រដ្ឋមន្ត្រីការពារជាតិអ៊ីស្រាអែលលាលែងចេញពីតំណែង ក្រោយមានបទឈប់បាញ់ជាមួយប៉ាឡេស្ទីន
រដ្ឋមន្ត្រីក្រសួងការពារជាតិអ៊ីស្រាអែល Avigdor Lieberman ដែលជាអ្នកអភិរក្សនិយមបំផុតម្នាក់ បានប្រកាសលាលែងចេញពីតំណែងនៅថ្ងៃពុធនេះ។ មូលហេតុមកពីលោករដ្ឋមន្ត្រី ប្រឆាំងនឹងកិច្ចព្រមព្រៀងឈប់បាញ់របស់អ៊ីស្រាអែលជាមួយពួកចលនាហាម៉ាសប៉ាឡេស្ទីន។ ការលាលែងចេញពីតំណែងនេះ បានធ្វើឱ្យរដ្ឋាភិបាលអ៊ីស្រាអែលដឹកនាំដោយលោកនាយករដ្ឋមន្ត្រី ប៊ិនយ៉ាមែន នេតាន់យ៉ាហ៊ូ Benjamin Netanyahu រង្គោះរង្គើយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ព័ត៌មានលេចឮតាំងពីព្រលឹម និងត្រូវបានបញ្ជាក់ពិតនៅពេលរសៀល ! រដ្ឋមន្ត្រីក្រសួងការពារជាតិ លោក អាវីដ័រ លីបែរម៉ាន់ Avigdor ប្រធានបក្សបៃតៃនូ (Beiteinou) បក្សជាសម្ព័ន្ធមិត្តរបស់រដ្ឋាភិបាលចម្រុះអ៊ីស្រាអែល បានប្រកាសលាលែងចេញពីតំណែង មួយថ្ងៃក្រោយមានបទឈប់បាញ់ជាមួយចលនាហាម៉ាស។ មិនតែប៉ុណ្ណោះ លោកថែមទាំងអំពាវនាវឱ្យមានការបោះឆ្នោតសភាមុនអាណត្តិទៀត ឱ្យបានកាន់តែឆាប់កាន់តែប្រសើរ។
នៅចំពោះមុខអ្នកសារព័ត៌មាន លោក លីបែរម៉ាន់ ដែលជាអ្នកអភិរក្សនិយមបំផុតរបស់អ៊ីស្រាអែល បានប្រកាសចាត់ទុកបទឈប់បាញ់ជាមួយចលនាប៉ាឡេស្ទីន ថាជា “ការចុះចាញ់នឹងភេរវនិយម” ! ក្រៅអំពីបរិហារបទឈប់បាញ់នេះ លោក លីបែរម៉ាន់ ក៏បានរំលើកអំពីជំហរចម្រូងចម្រាសជាមួយលោកនាយករដ្ឋមន្ត្រី ប៊ិនយ៉ាមែន នេតាន់យ៉ាហ៊ូ ប្រធានបក្ស ស្តាំនិយមលីគូកំពុងកាន់អំណាច ក្នុងសំណុំរឿងជាច្រើនផ្សេង។
សម្រាប់អ្នកវិភាគ សារនៃការលាលែងចេញតំណែងរបស់រដ្ឋមន្ត្រីការពារជាតិ មានបង្កប់អត្ថន័យមួយ ៖ ការបាញ់មីស៊ីល៥០០គ្រាប់ចេញតំបន់ហ្កាហ្សា បានរុញរដ្ឋមន្ត្រីការពារជាតិឱ្យលាលែងចេញពីតំណែង ឯលោកនេតាន់យ៉ាហ៊ូ ជាប្រមុខរដ្ឋាភិបាលខ្សោយ។
ការលាលែងរបស់លោក លីប៊ែរម៉ាន់ ចាប់មានសុភលភាពក្នុងរយៈពេល៤៨ម៉ោងខាងមុខ។ ប៉ុន្តែគេនៅមិនទាន់ដឹងថាតើបក្សដ៏តូចរបស់លោក នឹងចាកចេញពីរដ្ឋាភិបាលចម្រុះដែលឬយ៉ាងណាទេ ! ប្រសិនបើបក្សដកខ្លួនដែរ នោះរដ្ឋាភិបាលលោកនេតាន់យ៉ាហ៊ូ ដែលមានកំណើតតាំងពីឆ្នាំ២០១៥មក នឹងលែងសូវរឹងមាំ ព្រោះមានសំឡេងភាគច្រើនដាច់ខាតយ៉ាងប្រផុតប្រផើយបំផុត (លើសតែមួយសំឡេងគត់នៅក្នុងសភា)។
ប៉ុន្តែ លោក នេតាន់យ៉ាហ៊ូ បានបញ្ចេញប្រតិកម្ម និងព្រមានជាស្រេច តាំងពីពុំទាន់មានសេចក្តីប្រកាសលាលែងចេញពីតំណែងជាផ្លូវការមកម្ល៉េះ ថា អំណាចការពារជាតិនឹងស្ថិតនៅក្នុងកណ្តាប់ដៃរបស់នាយករដ្ឋមន្ត្រី។ ហើយគ្មានទេ ការរៀបចំបោះឆ្នោតសភាមុនអាណត្តិ(មុនខែវិច្ឆិកា២០១៩)នោះ។
ដោយឡែកសម្រាប់ចលនាហាម៉ាស ការលាលែងចេញពីតំណែងរបស់លោក លីប៊ែរម៉ាន់ គឺជាជោគជ័យរបស់តំបន់ហ្កាហ្សា ដែលតស៊ូរហូតបានសម្រេចបានធ្វើឱ្យមានភាពរង្គោះរង្គើក្នុងឆាកនយោបាយអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ