កិច្ចព្រមព្រៀងនុយក្លេអ៊ែរអ៊ីរ៉ង់៖លោកហាសាន រ៉ូហានីព្រមានលោកដូណាល់ ត្រាំជាថ្មី
នៅប៉ុន្មានថ្ងៃទៀតខាងមុខ ពោលនាថ្ងៃសៅរ៍ ទី១២ ឧសភាចុងសប្តាហ៍នេះ លោកប្រធានាធិបតីអាមេរិកដូណាល់ ត្រាំត្រូវសម្រេចចិត្តដក ឬមិនដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាកាលពីពាក់កណ្តាលខែកក្កដា ឆ្នាំ ២០១៥។ តែសមភាគីអ៊ីរ៉ង់លោកហាសាន រ៉ូហានីបានចេញមុខព្រមានលោកត្រាំជាថ្មីនាថ្ងៃអាទិត្យ ទី៦ ឧសភាថា បើលោកត្រាំសម្រេចដកអាមេរិកចេញពីកិច្ចព្រមព្រៀង អាមេរិកនឹងមានវិប្បដិសារីដ៏ធំនៅក្នុងប្រវត្តិសាស្រ្ត។ លោករ៉ូហានីបានបន្ថែមថា អ៊ីរ៉ង់នឹងបន្តតស៊ូប្រឈមទប់នឹងការសម្រេចរបស់លោកត្រាំលើគ្រប់រូបភាពទាំងអស់។
ចុះផ្សាយនៅថ្ងៃ៖
ស្តាប់ - ០២:២៣
« បើអាមេរិកដើរចេញពីកិច្ចព្រមព្រៀង អស់លោកនឹងបានដឹងភ្លាមថា អាមេរិកនឹងមានវិប្បដិសារីដ៏ធំនៅក្នុងប្រវត្តិសាស្រ្ត » នេះជាការថ្លែងរបស់លោកប្រធានាធិបតីអ៊ីរ៉ង់រ៉ូហានីតាមកញ្ចក់ទូរទស្សន៍សាធារណៈ។ លោករ៉ូហានីបានបន្ថែមដោយធានាថា អ៊ីរ៉ង់បានត្រៀមគ្រប់សេណារីយ៉ូអស់ជាច្រើនខែកន្លងមកហើយដើម្បីប្រឈមទប់នឹងរាល់សេចក្តីសម្រេចរបស់លោកប្រធានាធិបតីអាមេរិកដូណាល់ ត្រាំ។ តាមលោករ៉ូហានី សេណារីយ៉ូទាំងអស់នោះត្រូវបានលោកប្រគល់ទៅឲ្យអង្គការថាមពលបរមាណូអ៊ីរ៉ង់ជាអ្នករៀបចំដោយលោកមិនបានលំអិតអ្វីបន្ថែមទេ។
ទាក់ទងនឹងកម្មវិធីគ្រាប់មីស៊ីល និងអាវុធរបស់អ៊ីរ៉ង់ត្រូវបានលោករ៉ូហានីបញ្ជាក់ជាថ្មីថា មានគោលដៅការពារខ្លួនសុទ្ធសាធ និងថា អ៊ីរ៉ង់នឹងមិនចរចាជាមួយនរណាទាំងអស់ស្តីពីអាវុធ និងវិស័យការពារ។ ទន្ទឹមគ្នានេះ លោករ៉ូហានីមិនភ្លេចនិយាយពីបញ្ហានៅក្នុងតំបន់ដែលលោកយល់ថា អ៊ីរ៉ង់ត្រៀមខ្លួនដើម្បីចរចា តែអ៊ីរ៉ង់មិនបោះបង់ចោលការតស៊ូប្រយុទ្ធរបស់ខ្លួនប្រឆាំងនឹងភេរវនិយមទេ។ « យើងចង់និយាយជាមួយពិភពលោកដើម្បីឲ្យតំបន់របស់យើងមានស្ថិរភាព និងសន្តិសុខ តែយើងនឹងមិនអនុញ្ញាតឲ្យមានការបង្កើតអង្គការរដ្ឋអ៊ីស្លាមថ្មីឡើយ » នេះជាការគូសបញ្ជាក់របស់លោករ៉ូហានី។
កន្លងមក ការព្រមានអ៊ីរ៉ង់ក៏មានពីប្រមុខការទូតដែលថា អ៊ីរ៉ង់នឹងមិនចរចាឡើងវិញលើអ្វីដែលបានព្រមព្រៀង និងដែលអ៊ីរ៉ង់បានអនុវត្តន៍ត្រឹមត្រូវ។ ចំណែកលោក អាលី អាក្បា វីឡាយ៉ាទីដែលជាទីប្រឹក្សារបស់ប្រមុខសាសនាអ៊ីស្លាមអ៊ីរ៉ង់បានព្រមានត្រង់ៗថា បើអាមេរិកសម្រេចចិត្តដកខ្លួនចេញពីកិច្ចព្រមព្រៀង អ៊ីរ៉ង់ក៏ដកខ្លួនចេញដែរ។ ប្រតិកម្មខ្លាំងៗរបស់ប្រធានាធិបតីអ៊ីរ៉ង់ពេលនេះបានធ្វើឡើង ចំពេលដែលសមភាគីអាមេរិកលោកដូណាល់ ត្រាំត្រូវសម្រេចចិត្តនាថ្ងៃទី១២ ឧសភាដក ឬមិនដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាកាលពីពាក់កណ្តាលខែកក្កដា ឆ្នាំ ២០១៥។
ចំណែកក្រុមប្រទេសអឺរ៉ុបហត្ថលេខីផ្សេង ពិសេសប្រទេសបារាំង តាមរយៈលោកប្រធានាធិបតីម៉ាក្រុងបានបញ្ជាក់ជាថ្មីពីការរក្សាទុកកិច្ចព្រមព្រៀងដែលមានស្រាប់ និងចង់ចរចាលើសំណុំរឿងផ្សេងរួមមាន សកម្មភាពនុយក្លេអ៊ែរអ៊ីរ៉ង់នៅក្រោយឆ្នាំ ២០២៥ កម្មវិធីគ្រាប់មីស៊ីលអ៊ីរ៉ង់ និងតួនាទីរបស់អ៊ីរ៉ង់នៅក្នុងតំបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ