្ញា ឆ្នាំ២០០១។
ទោះបី តម្លៃជួលនោះ ដែលមុនដំបូងគឺតែ១៧លាន៤សែនដុល្លារក្នុង១ឆ្នាំ ត្រូវបានស.រ.អា. ដំឡើងដល់៦០លានដុល្លារក្នុង១ឆ្នាំក្តី ក៏រដ្ឋសភាកៀហ្ស៊ីស៊ីស្ថាន នៅកណ្តាលឆ្នាំ២០១៣ បានសម្រេចលុបចោលកិច្ចព្រមព្រៀងឈប់ឲ្យអាមេរិក ប្រើប្រាស់មូលដ្ឋាននោះតទៅទៀត។ នៅទីបំផុត ថ្ងៃ១១កក្កដាឆ្នាំ២០១៤នេះ អង្គភាពទ័ពអាមេរិក មានគ្នាប្រមាណ១.០០០នាក់ បានចាកចេញអស់រលីងពីមូលដ្ឋាន “ម៉ាណាស់”។
ខ្លឹមសារនៃសាច់រឿងដែលមាន គឺសឲ្យឃើញពីជ័យជំនះស្ងាត់ៗរបស់រុស្ស៊ី ដែលចេះបញ្ចុះបញ្ចូល ថ្នាក់ដឹកនាំកៀហ្ស៊ីស៊ីស្ថាន ឲ្យខណ្ឌបញ្ចប់វត្តមានយោធាអាមេរិក មិនគ្រាន់តែ នៅកៀហ្ស៊ីស៊ីស្ថាន ប៉ុណ្ណោះទេ តែគឺនៅតំបន់អាស៊ីកណ្តាលជាទូទៅ។ ម៉ូស្គូ បានសន្យាផ្តល់ឥណទានក្នុងទំហំ ២.០០០លានដុល្លារ ផ្តល់ជាជំនួយឥតសំណង ១៥០លានដុល្លារ លុបចោលបំណុល ក្នុងទំហំ៥០០លានដុល្លារជំពាក់ដោយកៀហ្ស៊ីស៊ីស្ថាន ហើយថែមទាំងសន្យាធ្វើវិនិយោគក្នុងទឹកប្រាក់ ៥០០លានដុល្លារផ្សេង ដែលតាមលោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ្រវូ ជាជំនួយសម្រាប់ពន្លឿនសមាហរ័ណកម្ម របស់កៀហ្ស៊ីស៊ីស្ថាន មកនឹង ”សហភាពឥតពន្ធគយ” ដែលមកទល់ឥឡូវផ្សំឡើងពី៣ប្រទេស គឺរុស្ស៊ី កាហ្សាក់ស្ថាន និង បេឡារុស។ លោកប្រធានាធិបតីកៀហ្ស៊ីស៊ីស្ថាន អាល់ម៉ាស្បេក អាតំបាយេវ បានថ្លែងថា ប្រទេសគាត់ ត្រៀមលក្ខណៈបានសព្វគ្រប់ទៅហើយ សម្រាប់ចូលជាសមាជិក “សហភាពឥតពន្ធគយ” ឲ្យបានមុនដំណាច់ឆ្នាំនេះ។ ពិតជាការប្រទាញប្រទង់គ្នារវាង “សហភាពឥតពន្ធគយ” និង សហភាពអឺរ៉ុប ដែលបានចោទជាជម្រើសពិបាកអារកាត់ សម្រាប់លោកអតីតប្រធានាធិបតីអ៊ុយក្រែន វិកទ័រ យ៉ានូកូវិច លុះទាល់តែគាត់ធ្លាក់ពីតំណែងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ