ព័រទុយហ្គាល់៖អតីតនាយករដ្ឋមន្រ្តីជាប់ក្នុងសំណាញ់តុលាការពីរឿងពុករលួយ
នៅប្រទេសព័រទុយហ្គាល់ លោកអតីតនាយករដ្ឋមន្រ្តី José Socrates រួមជាមួយនឹងមនុស្ស ៣នាក់ផ្សេងទៀតត្រូវបានប៉ូលីសចាប់ខ្លួនកាលពីរាត្រីយប់ថ្ងៃសុក្រឆ្លងចូលថ្ងៃសៅរ៍ ទី២២ វិច្ឆិកា។ អ្នកទំាង ៣នាក់បានជាប់សង្ស័យពីបទបានលួចពន្ធ លាងលុយកខ្វក់ និងប្រព្រឹត្តិអំពើពុករលួយ។ ការចាប់ខ្លួនលោក José Socrates បានធ្វើឲ្យកក្រើកមជ្ឈដ្ឋានមហាជនព័រទុយហ្គាល់ទូទៅយ៉ាងខ្លំាង ព្រោះវាបានកើតមានឡើង ចំពេលដែលប្រទេសព័រទុយហ្គាល់ទើបបានឆ្លងកាត់រឿងអាស្រូវតុលាការមួយទៀតនាប៉ុន្មានថ្ងៃកន្លងទៅនេះ។
ចុះផ្សាយនៅថ្ងៃ៖
ស្តាប់ - ០១:៤២
ការចាប់ខ្លួនលោក José Socrates ត្រូវបានធ្វើឡើងនៅឯអាកាសយានដ្ឋានទីក្រុងលីសបោននាពេលដែលលោកទើបបានធ្វើដំណើរត្រឡប់មកពីទីក្រុងប៉ារីស ប្រទេសបារំាង។ នៅក្នុងទីក្រុងប៉ារីសដែលលោកមានផ្ទះ appartement មួយក្នុងតម្លៃប្រមាណជា ៣លានអឺរ៉ូ ហើយគឺការទិញផ្ទះ appartement នោះឯងដែលលោក José កំពុងជាប់ក្នុងសំណាញ់តុលាការពេលនេះ ពិសេសទាក់ទងនឹងប្រភពលុយដែលលោក José បានយកទៅទិញផ្ទះ appartement នោះ។ គួរជម្រាបជូនថា បន្ទាប់ពីបានលាឈប់ពីតំណែងនាយករដ្ឋមន្រ្តីក្នុងខែមិថុនា ឆ្នំា ២០១១ លោក José បានរស់នៅក្នុងទីក្រុងប៉ារីសដើម្បីបន្តការសិក្សានៅសាលា Sorbonne។
យោងតាមក្រសួងសាធារណៈ ការស៊ើបអង្កេតបច្ចុប្បន្នលើរូបលោក José ផ្តោតសំខាន់លើប្រតិបត្តិការធនាគារ និងការផ្ទេរលុយដែលគេមិនបានដឹងពីប្រភពដើម ពោលគឺមិនមានជាប់ពាក់ព័ន្ធនឹងប្រតិបត្តិការ Monte Branco កាលពីខែកក្កដាកន្លងទៅដែលឈានដល់ការចាប់ខ្លួនអតីតអគ្គនាយកធនាគារ Espirito Santo លោក Ricardo Salgado នោះទេ។ តែអ្វីដែលគួរឲ្យកត់សម្គាល់នោះគឺថា ឈ្មោះលោកអតីតនាយករដ្ឋមន្រ្តី José ក៏ធ្លាប់បានលើកឡើងជាច្រើនដងនៅក្នុងសំណុំរឿងពុករលួយគួរឲ្យសង្ស័យជាច្រើន ពិសេសលោកបានជួយសម្រួលនៅក្នុងសំណើសុំសាងសង់មជ្ឈមណ្ឌលពាណិជ្ជកម្ម Freeport មួយនៅក្នុងខេត្តក្បែរទីក្រុងលីសបោន។
យ៉ាងណាក៏ដោយ ការចាប់ខ្លួនលោក José ពេលនេះបានធ្វើឲ្យមហាជនព័រទុយហ្គាល់មានការភ្ញាក់ផ្អើលយ៉ាងខ្លំាង ព្រោះវាជារឿងអាស្រូវតុលាការធំទី២ក្នុងសប្តាហ៍ បន្ទាប់ពីរឿងអាស្រូវទី១ ទាក់ទងនឹងការផ្តល់ទិដ្ឋាការដែលឈានដល់ការចាប់មន្រ្តីរដ្ឋការចំនួន ១១នាក់ និងការលាចុះពីតំណែងរបស់រដ្ឋមន្រ្តីក្រសួងមហាផ្ទៃនៃគណបក្សស្តំានិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ