ក្រុមបុរសស្រលាញ់បុរសនៅតែជាក្រុមប្រឈមមុខខ្ពស់ និងការឆ្លងមេរោគអេដស៍
ទិន្នន័យពីការសិក្សានៅក្នុងឆ្នាំ ២០១៤ បានសន្និដ្ឋានថា ក្រុមបុរសស្រលាញ់បុរសនៅតែជាក្រុមប្រឈមមុខខ្ពស់ ដោយមានអត្រាប្រេវ៉ាឡង់មេរោគអេដស៍ចំនួន ២,៣%។ ដោយឡែកអត្រាប្រេវ៉ាឡង់មេរោគស៍ក្នុងចំណោមស្ត្រីមានផ្ទៃពោះ បានធ្លាក់ចុះពី ០,៤៨% នៅក្នុងឆ្នាំ ២០១០ មកត្រឹម ០,២៨% ក្នុងឆ្នាំ ២០១៤។ នេះបើយោងតាមការបង្ហាញលទ្ធផលសិក្សាស្រាវជ្រាវរបស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ នៃក្រសួងសុខាភិបាល និងគំរោង Flagship នៅថ្ងៃទី ៤ សីហានេះ នៅឯសណ្ឋាគារភ្នំពេញ។
ចុះផ្សាយនៅថ្ងៃ៖
មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ រួមជាមួយគំរោង Flagship ដែលក្នុងនោះរួមមានអង្គការ KHANA, FHI 360 និង PSI/PSK បានរៀបចំកិច្ចប្រជុំផ្សព្វផ្សាយលទ្ធផលនៃការអង្កេតអត្រាប្រេវ៉ាឡង់មេរោគអេដស៍ ក្នុងចំណោមស្ត្រីមកពិនិត្យផ្ទៃពោះ ក្រុមបុរសស្រលាញ់បុរស ការប្រព្រឹត្តផ្លូវភេទ និងការប៉ាន់ស្មានចំនួនបុរសស្រលាញ់បុរសនៅប្រទេសកម្ពុជានៅក្នុងឆ្នាំ ២០១៤។
ការសិក្សាបានបង្ហាញថាក្រុមបុរសស្រលាញ់បុរសនៅតែជាក្រុមដែលប្រឈមមុខខ្ពស់ ដោយឃើញថា ៦០% នៃអ្នកចូលរួមមានដៃគូរួមភេទ ចាប់ពីពីរនាក់ឬ ច្រើនជាងនេះ ក្នុងរយៈពេលមួយខែចុងក្រោយនៃការសិក្សា ហើយ ៣០% នៃពួកគេ បានប្រើប្រាស់ស្រោមអនាម័យមិនជាប់លាប់នោះទេ នៅពេលដែលរួមភេទ។
បើតាមលទ្ធផលនៃការអង្កេត របស់លោកវេជ្ជបណ្ឌិត យ៉ី ស៊ីយ៉ាន នាយកមជ្ឈមណ្ឌលស្រាវជ្រាវសុខភាពប្រជាជនអង្គការខាណា បានបង្ហាញថាមិនត្រឹមតែនៅកម្ពុជានោះទេ ប៉ុន្តែនៅទូទាំងពិភពលោក គឺក្រុមបុរសស្រលាញ់បុរសមានការប្រឈមនឹងការឆ្លងមេរោគអេដស៍ និងកាមរោគខ្លាំងជាងគេ ដោយសារតែពួកគេទទួលបានអន្តរាគមន៍តិច និងមានការយល់ដឹងតិចតួចទាក់ទងនឹងសុខភាពផ្លូវភេទ ហើយមិនត្រឹមតែប៉ុណ្ណោះពួកគេច្រើនតែលាក់បាំងខ្លួនឯង និងមានការរើសអើងនៅក្នុងសង្គម។
តាមការសិក្សាបានបង្ហាញថាចំនួនបុរសស្រលាញ់បុរសនៅកម្ពុជាមានចំនួន ៣ម៉ឺន៨៩១នាក់។ ភាគច្រើនគឺមាននៅទីប្រជុំជន ហើយកន្លែងដែលពួកគេណាត់ជួបគ្នាមាននៅតាមផ្លូវសួនមាត់ទន្លេ ក្លឹបឌីស្កូ និងផ្ទះឯកជន។
ដោយឡែកតាមការសិក្សារបស់លោកវេជ្ជបណ្ឌិត មុន ផល្គុន មកពីមជ្ឈមណ្ឌលជាតិប្រយុទ្ធ នឹងជំងឺអេដស៍ សើស្បែក និងកាមរោគ បានបង្ហាញថាអ្នកដែលមានចំណេះដឹងខ្ពស់ មានអត្រាឆ្លងមេរោគអេដស៍តិចជាងអ្នកដែលមានចំណេះដឹងទាប ហើយអ្នកដែលឆ្លងមេរោគអេដស៍ច្រើនជាងគេនោះ គឺក្រុមអ្នករកស៊ីផ្លូវភេទ បន្ទាប់មកគឺអ្នករកស៊ីផ្នែកធ្វើសក់និងផាត់មុខ និងបន្ទាប់មកទៀតគឺអ្នកធ្វើការនៅតាមអង្គការនានា និងមានអ្នកប្រកបមុខរបរផ្សេងៗជាបន្តបន្ទាប់ទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ