អ៊ីរ៉ង់៖មានស្លាប់យ៉ាងតិច ២៤នាក់ និងរបួសជាង ៥០នាក់នៅក្នុងភេវរកម្មប្រឆាំងនឹងក្បួនព្យុះហយាត្រាកងទ័ព
នៅក្នុងប្រទេសអ៊ីរ៉ង់ អំពើភេរវកម្មប្រឆាំងនឹងក្បួនព្យុះហយាត្រាកងទ័ពនាព្រលឹងស្រាងៗព្រឹកថ្ងៃសៅរ៍ ទី២២ កញ្ញាបានបណ្តាលឲ្យស្លាប់មនុស្សយ៉ាងតិច ២៤នាក់ និងរបួសជាង ៥៣នាក់។ ឧប្បត្តិហេតុមួយនេះបានកើតមានឡើងនៅក្នុងទីក្រុងអាវ៉ា (Ahvaz) ស្ថិតប៉ែកនិរតីប្រទេស។ តាមព័ត៌មានចុះផ្សាយដោយទីភ្នាក់ងារផ្លូវការអ៊ីរ៉ង់ឈ្មោះអៀណា (Irna) ចំនួនអ្នកស្លាប់នឹងអាចកើនច្រើនជាងនេះដោយផ្អែកលើស្ថានភាពអ្នករបួស។ ប្រតិកម្មពីខាងរដ្ឋាភិបាល លោកប្រមុខការទូតហ្សារីស្វបានទម្លាក់ការទទួលខុសត្រូវលើប្រទេសមួយដែលគាំទ្រដោយអាមេរិក។
ចុះផ្សាយនៅថ្ងៃ៖
ស្តាប់ - ០១:៤៩
រូបភាពនៃក្បួនព្យុះហយាត្រាកងទ័ពបន្តដោយរូបភាពនៃការវាយប្រហារលើក្បួនព្យុះហយាត្រាត្រូវបានផ្សាយបន្តផ្ទាល់ដោយទូរទស្សន៍ក្នុងស្រុកនៅទីក្រុងអាវ៉ា (Ahvaz)។ នៅក្នុងរូបភាពទាំងអស់នោះ គេបានឃើញរូបភាពនៃការវាយប្រហារ និងការបាញ់រះដោយកាំភ្លើងស្វ័យប្រវត្តិ រួមទាំងក្រុមមនុស្សរត់ប្រសេកប្រសាចរវាងអ្នកចូលរួមទស្សនាក្បួនព្យុះហយាត្រា និងកងទ័ពដែលចូលរួមផ្ទាល់នៅក្នុងក្បួនព្យុះហយាត្រានោះ។
តុល្យការថ្មីចុងក្រោយផ្តល់ដោយទីភ្នាក់ងារផ្លូវការអ៊ីរ៉ង់ឈ្មោះអៀណា (Irna) ឲ្យដឹងថា ចំនួនអ្នកស្លាប់មាន ២៤នាក់ និងរបួសជាង ៥៣នាក់។ តែចំនួនស្លាប់អាចនឹងមានច្រើនជាងនេះ ព្រោះក្នុងចំណោមអ្នករបួស មានអ្នកខ្លះកំពុងស្ថិតក្នុងស្ថានភាពស្ទើរស្លាប់ ស្ទើររស់។ ក្រៅពីជនរងគ្រោះជាកងទ័ព ក៏មានជនរងគ្រោះស៊ីវិលជាស្រ្តី និងកូនក្មេងដែលបានចូលរួមទស្សនាក្បួនព្យុះហយាត្រា។ អភិបាលរងទីក្រុងអាវ៉ា (Ahvaz) ឲ្យដឹងថា មានភេរវជនចំនួន ៤នាក់បានបើកការវាយប្រហារលើក្បួនព្យុះហយាត្រា ហើយមាន ៣នាក់ត្រូវបានកម្លាំងសន្តិសុខបាញ់សម្លាប់ភ្លាមៗនៅហ្នឹងកន្លែង ចំណែកម្នាក់ទៀតត្រូវបានចាប់ខ្លួន តែក្រោយមកក៏បានស្លាប់ដោយរបួសធ្ងន់។
ក្រុមអ្នកទទួលខុសត្រូវក្នុងទីក្រុងអាវ៉ាបានបញ្ជាក់ថា ជនខ្មាន់កាំភ្លើងដៃដល់ទាំង ៤នាក់ជាសមាជិករបស់ចលនាជ្រុលនិយមអារ៉ាប់ក្នុងស្រុកដែលតែងបើកការវាយប្រហារលើកងទ័ពនារយៈពេលប៉ុន្មានឆ្នាំកន្លងទៅ។ ចំណែកប្រមុខការទូតអ៊ីរ៉ង់លោកហ្សារីស្វមិនញញើតនឹងទម្លាក់កំហុសដាក់លើប្រទេសដែលគាំទ្រដោយសហរដ្ឋអាមេរិក។ ទោះបីលោកហ្សារីស្វមិនចង្អុលចំប្រទេសណាមួយក៏ដោយក៏គេដឹងថា លោកហ្សារីស្វចង់និយាយសំដៅលើប្រទេសអារ៉ាប៊ីសាអូឌីត និងក្រុមសម្ព័ន្ធមិត្តរបស់អារ៉ាប៊ីសាអូឌីតដែលកំពុងមានជម្លោះជាចំហជាមួយអ៊ីរ៉ង់នៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ