អេហ្ស៊ីប៖អឺរ៉ុប និងអារ៉ាប់បញ្ជាក់ពីភាពចាំបាច់ក្នុងការដោះស្រាយជម្លោះនៅមជ្ឈិមបូព៌ា តែចៀសវាងប្រធានរឿងចម្រូងចម្រាស
ចុះផ្សាយនៅថ្ងៃ៖
ស្តាប់ - ០៤:៣០
ជំនួបកំពូលរវាងសហភាពអឺរ៉ុប និងសម្ព័ន្ធអារ៉ាប់រយៈពេលជាង ១ថ្ងៃក្នុងប្រទេសអេហ្ស៊ីបបានបិទបញ្ចប់នៅថ្ងៃចន្ទ ទី២៥ កុម្ភៈ។ ជំនួបកំពូលនេះបានចូលរួមដោយប្រមុខរដ្ឋ និងប្រមុខរដ្ឋាភិបាលអឺរ៉ុប និងអារ៉ាប់ប្រមាណជា ៤០រូប។ មានសំណុំរឿងជាច្រើននៅក្នុងតំបន់ដែលជំនួបកំពូលបានលើកទៅជជែករួមមានវិបត្តិនៅក្នុងប្រទេសស៊ីរី លីប៊ី ឬមួយយេម៉ែន តែមានប្រធានរឿងរសើបខ្លះត្រូវបានចៀសវាង។ ទន្ទឹមគ្នានេះ និងអ្វីដែលសហភាពអឺរ៉ុបចង់បាននៅចំពោះមុខ គឺការពង្រឹងកិច្ចសហប្រតិបត្តិការជាមួយបណ្តាប្រទេសអារ៉ាប់ដើម្បីបង្កើនតួនាទីរបស់អឺរ៉ុបនៅក្នុងតំបន់ប្រឈមនឹងប្រទេសរុស្ស៊ី និងចិន ខណៈពេលដែលសហរដ្ឋអាមេរិកត្រៀមដកខ្លួនចេញ។
នៅក្នុងជំនួបកំពូលលើកទី១ និងក្នុងរយៈពេលប្រមាណជា ២៤ម៉ោង មានសំណុំរឿងជាច្រើនដែលសហភាពអឺរ៉ុប និងសម្ព័ន្ធអារ៉ាប់បានលើកទៅនិយាយ ពិសេសជម្លោះដែលកំពុងបន្តគ្រប់ដណ្តប់នៅក្នុងតំបន់មជ្ឈិមបូព៌ាដោយចាប់ផ្តើមពីវិបត្តិនយោបាយនៅក្នុងប្រទេសស៊ីរី លីប៊ី ឬមួយប្រទេសយេម៉ែន។ ទាំងនេះមិនភ្លេចនិយាយទេពីភាពចាំបាច់ក្នុងការសម្រេចឲ្យបាននូវដំណោះស្រាយបង្កើតរដ្ឋពីររួមរស់ក្បែរគ្នារវាងអ៊ីស្រាអែល និងប៉ាឡេស្ទីន។ តែភាគីទាំងពីរហាក់បានទទួលស្គាល់ដូចគ្នាថា ជំនួបលើកទី១ និងក្នុងរយៈពេល ២៤ម៉ោងពិតជាមិនអាចរកដំណោះស្រាយសម្រាប់បញ្ហាដ៏ច្រើនសម្បើមបានទេ ពោលគឺត្រូវឲ្យមានការរៀបចំការជួបជុំដូចពេលនេះឲ្យបានញឹកញាប់នាពេលខាងមុខ។
ពិតណាស់ ជំនួបកំពូលរវាងសហភាពអឺរ៉ុប និងសម្ព័ន្ធអារ៉ាប់បានធ្វើឡើង ក្នុងពេលដែលតំបន់មជ្ឈិមបូព៌ាបាន និងកំពុងបន្តគ្រប់ដណ្តបដោយបញ្ហាច្រើនរាប់មិនអស់។ តែគេត្រូវហ៊ាននិយាយថា មានបញ្ហាខ្លះក៏អឺរ៉ុប និងអារ៉ាប់មើលឃើញ និងយល់ឃើញមិនដូចគ្នាដែរ។ មហាក្សត្រអារ៉ាប៊ីសាអូឌីតសាលម៉ានបានលើកឡើងពីវិបត្តិនៅយេម៉ែន និងបានឆ្លៀតបរិហារលើការលូកដៃរបស់ប្រទេសអ៊ីរ៉ង់។ គួររម្លឹកថា អារ៉ាប៊ីសាអូឌីតបានដឹកនាំកម្លាំងសម្ព័ន្ធមិត្តអារ៉ាប់វាយប្រហារលើប្រទេសយេម៉ែនតាំងពីឆ្នាំ ២០១៥។ ចំណែកអគ្គលេខាធិការសម្ព័ន្ធអារ៉ាប់ដែលបាននិយាយពីវិបត្តិនៅស៊ីរី លីប៊ី និងនៅយេម៉ែនមិនបានបរិហារចំប្រទេសណាមួយទេ តែគ្រាន់បញ្ជាក់ពីការលូកដៃរបស់បរទេសដែលលោកចង់សំដៅលើអ៊ីរ៉ង់នៅយេម៉ែន និងប្រទេសតួកគីនៅស៊ីរី។
ចំណែកសហភាពអឺរ៉ុបដែលហាក់មិនយល់ស្របតាមការយល់ឃើញរបស់អារ៉ាប៊ីសាអូឌីត និងអគ្គលេខាធិការសម្ព័ន្ធអារ៉ាប់បានត្រឹមបង្ខំចិត្តបញ្ជាក់ពីជំហររួមរវាងសហភាពអឺរ៉ុប និងសម្ព័ន្ធអារ៉ាប់។ លោកស្រីប្រមុខការទូតអឺរ៉ុបហ្វេដេរីកា ម៉ូហ្គេរីនីបានអះអាងពីការចង់ឃើញជំនួបកំពូលជជែកលើគ្រប់សំណុំរឿង តែក្នុងស្មារតីវិជ្ជមាន។ រីឯប្រធានក្រុមប្រឹក្សាអឺរ៉ុបលោកដូណាល់ ទូស្កបានយល់ឃើញថា សហភាពអឺរ៉ុប និងសម្ព័ន្ធអារ៉ាប់ត្រូវចាប់ដៃធ្វើការរួមគ្នាដើម្បីប្រយោជន៍ប្រជាជនក្នុងតំបន់ក្បែរខាងទាំងពីរ និងមិនត្រូវទុកឲ្យតំបន់មួយនេះចូលជ្រៀតជ្រែកពីប្រទេសមហាអំណាចក្នុងលោកមកពីតំបន់ផ្សេងទេ។ ទោះបីជាលោកដូណាល់ ទូស្កមិនបានចង្អុលចំមុខប្រទេសណាមួយក៏ដោយក៏គេដឹងថា លោកចង់និយាយសំដៅលើសហរដ្ឋអាមេរិក រុស្ស៊ី និងប្រទេសចិន។
រុស្ស៊ី និងចិនដែលកំពុងញញឹមបិទមាត់មិនជិត បន្ទាប់ពីប្រធានាធិបតីអាមេរិកលោកដូណាល់ ត្រាំបានប្រកាសដកទ័ពអាមេរិកចេញពីទឹកដីស៊ីរី។ ទីក្រុងប៉េកាំង និងមូស្គូយល់មិនច្រឡំទេថា អស់ពីខ្លាអាមេរិកទៅ សមរភូមិនៅស៊ីរីជានំដែលត្រូវចែកគ្នាពាក់កណ្តាលម្នាក់រវាងខ្លាចិន និងខ្លារុស្ស៊ី។ នេះហើយជាអ្វីដែលសហភាពអឺរ៉ុបមិនចង់ឃើញ និងកំពុងបារម្ភខ្លាំង ហើយកំពុងល្អូកល្អឺនអូសទាញសម្ព័ន្ធអារ៉ាប់ឲ្យជួយគាំទ្រខ្លួនពេលនេះ។ អ្វីដែលសហភាពអឺរ៉ុបចង់បានតាមរយៈជំនួបកំពូលអឺរ៉ុប អារ៉ាប់ពេលនេះ គឺពង្រឹងកិច្ចសហប្រតិបត្តិការជាមួយសម្ព័ន្ធអារ៉ាប់ដើម្បីបញ្ជាក់ពីជំហរ និងបង្កើនឥទ្ធិពលរបស់អឺរ៉ុបនៅតំបន់មជ្ឈិមបូព៌ា។ តំបន់មជ្ឈិបូព៌ាដែលធ្លាប់ជាដែនដីផ្តាច់មុខរបស់សហរដ្ឋអាមេរិកនាពេលកន្លងមក។
តែដើម្បីអាចឈានទៅដល់ចំណុចនេះបាន និងដើម្បីបញ្ជៀសបរិយាកាសអាប់អួរនៅក្នុងជំនួបកំពូល អឺរ៉ុប និងអារ៉ាប់បានព្យាយាម ឬបង្ខំចិត្តនិយាយសើរៗលើសំណុំរឿងរសើបៗ ឬមិនបានលើកយកទៅនិយាយតែម្តង ដូចករណីសិទ្ធិមនុស្ស និងវាសនាអ្នកទោសនយោបាយក្នុងប្រទេសអេហ្ស៊ីប ឬមួយករណីឃាតកម្មសម្លាប់អ្នកកាសែតជនជាតិអារ៉ាប៊ីសាអូឌីតលោកខាហ្សូហ្ស៊ីក្នុងស្ថានកុងស៊ុលអារ៉ាប៊ីសាអូឌីតនៅប្រទេសតួកគីជាដើម។ ទន្ទឹមគ្នានេះ មានសំណុំរឿងខ្លះក៏ត្រូវបានអឺរ៉ុបបន្តបញ្ជាក់ជាថ្មីនូវជំហររបស់ខ្លួនដូចករណីវិបត្តិស៊ីរីដែលអឺរ៉ុបធ្លាប់និយាយថា បើគ្មានរដ្ឋាភិបាលអន្តរកាលបង្រួបបង្រួមជាតិមួយទេ នោះអឺរ៉ុបនឹងមិនចូលរួមកសាងប្រទេសស៊ីរីឡើងវិញឡើយ។ ទាក់ទងនឹងបញ្ហាជនអន្តោប្រវេសន៍ដែលភៀសខ្លួនតាមសមុទ្រមេឌីទែរ៉ាណេ ជំនួបកំពូលបានត្រឹមបញ្ជាក់ពីក្តីកង្វល់ និងប្តេជ្ញារួមកម្លាំងគ្នាដើម្បីទប់ស្កាត់។
គ្រប់ភាគីពាក់ព័ន្ធបានយល់ឃើញថា ទោះបីជំនួបកំពូលពេលនេះសម្រេចបានលទ្ធផលស្តួចស្តើងក៏ដោយមិនសំខាន់ទេ អ្វីដែលសំខាន់ គឺការរួមប្រជុំជាមួយគ្នាលើកទី១ ដែលជាចំណុចចាប់ផ្តើមចេញដំណើរថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ