ប៉ាគីស្ថាន៖ មុនបោះឆ្នោតមួយថ្ងៃ បក្សកាន់អំណាច ប្រកាសថាខ្លួននឹងឈ្នះឆ្នោត
ថ្ងៃពុធ ទី២៥កក្កដានេះ ប៉ាគីស្ថានរៀបចំការបោះឆ្នោតជាតិ។ ក្នុងចំណោមពលរដ្ឋប្រមាណ២០០លាននាក់ គឺមានមនុស្សប្រមាណ១០០លាននាក់ ដែលបានចុះឈ្មោះបោះឆ្នោត។ ការបោះឆ្នោតជាតិនេះ គឺពោរពេញដោយក្តីព្រួយបារម្ភ ពីរឿងសុវត្ថិភាព និងព្រួយបារម្ភពីការជ្រែតជ្រែងរបស់កងកម្លាំងដែលស្និទ្ធនឹងបក្សកាន់អំណាច។
ចុះផ្សាយនៅថ្ងៃ៖ កែប្រែថ្ងៃទី៖
នៅប៉ាគីស្ថាន ការបោះឆ្នោតជាតិលើកនេះ មានបក្សបី ដែលមានសន្ទុះគាំទ្រខ្លាំង។ ទី១ គឺ «គណបក្សសម្ព័ន្ធអ៊ីស្លាមប៉ាគីស្ថាន» ដែលជាបក្សកាន់អំណាចជាច្រើនអាណត្តិមកហើយ។ ក៏ប៉ុន្តែមួយរយៈចុងក្រោយ គឺក្នុងជួររដ្ឋាភិបាលជួបរឿងអាស្រូវពុករលួយច្រើន។ សូម្បីតែអតីតនាយករដ្ឋមន្ត្រី Nawaz Sharif ក៏ត្រូវលាលែងពីតំណែង ហើយត្រូវតុលាការចោទប្រកាន់ ដោយសាររឿងពុករលួយដែរ។
ដូច្នេះ ពលរដ្ឋសង្ឃឹមទៅលើបក្សទី២ដែលជាបក្សប្រឆាំង។ បក្សនេះមានឈ្មោះថា «ចលនាដើម្បីយុត្តិធម៌» ដឹកនាំដោយលោក អ៊ីមរ៉ាន ឃាន់ (Imran Khan)។ លោក Imran Khan គឺជាអតីតកីឡាករកីឡាគ្រីកេត ដែលបានដឹកនាំក្រុមកីឡាគ្រីកេតជម្រើសជាតិប៉ាគីស្ថាន ឲ្យបានពានរង្វាន់ពិភពលោកនៅឆ្នាំ១៩៩២។ កីឡាគ្រីកេតនេះ គឺជានិម្មិតរូប និងជាមោទនភាពខ្លាំងសម្បើមណាស់ របស់ប៉ាគីស្ថាន។ ហេតុដូច្នេះហើយ បានជាលោក Imran Khan មានឈ្មោះល្បី មានអ្នកគាំទ្រច្រើន។
ចំណែកគណបក្សទី៣ គឺគណបក្សប្រជាជនប៉ាគីស្ថាន ដឹកនាំដោយលោកBilawal Bhutto Zardari កូនប្រុសរបស់អតីតនាយរដ្ឋមន្ត្រី គឺលោកស្រី Benazir Bhutto ដែលត្រូវបានគេធ្វើឃាតកាលពីឆ្នាំ២០០៧។ ជាអ្នកនយោបាយវ័យក្មេង កើតក្នុងពូជត្រកូលអ្នកនយោបាយតពូជ ជីតា និងម្តាយរបស់លោក សុទ្ធតែជាអ្នកនយោបាយ ហើយដែលត្រូវគេធ្វើឃាតទាំងអស់។ អ្នកនយោបាយប្រឆាំងរូបនេះ រត់នៅនិរទេសខ្លួន នៅអង់គ្លេសនិងអារ៉ាមរួម ហើយលោកចេះអង់គ្លេស ស្ទើរតែស្ទាត់ជាងភាសាជាតិកំណើតរបស់ខ្លួនផង។
នៅក្នុងយុទ្ធនាការហែក្បួនឃោសនាជាចុងក្រោយ កាលពីថ្ងៃចន្ទ លោក Imran Khanបានអំពាវវនាវឲ្យអ្នកគាំទ្រ ងើបពីព្រឹម នៅថ្ងៃពុធ ទី២៥កក្កដានេះ ដើម្បីទៅបោះឆ្នោត។
ចំណែកលោក Shahbaz Sharif ដែលជាប្រមុខដឹកនាំបក្សសម្ព័ន្ធអ៊ីស្លាមប៉ាគីស្ថាន បន្តតំណែងពីបងប្រុស ក៏បានប្រកាសក្តីសង្ឃឹមជាស្រេចហើយដែរ ថា បក្សកាន់អំណាចនឹងឈ្នះយ៉ាងប្រាកដ។
គួរជ្រាបដែរថា ក្នុងអំលុងយុទ្ធនាការឃោសនាបោះឆ្នោតនៅប៉ាគីស្ថាន រយៈជាងពីរសប្តាហ៍មកនេះ គឺមាន ហិង្សានិងអំពើភេរវកម្ម ជាច្រើនលើក ដែលបណ្តាលឲ្យមនុស្ស១៨០នាក់ស្លាប់។ ក្នុងនោះ បេក្ខជនឈរឈ្មោះ បីនាក់ ក៏ស្លាប់ ហើយនិងមានមនុស្សរាប់រយនាក់រងរបួស។ ហេតុនេះ ដើម្បីពង្រឹងសន្តិសុខនៅថ្ងៃបោះឆ្នោតថ្ងៃពុធនេះ អាជ្ញាធរបានដាក់ពង្រាយទាហានចំនួន៣៧ម៉ឺននាក់ និងប៉ូលិស៤៥ម៉ឺននាក់។ ក៏ប៉ុន្តែ ដោយសារកងទ័ពដែលស្និទ្ធនឹងបក្សកាន់អំណាចខ្លាំងពេក ត្រូវបានអ្នកសង្កេតការណ៍សម្តែងក្តីព្រួយបារម្ភ ថា ទាហានកងទ័ពទាំងនោះ អាចលូកដៃជ្រៀតជ្រែកក្នុងដំណើរការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ