អ៊ីស្រាអែល៖លោកនេតាន់យ៉ាហ៊ូសម្ពោធតំបន់អាណានិគមថ្មីដោយដាក់ឈ្មោះតាមលោកត្រាំ
នៅថ្ងៃអាទិត្យ ទី១៦ មិថុនា និងខុសពីទម្លាប់សព្វមួយដង នាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូបានបើកកិច្ចប្រជុំវិសាមញ្ញគណៈរដ្ឋមន្រ្តីនៅតំបន់ខ្ពង់រាបហ្គោឡានដោយមានវត្តមានឯកអគ្គរដ្ឋទូតអាមេរិកប្រចាំអ៊ីស្រាអែល។ នាឱកាសនោះ លោកនេតាន់យ៉ាហ៊ូបានសម្ពោធតំបន់អាណានិគមថ្មីមួយដោយដាក់ឈ្មោះតាមប្រធានាធិបតីអាមេរិកលោកដូណាល់ ត្រាំហៅថា « រ៉ាម៉ាត ត្រាំ »។ ជម្រើសដាក់តាមឈ្មោះលោកត្រាំមិនមែនជារឿងចៃដន្យទេ ព្រោះលោកនេតាន់យ៉ាហ៊ូចង់អរគុណប្រធានាធិបតីអាមេរិកដែលបានប្រកាសក្នុងថ្ងៃទី២៥ មីនាដោយទទួលស្គាល់តំបន់ខ្ពង់រាបហ្គោឡានជាអធិបតេយ្យរបស់អ៊ីស្រាអែល។ គួររម្លឹកថា តំបន់ខ្ពង់រាបហ្គោឡានត្រូវបានអ៊ីស្រាអែលវាយយកពីប្រទេសស៊ីរីនៅក្នុងសង្រ្គាម ៦ថ្ងៃកាលពីឆ្នាំ ១៩៦៧ និងបានប្រកាសជាដែនដីខ្លួនក្នុងឆ្នាំ ១៩៨១។ ក្រៅពីដាក់តំបន់អាណានិគមថ្មីនៅតំបន់ខ្ពង់រាបហ្គោឡាន លោកនេតាន់យ៉ាហ៊ូដែលបានចាត់ទុកលោកត្រាំជាមហាមិត្តរបស់អ៊ីស្រាអែលក៏បានឆ្លៀតអរគុណជាថ្មីដល់លោកត្រាំដែលបានទទួលស្គាល់ហ្សេរ៉ុយសាឡិមជាទីក្រុងផ្តាច់មុខរបស់អ៊ីស្រាអែលដែរ។
ចុះផ្សាយនៅថ្ងៃ៖
ស្តាប់ - ០១:១៧
« គឺជាថ្ងៃប្រវត្តិសាស្រ្តមួយ។ យើងនឹងធ្វើការងារចំនួនពីរ ទី១ យើងនឹងសម្ពោធតំបន់អាណានិគមថ្មីនៅលើតំបន់ខ្ពង់រាបហ្គោឡាន និងទី២ នាឱកាសនោះដែរ យើងគោរពមហាមិត្តរបស់យើងប្រធានាធិបតីដូណាល់ ត្រាំដែលថ្មីៗកន្លងទៅ បានទទួលស្គាល់តំបន់ខ្ពង់រាបហ្គោឡានជាអធិបតេយ្យរបស់ប្រទេសអ៊ីស្រាអែល។
លោកត្រាំជាថ្នាក់ដឹកនាំបរទេសទី១ ដែលបានធ្វើយ៉ាងដូចនេះ។ បន្ទាប់មក លោកត្រាំបានបំបាត់ចោលនូវរូបភាពនៃការលាក់ពុតដោយបានទទួលស្គាល់ហ្សេរ៉ុយសាឡិមជាទីក្រុងក្រុងរបស់អ៊ីស្រាអែល និងបានរើស្ថានទូតអាមេរិកទៅដាក់នៅទីនោះ។
លោកត្រាំបានដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥ ហើយឥឡូវនេះទៀត លោកត្រាំបានចេញមុខប្រឆាំងនឹងការគំរាមកំហែងរបស់អ៊ីរ៉ង់នៅក្នុងឈូងសមុទ្រពែក្ស។ យើងនឹងបន្តការអភិវឌ្ឍន៍ និងសាងសង់នៅតំបន់ខ្ពង់រាបហ្គោឡានសម្រាប់ពលរដ្ឋរបស់យើងគ្រប់រូប ជាជនជាតិជ្វីហ្វ និងមិនជ្វីហ្វ ហើយដើម្បីអនាគតប្រទេសរបស់យើង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ