ស៊ីរី ៖ ពួកអង្គការរដ្ឋអ៊ីស្លាមប្រហារជីវិតចំណាប់ខ្មាំង រុស្ស៊ីចាប់វាយប្រហារតាមផ្លូវអាកាស
យោធាជើងអាកាសរុស្ស៊ីបានបើកប្រតិបត្តិការ នៅថ្ងៃសៅរ៍ម្សិលមិញ វាយលើទីតាំងរបស់ពួកអង្គការរដ្ឋអ៊ីស្លាម នៅខេត្តស៊ូអៃដា Soueida ខេត្តភាគខាងត្បូងប្រទេសស៊ីរី។ ជាការវាយប្រហារដើម្បីត្រួសត្រាយផ្លូវឱ្យកងទ័ពជើងគោកស៊ីរីចូលវាយលុកជម្រុកពួកជីហាត។ ពួកជីហាតរដ្ឋអ៊ីស្លាមនៅស៊ូអៃដា ដែលក្រោយពីបានធ្វើសកម្មភាពទ្រង់ទ្រាយធំ សម្លាប់ជនស៊ីវិលអស់ ២៥០នាក់ ទើបបានប្រហារជីវិតចំណាប់ថ្នូរម្នាក់ ក្នុងចំណោមចំណាប់ថ្នូរជាច្រើននាក់។
ចុះផ្សាយនៅថ្ងៃ៖
បើតាមប្រភពព័ត៌មានតាមបណ្តាញអ៊ីនធ័រនែត និងអង្គការក្រៅរដ្ឋាភិបាលមួយ ពួកអង្គការរដ្ឋអ៊ីស្លាម បានប្រហារជីវិតចំណាប់ខ្មាំងម្នាក់ ក្នុងចំណោមចំណាប់ខ្មាំងជាច្រើនសិបនាក់ ដែលពួកគេចាប់បានពីខែមុន នៅក្នុងការវាយប្រហារដ៏សែនមរណៈ កាលពីថ្ងៃទី ២៥ កក្កដា ៖ មានស្លាប់យ៉ាងហោច២៥០នាក់ និងចាប់ខ្លួនស្ត្រី-កុមារ ជាង៣០នាក់ ព្រមទាំងបុរស១៧នាក់បាត់ខ្លួន។ ជាតុល្យការដ៏ធ្ងន់ធ្ងរបំផុតមួយ គិតចាប់តាំងពីស៊ីរីធ្លាក់ក្នុងសង្គ្រាមមក។
មានការចរចាដោះលែងចំណាប់ខ្មាំង រវាងរុស្ស៊ីនិងអង្គការរដ្ឋអ៊ីស្លាមដែរ ប៉ុន្តែមិនសម្រេច ! នេះបើតាមប្រភពផ្តល់ដោយតំណាងសហគម Druze ជនជាតិភាគតិចអ៊ីស្លាមនិកាយឈីអ៊ីត ដែលរស់នៅផ្តុំគ្នាជាប្រជាជនភាគច្រើនក្នុងតំបន់Soueida។
សូមបញ្ជាក់ថា ជាងមួយឆ្នាំមកនេះ ពួកអង្គការរដ្ឋអ៊ីស្លាម បានទទួលបរាជ័យជាបន្តបន្ទាប់ទាំងនៅស៊ីរីនិងអ៊ីរ៉ាក់ និងត្រួតត្រាទឹកដីស៊ីរីប្រមាណតែបីភាគរយប៉ុណ្ណោះ នាពេលនេះ ប៉ុន្តែពួកគេនៅតែអាចឆ្លៀតបង្កសកម្មភាពមរណៈខ្លាំង ដូចយ៉ាងនៅស៊ូអៃដានេះបានទៀត។ បន្ទាប់ពីត្រូវបានវាយខ្ចាត់ខ្ចាយចេញពីខេត្តដេរ៉ា មូលដ្ឋានដ៏ធំចុងក្រោយរបស់ពួកគេកាលពីសប្តាហ៍មុនមក ពួកជីហាតនេះបានរុលខ្លួនមកផ្តុំកម្លាំងនៅខេត្តស៊ូអៃដាជិតខាង។
ហើយតាំងពីម្សិលមិញមក បើតាមប្រភពយោធាស៊ីរី កងទ័ពជើងអាកាសរុស្ស៊ី បានបញ្ចេញយន្តហោះប្រដេញទម្លាក់គ្រាប់បែក ធ្វើយុទ្ធនាការបាញ់រះ តាមផ្លូវអាកាស យ៉ាងសន្ធាប់ សំដៅលើទីតាំងរបស់ពួកអង្គការរដ្ឋអ៊ីស្លាម នៅក្នុងខេត្ត Soueida ទៀត ដើម្បីបើកផ្លូវឱ្យកងទ័ពជើងគោកស៊ីរី ដែលបានប្រមូលកម្លាំងដ៏ច្រើនជាស្រេចទៅហើយ អាចសម្រុកទៅបោសសម្អាតកម្ចាត់ពួកអង្គការរដ្ឋអ៊ីស្លាម ឱ្យអស់ពីតំបន់ភាគខាងត្បូងប្រទេស និងដើម្បីកុំឱ្យពួកនេះអាចគំរាមកំហែងច្រកផ្លូវនាំឆ្ពោះទៅកាន់ព្រំដែនអ៊ីរ៉ាក់ និងព្រំដែនហ្សកដានីបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ