រដ្ឋសភាជ្រើសតាំងសមាជិកព្រឹទ្ធសភានីតិកាលទី៣ ចំនួន២រូប
រដ្ឋសភានឹងធ្វើការជ្រើសតាំងសមាជិកព្រឹទ្ធសភានីតិកាលទី៣ ចំនួន២រូប ក្នុងកិច្ចប្រជុំរដ្ឋសភានីតិកាលទី៤របស់ខ្លួន ដែលប្រព្រឹត្តទៅនៅថ្ងៃចន្ទស្អែកនេះ។ បេក្ខជនចំនួន១៣រូប មកពីគណបក្សប្រជាជនកម្ពុជា គណបក្សសមរង្ស៊ី គណបក្សហ្វ៊ុនស៊ិនប៉ិច និងគណបក្សនរោត្តមរណឫទ្ធិ ស្ថិតនៅក្នុងបញ្ជីបេក្ខជន ក្នុងការជ្រើសរើសនោះ។
ចុះផ្សាយនៅថ្ងៃ៖
ស្តាប់ - ០១:៤០
សមាជិករដ្ឋសភាត្រៀមខ្លួនជាស្រេចក្នុងការជ្រើសតាំងសមាជិកព្រឹទ្ធ សភានីតិកាលទី៣ ចំនួន២រូប ក្នុងចំណោមបេក្ខជនឈរឈ្មោះចំនួន១៣រូប មកពីគណបក្សដែលមានអាសនៈក្នុងរដ្ឋសភា។ នេះបើតាមការឲ្យដឹងពីតំណាងរាស្រ្តគណបក្សកាន់អំណាច។
លោក ជាម យៀប តំណាងរាស្រ្តគណបក្សប្រជាជនកម្ពុជា បានប្រាប់វិទ្យុបារំាងអន្តរជាតិនៅថ្ងៃអាទិត្យនេះថា សភាជាតិនឹងបើកកិច្ចប្រជុំពេញអង្គ នីតិកាលទី៤ នៅថ្ងៃចន្ទស្អែក ដើម្បីជ្រើសតាំងសមាជិកព្រឹទ្ធសភានីតិកាលទី៣ ចំនួន២រូប។
បេក្ខជនចំនួន១៣រូបមកពីគណបក្សប្រជាជនកម្ពុជា គណបក្សសមរង្ស៊ី គណបក្សហ្វ៊ុនស៊ិនប៉ិច និងគណបក្សនរោត្តមរណឫទ្ធិ ស្ថិតនៅក្នុងបញ្ជីឈ្មោះជ្រើសតាំង។
លោក ជាម យៀប មិនច្បាស់ថាបេក្ខជនមកពីគណបក្សនីមួយៗ មានចំនួនប៉ុន្មាននាក់ឲ្យប្រាកដនោះទេ តែថា រដ្ឋសភានឹងប្រកាន់ជំហរសំឡេង៥០បូក១ ក្នុងការជ្រើសរើសនោះ ។
ព្រឹទ្ធសភានីតិកាលទី៣ មានចំនួន៦១អាសនៈ។ តាមលទ្ធផលនៃការបោះឆ្នោតជ្រើសរើសសមាជិកព្រឹទ្ធសភា កាលពីថ្ងៃទី ២៩ ខែមករា កន្លងមក គណបក្សប្រជាជនកម្ពុជាទទួលបាន៤៦អាសនៈ។ រីឯគណបក្សសមរង្ស៊ីទទួលបាន១១អាសនៈ។ ដោយឡែក៤អាសនៈដែល នៅសល់ ត្រូវតែងតាំងដោយរដ្ឋសភា និងដោយព្រះមហាក្សត្រ។
ព្រះមហាក្សត្រខ្មែរ បានជ្រើសតាំងសមាជិកព្រឹទ្ធសភាអាណិត្តថ្មី ចំនួន២រូបរួចមកហើយគឺលោក អ៊ុំ ម៉ាណូរិន និងលោក អៀវ បណ្ណាការ ជាអតីតសមាជិកព្រឹទ្ធសភាចាស់ ក្នុងអាណត្តិទី២ ។ ការជ្រើសតាំងសមាជិកព្រឹទ្ធសភា ដោយរដ្ឋសភានៅថ្ងៃស្អែក ជាការបង្គ្រប់អាសនៈរបស់ព្រឹទ្ធសភា ដែលនៅសល់ចំនួន២អាសនៈទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ