លោកអូបាម៉ាបំពេញទស្សនកិច្ចនៅតំបន់បាល់ទិកក្នុងពេលកំពុងមានភាពតានតឹងជាមួយរុស្ស៊ី
ចុះផ្សាយនៅថ្ងៃ៖
ស្តាប់ - ០៤:៤៩
លោកអូបាម៉ាបានធ្វើដំណើរទៅដល់ប្រទេសអេស្តូនី នៅថ្ងៃពុធនេះ នៅក្នុងដំណើរទស្សនកិច្ចរយៈពេលមួយថ្ងៃ មុននឹងបន្តដំណើរទៅចូលរួមជំនួបកំពូលអង្គការអូតង់នៅរាជាណាចក្រអង់គ្លេស។ តាមរយៈដំណើរទស្សនកិច្ចនៅក្នុងតំបន់សមុទ្របាល់ទិកនេះ លោកអូបាម៉ាចង់ផ្ញើសារព្រមានមួយទៅកាន់លោកពូទីន ដែលត្រូវបានលោកខាងលិចចោទថាកំពុងចូលធ្វើអន្តរាគមន៍យោធាដោយផ្ទាល់ នៅក្នុងប្រទេសអ៊ុយក្រែន។
នៅក្នុងប្រទេសអេស្តូនី លោកអូបាម៉ាគ្រោងនឹងជួបជជែកពិភាក្សាជាមួយប្រមុខដឹកនាំប្រទេសទាំង៣ នៅក្នុងតំបន់សមុទ្របាល់ទិក គឺប្រធានាធិបតីអេស្តូនី លីទុយអានី និងឡេតូនី។
បើតាមមន្រ្តីសេតវិមាន ដំណើរទស្សនកិច្ចរបស់លោកអូបាម៉ា ទៅកាន់ប្រទេសអេស្តូនីទើបនឹងត្រូវបានរៀបចំធ្វើភ្លាមៗ កាលពីប៉ុន្មានសប្តាហ៍មុននេះប៉ុណ្ណោះ គឺនៅពេលដែលការប្រឈមមុខដាក់គ្នា រវាងរុស្ស៊ី និងលោកខាងលិចជុំវិញវិបត្តិអ៊ុយក្រែនបានកើតមានកាន់តែខ្លាំង ហើយប្រទេសតូចៗទាំង៣នៅតំបន់បាល់ទិកនេះបាននាំគ្នាបង្ហាញនូវការព្រួយបារម្ភកាន់តែខ្លាំង ខ្លាចមានជោគវាសនាដូចអ៊ុយក្រែន។
តាមរយៈដំណើរទស្សនកិច្ចនេះ លោកអូបាម៉ាមានបំណងបង្ហាញពីការប្តូរផ្តាច់របស់អាមេរិកក្នុងការជួយការពារប្រទេសទាំង ៣ ដែលសុទ្ធសឹងជាសមាជិកអង្គការអូតង់។ អ្នកនាំពាក្យរបស់សេតវិមានក៏បានលើកឡើងផងដែរថា ដំណើរទស្សនកិច្ចរបស់លោកអូបាម៉ានៅក្នុងតំបន់បាល់ទិកនេះ គឺជាសារព្រមានច្បាស់ៗមួយដល់លោកពូទីនកុំឲ្យគិតថារុស្ស៊ីអាចធ្វើអ្វីៗតាមចិត្តនៅក្នុងតំបន់បាល់ទិកបាន ដូចអ្វីដែលរុស្ស៊ីកំពុងធ្វើនៅអ៊ុយក្រែន ដែលមិនមែនជាសមាជិកអង្គការអូតង់។
គួរបញ្ជាក់ថា អេស្តូនី លីទុយអានី និងឡេតូនី មានប្រវត្តិ និងស្ថានភាពស្រដៀងគ្នានឹងអ៊ុយក្រែនដែរ ពោលគឺជាប្រទេសអតីតសហភាពសូវៀតជាមួយនឹងរុស្ស៊ីដូចគ្នា ហើយបច្ចុប្បន្នជាប្រទេសដែលសម្បូរទៅដោយប្រជាជនដើមកំណើតរុស្ស៊ីដូចគ្នា។
ដូច្នេះហើយបានជានៅពេលដែលគេឃើញរុស្ស៊ីចូលឈ្លានពានអ៊ុយក្រែនដោយយកលេសថាចូលមកជួយការពារប្រជាជនដើមកំណើតរុស្ស៊ី ហើយរហូតដល់កាត់យកតំបន់គ្រីមេចេញពីអ៊ុយក្រែនយកទៅដាក់បញ្ចូលជាទឹកដីរុស្ស៊ី ប្រទេសនៅបាលទិក ដែលជាកូនប្រទេសតូចៗមានប្រជាជនត្រឹមចន្លោះពីជាង១លាននាក់ ទៅ៣លាននាក់ មានក្តីព្រួយបារម្ភខ្លាចលោកពូទីនប្រើតាក់ទិកដដែលនេះ ដើម្បីចូលឈ្លានពានខ្លួន។
គេនៅចាំបានថា កាលពី៧៥ឆ្នាំមុន រុស្ស៊ី ក្រោមការដឹកនាំរបស់ស្តាលីន និងដោយមានការឃុបឃិតគ្នាជាមួយហ៊ីត្លែរ ធ្លាប់បានចូលឈ្លានពានប្រទេសនៅតំបន់បាល់ទិកម្តងរួចមកហើយ ដោយបានកាត់យកប្រទេសទាំង៣ យកទៅដាក់បញ្ចូលក្នុងសហភាពសូវៀត។ ដូច្នេះ សកម្មភាពរបស់លោកពូទីននៅអ៊ុយក្រែននាពេលបច្ចុប្បន្ននេះ កំពុងតែដាស់ស្មារតីប្រទេសនៅតំបន់បាល់ទិកឲ្យនឹកឃើញឡើងវិញនូវប្រវត្តិជូរចត់នេះ។
អេស្តូនី លីទុយអានី និងឡេតូនី ដែលចូលជាសមាជិកអង្គការអូតង់ កាលពីឆ្នាំ២០០៤ រំពឹងថានឹងអាចទទួលបាននូវការការពារពីសំណាក់ប្រទេសសម្ព័ន្ធមិត្ត ស្របទៅតាមមាត្រា ៥ នៃសន្ធិសញ្ញាអូតង់ (សន្ធិសញ្ញាក្រុងវ៉ាស៊ីងតោន ថ្ងៃទី៤ មេសា ១៩៤៩)។ មាត្រា ៥នេះមានខ្លឹមសារថា ការវាយប្រហារទៅលើប្រទេសជាសមាជិកណាមួយ គឺស្មើនឹងការវាយប្រហារទៅលើគ្រប់ប្រទេសទាំងអស់របស់អូតង់ ហើយក្នុងករណីនេះ គ្រប់ប្រទេសជាសមាជិកទាំងអស់មានកាតព្វកិច្ចចូលទៅជួយការពារប្រទេសសមាជិក ដែលទទួលរងនូវការវាយប្រហារពីខាងក្រៅនេះ។
ក៏ប៉ុន្តែ ក្នុងពេលជាមួយគ្នា ប្រទេសទាំង៣នៅបាល់ទិកនេះក៏មានការបារម្ភផងដែរខ្លាចប្រទេសសម្ព័ន្ធមិត្តអូតង់ ជាពិសេស សហរដ្ឋអាមរិកចេះតែចង់បញ្ចៀសមិនចង់មានសង្រ្គាមជាមួយរុស្ស៊ី ហើយអាចសុខចិត្តលះបង់ប្រទេសតូចៗទាំង៣នេះទៅក្នុងដៃលោកពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ