ប្រធានាធិបតីស៊ីរីដៀលត្មះពីការកើនឡើងនៃអំពើឈ្លានពានប្រឆាំងនឹងប្រទេសរបស់លោក
ប្រធានាធិបតីស៊ីរីលោក អាសាដ នៅថ្ងៃចន្ទម្សិលមិញ បានថ្លែងដៀលត្មះអំពីការឈ្លានពានដែលកាន់តែកើនឡើងប្រឆាំងនឹងប្រទេសស៊ីរី ក្រោយបន្ទាប់ពីមានការបាញ់មីស៊ីល ប្រឆាំងទៅលើទីតាំងនានារបស់រដ្ឋអំណាចនៅដាម៉ាស់រួចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ប្រធានាធិបតីស៊ីរី នៅម្សិលមិញបានថ្លែងដៀលត្មះយ៉ាងខ្លាំងក្លា បន្ទាប់ពីមានការបាញ់គ្រាប់មីស៊ីលជាច្រើនប្រឆាំងទៅលើទីតាំងយោធានានារបស់រដ្ឋអំណាចដាម៉ាសកាលពីយប់ថ្ងៃអាទិត្យមុន។ ការបាញ់ផ្លោងមីស៊ីលនេះ ត្រូវបានលោក Assad ចាត់ទុកជា”ការឈ្លានពានកាន់តែខ្លាំងឡើងៗប្រឆាំងនឹងស៊ីរី។
ក៏ប៉ុន្តែប្រមុខរដ្ឋស៊ីរី ពុំបានបញ្ចេញឈ្មោះអ្នកវាយប្រហារមីស៊ីលនោះទេ មីស៊ីលដែលបានសម្លាប់យុទ្ធជនគាំទ្ររបបស៊ីរីចំនួន២៦នាក់ក្នុងនោះភាគច្រើនមានសញ្ជាតិអ៊ីរ៉ង់។
បើយោងតាមអង្គការក្រៅរដ្ឋាភិបាលមួយនៅស៊ីរី” អ្នកដែលទទូលខុសត្រូវនៅលើការវាយប្រហារមីស៊ីលនៅយប់ថ្ងៃអាទិត្យមុន ប្រហែលជា“អ៊ីស្រាអែល ។ ប៉ុន្តែ រដ្ឋមន្ត្រីក្រសួងដឹកជញ្ជូនអ៊ីស្រាអែលដែលក៏ជាអ្នកទទួលបន្ទុកខាងក្រសួងស៊ើបការសម្ងាត់អ៊ីស្រាអែលដែរ បានបដិសេធថា “អ៊ីស្រាអែលពុំបានដឹងឮអ្វីទេពីព្រឹត្តការណ៍នោះ”។
គួររំលឹកថា របបស៊ីរីនិងអ៊ីរ៉ង់ នៅថ្ងៃទី៩មេសាមុន ធ្លាប់បានចោទប្រកាន់អ៊ីស្រាអែល ម្តងរួចទៅហើយ ថា បានធ្វើការវាយប្រហារដ៏កាចសាហាវបំផុតប្រឆាំងទៅលើមូលដ្ឋានយោធាមួយនៅភាគកណ្តាលប្រទេសស៊ីរីនិងដែលបានសម្លាប់យុទ្ធជនគាំទ្ររបបស៊ីរីចំនួន១៤ក្នុងនោះ ៧ នាក់ ជាជនអ៊ីរ៉ង់។
សេចក្តីថ្លែងការណ៍របស់លោកអាសាដនេះ ត្រូវបានធ្វើឡើងនៅឱកាសជំនួបប្រាស្រ័យជាមួយគណៈប្រតិភូអ៊ីរ៉ង់ដែលដឹកនាំដោយអ្នកទទួលខុសត្រូវជាន់ខ្ពស់សភាអ៊ីរ៉ង់ម្នាក់។ហើយ អ៊ីរ៉ង់និងរុស្ស៊ី គឺជាសម្ព័ន្ធមិត្តមួយដ៏រឹងមាំជាទីបំផុតរបស់របបស៊ីរី។
នៅឱកាសនោះ លោក Bachar al Assad បានដៀលត្មះ ថា” សកម្មភាពឈ្លានពានរបស់បណ្តាប្រទេសគូសត្រូវដែលកើនឡើងខ្លាំងនោះ រឹតតែជម្រុញអោយប្រជាជនស៊ីរី កាន់តែ មានជំហរប្តេជ្ញាចិត្តយ៉ាងមុះមត់នៅក្នុងការប្រយុទ្ធប្រឆាំងទល់នឹងអំពើភេរវនិយមនិងរក្សាការពារអធិបតេយ្យភាពប្រទេសរបស់ខ្លួន។ សំដីប្រធានាធិបតីស៊ីរីនេះ ហាក់ដូចជាដាក់ផ្លែផ្កា ឲ្យប្រទេសលោកខាងលិច ដោយហេតុថានៅថ្ងៃទី១៤មេសា២០១៨កន្លងទៅនេះ សហរដ្ឋអាមេរិក អង់គ្លេសនិងបារាំង បានដឹកការវាយប្រហារសងសឹកមួយ តាមផ្លូវអាកាសប្រឆាំងទៅលើទីតាំងយោធារបស់របបស៊ីរី មួយថ្ងៃបន្ទាប់ពីមានការវាយប្រហារមួយដែលគេសង្ស័យថាជាការវាយប្រហារដោយអាវុធគីមី ពីសំណាក់កងទ័ពស៊ីរី នៅក្នុងក្រុងមួយដែលកាន់កាប់ដោយពួកឧទ្ទាមស៊ីរី នៅក្បែរទីក្រុងដាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ