ប៉ូលិសស្នើឲ្យចោទប្រកាន់នាយករដ្ឋមន្រ្តី អ៊ីស្រាអែល និងភិរយា ក្នុងបទប្រព្រឹត្តអំពើពុករលួយ
ប៉ូលិសអ៊ីស្រាអែល កាលពីថ្ងៃអាទិត្យម្សិលមិញ បានស្នើឲ្យមានការចោទប្រកាន់តាមផ្លូវតុលាការ លោកនាយករដ្ឋមន្រ្តី បិនចាមីន នេតាន់យ៉ាហ៊ូពីបទប្រព្រឹត្តអំពើពុករលួយ។ នៅថ្ងៃអាទិត្យ ប៉ូលិសអ៊ីស្រាអែល អះអាងថា ទើបប្រមូលបានភស្តុតាងគ្រប់គ្រាន់ ក្នុងសំណុំរឿងពុករលួយ ទីបី ដែលប្រព្រឹត្តផ្ទាល់ ដោយនាយករដ្ឋមន្រ្តី អ៊ីស្រាអែល និងក្រុមគ្រួសាររបស់លោក។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសំណុំរឿងពុករលួយ ដែលប៉ូលិសអ៊ីស្រាអែលកំពុង ស៊ើបអង្កេត គេសង្ស័យថា លោកនាយករដ្ឋមន្រ្តីអ៊ីស្រាអែលបានចាត់វិធានការ អនុគ្រោះយោគយល់ដល់ក្រុមហ៊ុនឯកជនមួយ ជាថ្នូរនឹងការចុះផ្សាយព័ត៌មានល្អៗពីរូបលោក ពោលគឺគ្មានទេ អត្ថបទរិះគន់លោក នៅក្នុងវិបសៃតិ៍ព័ត៌មាន ដែលជាកម្មសិទ្ធិរបស់ក្រុមហ៊ុន ដែលទទួលបានផលប្រយោជន៍ពីគោលនយោបាយរបស់រដ្ឋាភិបាល។
បន្ទាប់ពីប៉ូលិសស្នើឲ្យមានការចោទប្រកាន់លោកនាយករដ្ឋមន្រ្តី អ៊ីស្រាអែល តាមផ្លូវតុលាការ គឺរដ្ឋអាជ្ញា ដែលជាអ្នកសម្រេចថា តើនឹងចោទលោកនាយករដ្ឋមន្រ្តី ហើយនិងភរិយា ទៅតាមស្នើរបស់ប៉ូលិសដែរឬទេ។ ប៉ូលិសអ៊ីស្រាអែលដែលបានស្នើឲ្យចោទប្រកាន់លោកនាយករដ្ឋមន្រ្តី អ៊ីស្រាអែលពីបទទទួលសំណូក លួចបន្លំ ហើយនិងរំលោភលើការជឿទុកចិត្ត។ មួយវិញទៀត ប៉ូលិសអ៊ីស្រាអែលបានស្នើផងដែរ ឲ្យរដ្ឋអាជ្ញាចោទប្រកាន់លោកស្រី សារ៉ា ភរិយារបស់លោកនាយករដ្ឋមន្រ្តី ពីបទប៉ុនប៉ង រារាំងការស៊ើបអង្កេតរបស់ប៉ូលិស។
សូមអាន៖ អតីតនាយករដ្ឋមន្រ្តីអ៊ីស្រាអែល ជាប់គុក១៨ខែពីបទស៊ីសំណូក
កាលពីខែកុម្ភៈ ប៉ូលិសអ៊ីស្រាអែលធ្លាប់បានស្នើម្តងហើយ ឲ្យមានការចោទប្រកាន់ប្រមុខរដ្ឋាភិបាលអ៊ីស្រាអែល ក្នុងសំណុំរឿងប្រព្រឹត្តអំពើពុករលួយពីករណីផ្សេងទៀត។ ប៉ុន្តែ រហូតមកដល់ពេលនេះ អ្នកតំណាងអាយ្យការអ៊ីស្រាអែលនៅមិនទាន់បានសម្រេចចោទប្រកាន់នៅឡើយនោះទេ។
នៅក្នុងសេចក្តីថ្លែងការណ៍ កាលពីថ្ងៃអាទិត្យ លោកនាយករដ្ឋមន្រ្តី អ៊ីស្រាអែល បិនចាមីន នេតាន់យ៉ាហ៊ូ បានបដិសេធទាត់ចោល ការលើកឡើងរបស់ប៉ូលិស ដែលលោកចាត់ទុកថា ធ្វើឡើងដោយគ្មានមូលដ្ឋានច្បាស់លាស់ និងអាចជារឿងដែលប្រឌិតឡើងដោយគូប្រជែង នយោបាយរបស់លោកតែប៉ុណ្ណោះ។ ប្រមុខរដ្ឋាភិបាលអ៊ីស្រាអែល នៅបាននិយាយការពារខ្លួនយ៉ាងដូច្នេះថា ដូចជាលើកមុន សំណុំរឿងស៊ើបអង្កេតរបស់ប៉ូលិសប្រឆាំងនឹងរូបលោក នឹងគ្មានផ្តល់លទ្ធផលអ្វីទេ ព្រោះថា វាគ្មានរឿងពុករលួយអ្វីនោះទេ។
តាមផ្លូវច្បាប់ លោកបិនចាមិន នេតាន់យ៉ាហ៊ូ មិនចាំបាច់លាលែងចេញពីតំណែងនាយករដ្ឋមន្រ្តី នោះទេ នោះបើទោះបី ជាមានការចោទប្រកាន់ណាមួយ ពីរដ្ឋអាជ្ញា។ ដរាបណា លោកនៅមិនទាន់ទទួលការផ្តន្ទាទោសតាមផ្លូវតុលាការ លោកនៅតែអាចរក្សាតំណែងជានាយករដ្ឋមន្រ្តីដដែល។ យ៉ាងណាក៏ដោយគេវាយតម្លៃថា សំណើរបស់ប៉ូលិសឲ្យមានការចោទប្រកាន់ពីរឿងពុករលួយលើកនេះ នឹងធ្វើឲ្យលោកបិនចាមីន នេតាន់យ៉ាហ៊ូ សម្រេចចិត្ត កាន់តែឆាប់ ដើម្បីរៀបចំការបោះឆ្នោត មុនកាលកំណត់ ដែលត្រូវធ្វើ នៅខែវិច្ឆិកាឆ្នាំក្រោយ ពោលគឺដើម្បីកុំឲ្យរដ្ឋអាជ្ញាទម្លាក់ចោលការចោទប្រកាន់។
អ្នកវិភាគវាយតម្លៃថា ទោះរដ្ឋាភិបាលចម្រុះ ចុះខ្សោយ ដោយសារតែការដើរចេញរបស់គណបក្សដៃគូ លោកបិនចាមីន នេតាន់យ៉ាហ៊ូ នៅតែមានកូដប្រជាប្រិយភាពខ្ពស់ជាងគេ និងអាចឈ្នះឆ្នោតសាជាថ្មី ដោយសារ គណបក្សប្រឆាំង នៅតែបែកបាក់ គ្មានកម្លាំងរឹងមាំ។ បើសិនបានឈ្នះ នៅក្នុងការបោះឆ្នោតមុនអាណត្តិមែន លោកបិនចាមីន ណេតាន់យ៉ាហ៊ូ ដែលកាន់តំណែងនាយករដ្ឋមន្រ្តីអ៊ីស្រាអែល១២ឆ្នាំមកហើយនោះ នឹងក្លាយជានាយករដ្ឋមន្រ្តីអ៊ីស្រាអែល ដំបូងគេ ដែលកាន់តំណែងនេះបានយូរជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ