ឥណ្ឌា-ប៉ាគីស្ថាន៖ រង្វាន់ណូបែលសន្តិភាពក្រោមស្នូរកាំភ្លើង
ចុះផ្សាយនៅថ្ងៃ៖
ស្តាប់ - ០៣:៥៤
រង្វាន់ណូបែលសន្តិភាពឆ្នាំ២០១៤នេះ ត្រូវបានគេសម្រេចផ្តល់ឲ្យមនុស្សពីរនាក់ គឺយុវតីម៉ាឡាឡាមកពីប៉ាគីស្ថាន និងលោកកៃឡាស្ហ សត្យាធី មកពីឥណ្ឌា។ ក៏ប៉ុន្តែ រង្វាន់ណូបែលសន្តិភាពនេះហាក់ដូចជាមិនបាននាំមកនូវពន្លឺនៃសុខសន្តិភាព រវាងប្រទេសជាគូសត្រូវចាស់ឆ្នាំទាំងពីរនេះទេ។ កងទ័ពនៃប្រទេសមហាអំណាចនុយក្លេអ៊ែរទាំងពីរនេះនៅតែបន្តប្រឈមមុខដាក់គ្នា នៅក្នុងតំបន់កាស្មៀរ ដោយឥតស្រាកស្រាន្ត អស់រយៈពេលជាច្រើនថ្ងៃមកហើយ។
ជាទូទៅ រង្វាន់ណូបែលសន្តិភាព គឺជារង្វាន់ដែលត្រូវបានគេឲ្យតម្លៃខ្ពស់បំផុត នៅក្នុងចំណោមរង្វាន់ផ្សេងៗទៀត ហើយរង្វាន់ណូបែលសន្តិភាពនៅឆ្នាំ២០១៤នេះ គឺជារង្វាន់ដែលពោរពេញទៅដោយនិមិត្តរូបគួរឲ្យធ្វើការកត់សម្គាល់។
ក្រៅពីអាយុរបស់យុវតីម៉ាឡាឡា ដែលជាជ័យលាភីណូបែលវ័យក្មេងជាងគេក្នុងប្រវត្តិសាស្រ្ត ចំណុចដែលគួរឲ្យចាប់អារម្មណ៍មួយទៀត គឺនៅត្រង់ថា មនុស្សទាំងពីររូបដែលទទួលរង្វាន់ណូបែលសន្តិភាពរួមគ្នា នៅឆ្នាំ២០១៤នេះ គឺម្នាក់កាន់សាសនាអ៊ីស្លាម ម្នាក់ទៀតកាន់សាសនាហិណ្ឌូ ម្នាក់មកពីប៉ាគីស្ថាន ហើយម្នាក់ទៀតមកពីឥណ្ឌា ប្រទេសពីរដែលសុទ្ធសឹងជាមហាអំណាចនុយក្លេអ៊ែរ និងជាគូសត្រូវចាស់ឆ្នាំនឹងគ្នា។
បណ្តាអ្នកជំនាញខាងទំនាក់ទំនងឥណ្ឌា-ប៉ាគីស្ថាន សុទ្ធតែនាំគ្នាលើកឡើងថា ការសម្រេចផ្តល់រង្វាន់ណូបែលសន្តិភាពរួមគ្នាដល់យុវតីម៉ាឡា និងលោកសត្យាធី គឺជាការបង្ហាញឲ្យឃើញអំពីចេតនារបស់សហគមន៍អន្តរជាតិ ដែលចង់ជំរុញឲ្យឥណ្ឌា និងប៉ាគីស្ថានខិតខំខ្នះខ្នែងបន្ថែមទៀត ដើម្បីសម្រេចឲ្យបាននូវសុខសន្តិភាពនៅក្នុងតំបន់។
យុវតីម៉ាឡាឡាក៏ទំនងជាបានមើលឃើញយ៉ាងច្បាស់ដែរ អំពីនិមិត្តរូបនៃរង្វាន់ណូបែលសន្តិភាពឆ្នាំនេះ។ ហេតុដូច្នេះហើយបានជានៅថ្ងៃដែលគណៈកម្មាធិការណូបែលប្រកាសលទ្ធផលរង្វាន់ណូបែលសន្តិភាព កាលពីថ្ងៃសុក្រ នាងបានប្រកាសអញ្ជើញមេដឹកនាំប៉ាគីស្ថាន និងឥណ្ឌា ឲ្យទៅចូលរួមក្នុងពិធីប្រគល់រង្វាន់ណូបែលសន្តិភាពដល់រូបនាង និងលោកកៃឡាស្ហ សត្យាធី ដើម្បីជានិមិត្តរូបនៃការបោះជំហានទៅរកការផ្សះផ្សាគ្នា។
ក៏ប៉ុន្តែ គ្រាន់តែប៉ុន្មានម៉ោងប៉ុណ្ណោះ ក្រោយពីការប្រកាសអញ្ជើញរបស់យុវតីម៉ាឡាឡា ការប៉ះទង្គិចគ្នាដោយអាវុធបានកើតមានឡើងសាជាថ្មី រវាងកងទ័ពប៉ាគីស្ថាន និងកងទ័ពឥណ្ឌា នៅក្នុងតំបន់ជម្លោះកាស្មៀរ។ ស្នូរអាវុធដែលជាការបញ្ជាក់ឲ្យឃើញថា សុខសន្តិភាព រវាងឥណ្ឌា និងប៉ាគីស្ថាននៅតែជាស្រមោលព្រាលៗ ដោយគ្មានពន្លឺ ហើយរង្វាន់ណូបែលសន្តិភាពរួមគ្នារបស់យុវតីម៉ាឡាឡា និងលោកកៃឡាស្ហ សត្យាធី ហាក់ដូចជាគ្មានឥទ្ធិពលក្នុងការកាត់បន្ថយអារិភាព រវាងប្រទេសទាំងពីរនេះទេ។
នៅក្នុងពេលបច្ចុប្បន្ននេះ ចំណុចក្តៅនៃជម្លោះ រវាងឥណ្ឌា និងប៉ាគីស្ថាន គឺជម្លោះព្រំដែន នៅតំបន់កាស្មៀរ ដែលកងទ័ពទាំងពីរបានបាញ់ផ្លោងដាក់គ្នាទៅវិញទៅមកជាប់ជាប្រចាំ ចាប់តាំងពីសប្តាហ៍មុន បណ្តាលឲ្យជនស៊ីវិលយ៉ាងតិច ២០នាក់ត្រូវបាត់បង់ជីវិត ហើយប្រជាជនរាប់ពាន់នាក់ផ្សេងទៀត ទាំងខាងប៉ាគីស្ថាន និងខាងឥណ្ឌា នាំគ្នារត់ភៀសខ្លួនចោលផ្ទះសម្បែង។
កាលពីខែឧសភា ដំណើរការផ្សះផ្សា រវាងឥណ្ឌា និងប៉ាគីស្ថាន ហាក់ដូចជាមានពន្លឺឡើង នៅក្រោយពេលដែលលោកណារិនដ្រា ម៉ូឌី នាយករដ្ឋមន្រ្តីថ្មីរបស់ឥណ្ឌា បានអញ្ជើញលោកណាវាហ្ស ស្ហារីហ្វ នាយករដ្ឋមន្រ្តីប៉ាគីស្ថានឲ្យទៅចូលរួមក្នុងពិធីស្បថកាន់តំណែងរបស់លោក។ ក៏ប៉ុន្តែ មិនយូរប៉ុន្មានក្រោយមក ភាពតានតឹងក៏ចាប់ផ្ទុះឡើងវិញ ហើយសូម្បីតែកិច្ចចរចាសន្តិភាព ដែលប្រទេសទាំងពីរគ្រោងបើកធ្វើ កាលពីខែមុន ក៏ត្រូវបានឥណ្ឌាប្រកាសលុបចោលដែរ ក្រោយពីរដ្ឋាភិបាលប៉ាគីស្ថានបញ្ជូនតំណាងឲ្យទៅជួបក្រុមឧទ្ទាមផ្តាច់ខ្លួននៅកាស្មៀរ។
ចាប់ពីពេលនោះមក គេសង្កេតឃើញថា លោកណារិនដ្រា ម៉ូឌី ដែលត្រូវបានគេស្គាល់ថាជាអ្នកនយោបាយជាតិនិយមខ្លាំងនោះ បានចាប់ផ្តើមដំឡើងសំឡេងដាក់ប៉ាគីស្ថានកាន់តែខ្លាំងឡើង ពីមួយថ្ងៃទៅមួយថ្ងៃ។ កាលពីសប្តាហ៍មុន លោកម៉ូឌី បានធ្វើការសង្ខេបដោយខ្លីនូវជំហររបស់ឥណ្ឌាចំពោះប៉ាគីស្ថានត្រឹមពាក្យមួយឃ្លាថា ឥណ្ឌានឹងបន្តចរចាដោយរក្សាម្រាមដៃជាប់លើកៃកាំភ្លើង។
គួរបញ្ជាក់ឡើងវិញថា ឥណ្ឌា ដែលមានប្រជាជនភាគច្រើនកាន់សាសនាហិណ្ឌូ និងប៉ាគីស្ថាន ដែលមានប្រជាជនភាគច្រើនកាន់សាសនាអ៊ីស្លាម កាលដើមឡើយ គឺជាប្រទេសតែមួយ ក៏ប៉ុន្តែ ត្រូវបានពុះចែកជាប្រទេសពីរផ្សេងគ្នា ចាប់តាំងពីឆ្នាំ១៩៤៧ ក្រោយពីទទួលឯករាជ្យពីចក្រភពអង់គ្លេស។ ចាប់ពីពេលនោះមក ប្រទេសទាំងពីរបានក្លាយជាគូសត្រូវស៊ីសាច់ហុតឈាមនឹងគ្នា រហូតផ្ទុះជាសង្រ្គាមដល់ទៅ ៣លើក។
និយាយជារួម ជម្លោះរវាងឥណ្ឌា និងប៉ាគីស្ថាន គឺជាជម្លោះ ដែលកើតចេញពីការមិនទុកចិត្តគ្នា និងភាពជាគូសត្រូវ ដែលបានចាក់ឫសយ៉ាងជ្រៅអស់រយៈពេលជាងកន្លះសតវត្សរ៍មកហើយ។ ភាពជាគូសត្រូវនេះទំនងជានឹងមិនអាចសាបរលាបទៅវិញ ដោយសារតែរង្វាន់ណូបែលសន្តិភាពជានិមិត្តរូបមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ