អេមីរ៉ាតអារ៉ាប់រួមបើកស្ថានទូតរបស់ខ្លួន នៅស៊ីរីឡើងវិញ
ចុះផ្សាយនៅថ្ងៃ៖
ស្តាប់ - ០៦:៣០
បន្ទាប់ពីផ្តាច់ទំនាក់ទំនងទ្វេភាគីជាមួយស៊ីរីអស់រយៈពេលជាង៧ឆ្នាំ នៅថ្ងៃព្រហស្បតិ៍ទី ២៧ធ្នូ ២០១៨នេះ អេមីរ៉ាតអារ៉ាប់រួម បានបើកសម្ពោធស្ថានទូតរបស់ខ្លួននៅទីក្រុងដាម៉ាស ឡើងវិញ។ បារ៉ែន ក៏ទំនងជាដើរតាមគន្លងអេមីរ៉ាតអារ៉ាបរួមដែរ។ តើនេះជាសញ្ញាវិជ្ជមានបញ្ជាក់អំពីលទ្ធភាពនៃការវិលទៅរកទំនាក់ទំនងជាធម្មតាឡើងវិញ បណ្តាប្រទេសអារ៉ាប់ផ្សេងទៀតក្នុងតំបន់ ជាមួយនឹងរដ្ឋាភិបាលលោក បាស្ហារ អាល់អាសាដ ? នេះជាដំណើរឆ្ពោះទៅរកការបិទបញ្ចប់ភាពឯការបស់ស៊ីរីឬ ?
ទង់ជាតិអេមីរ៉ាតអារ៉ាបរួម បានបក់វវិចជាថ្មីនៅទឹកដីក្រុងដាម៉ាស។ “ស្ថានទូតរបស់អេមីរ៉ាតប្រចាំក្រុងដាម៉ាស ចាប់មានសកម្មភាពឡើងវិញ” ! នេះបើតាមសេចក្តីថ្លែងការណ៍របស់ក្រសួងការបរទេស។
ប្រឈមនឹងការរីករាលដាលនៃឥទ្ធិពលរបស់អ៊ីរ៉ង់ និងតួកគីក្នុងតំបន់ អេមីរ៉ាតអារ៉ាប់រួម យល់ថា អារ៉ាប់ត្រូវតែមានតួនាទីដ៏ចាំបាច់ ពោលគឺ អេមីរ៉ាតអារ៉ាប់រួម ចង់ធ្វើយ៉ាងណាឱ្យពិភពអារ៉ាបមានសកម្មភាពឡើងវិញ នៅស៊ីរី។ នេះបើតាមប្រសាសន៍របស់លោករដ្ឋមន្ត្រីក្រសួងការបរទេសអេមីរ៉ាត។
ក្រុមប្រទេសអារ៉ាប ចង់រាប់អានស៊ីរី ជាធម្មតាវិញ ?
សេចក្តីសម្រេចចិត្តរបស់អេមីរ៉ាតអារ៉ាប់រួម ត្រលប់មកដាក់ទូតនៅក្រុងដាម៉ាសវិញប្រព្រឹត្តទៅក្នុងខណៈដែលកងកម្លាំងរដ្ឋាភិបាលស៊ីរី គាំទ្រដោយអ៊ីរ៉ង់ និងរុស្ស៊ី ដណ្តើមគ្រប់គ្រងប្រទេសបានមួយភាគធំ (ពីរភាគបី) ហើយបាននិងកំពុងយកឈ្នះលើពួកឧទ្ទាមនិងពួកជីហាត ជាបន្តបន្ទាប់។ ទោះដោយមូលហេតុអ្វីក៏ដោយ ក៏ការភ្ជាប់ទំនាក់ទំនងការទូត និងការបើកស្ថានទូតនៅស៊ីរីឡើងវិញ របស់អេមីរ៉ាតអារ៉ាប់រួម ត្រូវបានគេមើលឃើញថាជាបោះជំហានទៅមុខឆ្ពោះទៅរកការប្រកាន់យកទំនាក់ទំនងជាធម្មតាជាមួយនឹងស៊ីរី។
ការវិលត្រលប់មកដាក់ទូតនៅស៊ីរីនេះ មិនមែនជាវិធានការទោលរបស់អេមីរ៉ាតតែម្នាក់ឯងឡើយ។ ការស្តារទូតឡើងវិញ ក៏ស្ថិតនៅក្នុងក្របខណ្ឌនៃចង់បញ្ចូលស៊ីរីទៅក្នុងក្រុមប្រទេសជាសម្ព័ន្ធអារ៉ាប់វិញផង។
កាលពីចុងឆ្នាំ២០១១ ពិភពអារ៉ាប នាំមុខដោយអេមីរ៉ាត និងប្រទេសក្នុងក្រុមប្រឹក្សានៃកិច្ចសហប្រតិបត្តិការនៅឈូងសមុទ្ទពែក្ស បានចេញសេចក្តីថ្លែងការណ៍រួមបរិហារស៊ីរី និងដាក់ឱ្យនៅឯកា តាមរយៈការផ្តាច់ទំនាក់ទំនាក់ទំនងការទូត ដោយកោះហៅរាជអគ្គរដ្ឋទូតរបស់ខ្លួនត្រលប់ចូលស្រុកវិញទាំងអស់ ដើម្បីប្រឆាំងនឹងទង្វើបង្កាបបាតុករប្រជាធិបតេយ្យរបស់ក្រុងដាម៉ាស។ ក្រោយមកទៀតបណ្តាប្រទេសទាំងអស់នេះ បានថែមទាំងនាំគ្នាគាំទ្រចលនាប្រឆាំងស៊ីរីនិរទេសចេញពីប្រទេស និងក្រុមឧទ្ទាមប្រដាប់អាវុធមួយចំនួនផង។ចំណែកសម្ព័ន្ធអារ៉ាបបានសម្រេចនៅខែវិច្ឆិកា ឆ្នាំ២០១១ ព្យួរឈ្មោះស៊ីរីពីក្រុម។
បើតាមការអះអាងរបស់លោកអគ្គលេខាធិការរងអង្គការសម្ព័ន្ធអារ៉ាប់ កាលពីថ្ងៃទី ២៤ ធ្នូ សេចក្តីសម្រេចព្យួរសមាជិកភាពស៊ីរី លែងទទួលបានការគាំទ្រជាឯកច្ឆន្ទទៀតហើយ ប៉ុន្តែ ក៏ពុំទាន់មានការស្រុះស្រួលគ្នា ឱ្យស៊ីរីវិលចូលក្នុងសម្ព័ន្ធវិញនៅឡើយទេ។
គ្រាន់តែថាអ្វីៗអាចប្តូរផ្លាស់បាន ! នៅក្នុងជំនួបកំពូលប្រចាំឆ្នាំរបស់ខ្លួននៅចុងខែមីនាខាងមុខសម្ព័ន្ធអារ៉ាប់អាចប្តូរជំហររបស់ខ្លួន ! ព្រោះដូចយើងបានឃើញស្រាប់ បន្ទាប់ពី អេមីរ៉ាតអារ៉ាប់រួម បារ៉ែន ក៏បានចេញសេចក្តីថ្លែងការណ៍ភ្លាមដែរ រៀបចំខ្លួនត្រលប់មកដាក់ទូតនៅ ក្រុងដាម៉ាស វិញក្នុងពេលឆាប់ៗនេះ និងបានប្រកាសចង់ពង្រឹងតួនាទីអារ៉ាប់ ដើម្បីរក្សាឯករាជភាព បូរណភាពដែនដីស៊ីរី និងការពារកុំឱ្យមានការជ្រៀតជ្រែកពីក្រៅ។
ម្យ៉ាងវិញទៀត កាលពីថ្ងៃទី ១៦ធ្នូ ស៊ីរី បានទទួលដំណើរទស្សនកិច្ចដ៏ភ្ញាក់ផ្អើលមួយរបស់ប្រធានាធិបតីស៊ូដង់ ក្នុងទឹកដីរបស់ខ្លួន។ នេះជាលើកទីមួយដែលប្រមុខដឹកនាំ ប្រទេសអារ៉ាបធ្វើដំណើរមកជាន់រដ្ឋធានីរបស់ស៊ីរី គិតចាប់តាំងពីឆ្នាំ២០១១មក។ ចំណែកអ្នកទទួលខុសត្រូវជាន់ខ្ពស់ផ្នែកសន្តិសុខជាតិ ក៏បានធ្វើដំណើរទៅជួបសមភាគីនៅក្រុងគែរប្រទេសអេហ្ស៊ីប កាលពីថ្ងៃទី ២២ធ្នូ គម្រប់លើកទីពីរ គិតចាប់តាំងពីឆ្នាំ២០១៦មក។
ស៊ីរី ផ្តើមស្ថាបនាប្រទេសឡើងវិញ
ក្រៅអំពីប្រឹងប្រែងលើសមរភូមិការទូត រដ្ឋាភិបាលស៊ីរីក៏បាននិងកំពុងប្រឹងផ្តល់សន្ទុះ និងរឹតចំណងសេដ្ឋកិច្ចជាមួយបណ្តាប្រទេសជិតខាងក្នុងតំបន់ ក្នុងទស្សនៈវិស័យស្ថាបនាប្រទេសឡើងវិញដែរ។
ក្នុងថ្ងៃដែលអេមីរ៉ាតអារ៉ាប់រួម បើកសម្ពោធស្ថានទូតប្រចាំទីក្រុងដាម៉ាស ក្រុមហ៊ុនអាកាសចរណ៍ឯកជនស៊ីរីក៏បានភ្ជាប់ការហោះហើរ ទៅបរទេស ជាលើកដំបូង (គិតចាប់តាំងពីឆ្នាំ ២០១១)។ ជាការហោះហើរដឹកជញ្ជូនអ្នកដំណើរ ពីដាម៉ាស ទៅ ក្រុងទុយនី របស់ប្រទេសទុយនីស៊ី។ ជើងហោះហើរដែលជាតំណាងនៃសកម្មភាពទេសចរណ៍ មានដឹកទេសចរស៊ីរីចំនួន ១៥០នាក់។
កាលពីខែតុលា ស៊ីរីក៏បានបើកច្រកព្រំដែន Nassib ជាមួយប្រទេសហ្សកដានីឡើងវិញ។ច្រកព្រំដែននេះជាស្នូលពាណិជ្ជកម្មដ៏សកម្មបំផុតរបស់តំបន់។
បន្ទាប់ពីធ្លាក់ក្នុងជ្រោះសង្គ្រាមអស់រយៈពេលជាង៧ឆ្នាំ ពេលនេះសកម្មភាពប្រយុទ្ធក៏ចាប់ថយ កងទ័ពអាមេរិកក៏នឹងត្រូវដកចេញត្រលប់ទៅផ្ទះវិញ ស្ថានភាពជាទូទៅ និងបើតាមគោលការណ៍ហាក់បានធូរស្បើយ ល្មមនឹងស៊ីរីផ្តើមស្ថាបនាប្រទេសឡើងវិញ។ ហើយបើគេជឿតាមសារទ្វីតរបស់លោកដូណាល់ ត្រាំ កាលពីថ្ងៃចន្ទ អារ៉ាប៊ីសាអូឌីត ប្រទេសអារ៉ាបដ៏សំខាន់មួយទៀត ក្នុងតំបន់ បានព្រមព្រៀងចំណាយថវិកា ផ្តល់លុយចាំបាច់សម្រាប់ឱ្យស៊ីរីស្ថាបនាប្រទេស ជំនួសអាមេរិកទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ