ជីវិតនយោបាយរបស់លោក នេតានយ៉ាហ៊ូកំពុងរងសម្ពាធខ្លាំងថែមទៀតនៅចំពោះមុខតុលាការ
មិនដល់ទាំងមួយសប្តាហ៍ផង ក្រោយពីបានផ្តល់អនុសាសន៍ ឲ្យចោទប្រកាន់នាយករដ្ឋមន្ត្រីអ៊ីស្រាអែលពីបទពុករលួយ ការកេងបន្លំនិងការរំលោភលើការជឿទុកចិត្ត នៅក្នុងសំណុំរឿង២ផ្សេងគ្នាមក ការងារស៊ើបអង្កេតរបស់ ប៉ូលីសអ៊ីស្រាអែល ដូចជាកាន់តែចំរើនទៅមុខជាលំដាប់ ។ ជាការស៊ើបអង្កេតមួយដែលសំដៅទៅលើរូបលោកនេតានយ៉ាហ៊ូ ពីបទពាក់ព័ន្ធក្នុងអំពើពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ការមន្ទិលសង្ស័យទៅលើលោក បេនយ៉ាម៊ីន នេតានយ៉ាហ៊ូ កាន់តែមានភាពរឹងមាំថែមទៀតនាយប់ថ្ងៃអង្គារមុននេះ។ ដោយប៉ូលីសអ៊ីស្រាអែល បានឈានដល់កិច្ចព្រមព្រៀងមួយជាមួយនឹងអ្នកជំនិតមា្នក់របស់នាយករដ្ឋមន្ត្រីអ៊ីស្រាអែលដែលត្រូវបានប៉ូលីសចាប់ខ្លួនកាលពីថ្ងៃអាទិត្យនៅក្នុងក្របខណ្ឌនៃការស៊ើបអង្កេតមួយសំដៅប្រឆាំងទៅលើក្រុមហ៊ុនផ្នែកគមនាគមន៍ដ៏សំខាន់មួយឈ្មោះ Bezeq ។ អ្នកជំនិតរបស់នាយករដ្ឋមន្ត្រីអ៊ីស្រាអែលនោះ គឺ លោក Shlomo Filber ដែលជាអតីតអគ្គនាយកក្រុមហ៊ុនគមនាគមន៍ខាងលើនេះ។
ជាថ្នូរនឹងការលើកលែងទណ្ឌកម្មពីការជាប់ពន្ធនាគារ លោក Shlomo Fiber ត្រូវប្រគល់ភស្តុតាងទាំងអស់ដែលជាប់ពាក់ព័ន្ធនឹងបទពុករលួយរបស់លោកនេតានយ៉ាហ៊ូ។
ប៉ូលីសអ៊ីស្រាអែល កំពុងចោទសួរចង់ដឹងរឿងដែលទាក់ទងថា រដ្ឋាភិបាលអ៊ីស្រាអែល បានជួយជ្រោមជ្រែងក្នុងការផ្តល់ផលប្រយោជន៍អោយដល់កុ្រមហ៊ុនទូរគមនាគមន៍នោះ ដើម្បីអោយក្រុមហ៊ុននោះ ចុះផ្សាយតែព័ត៌មានល្អៗនិយាយលើកតម្កើងលោកនាយករដ្ឋមន្ត្រីនេតានយ៉ាហូ នៅលើវិបសៃដ៏មានឥទ្ធិពលដែលជាកម្មសិទ្ធិរបស់ចៅហ្វាយនាយនៃក្រុមហ៊ុន Bezeq។
អ្នកជំនិតរបស់លោកនេតានយ៉ាហ៊ូម្នាក់ទៀត ក៏ប្រហែលជាត្រូវរងការស៊ើបអង្កេតដែរ។ ដោយហេតុថា អតីតអ្នកជំនិតរបស់នាយករដ្ឋមន្ត្រីអ៊ីស្រាអែលនេះ ប្រហែលជាបានសូកប៉ាន់ ដើម្បីអោយចៅក្រមម្នាក់ បិទបញ្ចប់សំណុំរឿងមួយដែលពាក់ព័ន្ធនឹងលោកស្រីSara Netanyahu ភរិយារបស់នាយករដ្ឋមន្ត្រី ដើម្បីប្តូរជាមួយនឹងមុខតំណែងដ៏ឧត្តុងឧត្តមមួួយក្នុងឋានៈជារដ្ឋអាជ្ញាទូទៅ។ ប៉ូលីសបានបញ្ជាក់ថា កំពុងតែស៊ើបអង្កេតពីបញ្ហានេះ។
លោកនេតានយ៉ាហ៊ូវិញ បានបរិហារថា ជាការចោទប្រកាន់មិនពិតនិងឆ្កូតលីលា។ ប៉ុន្តែយោងតាមសារព័ត៌មានអ៊ីស្រាអែល លោកប្រមុខរដ្ឋាភិបាលអ៊ីស្រាអែល ប្រហែលជានឹងត្រូវប៉ូលីស ធ្វើការសាកសួរ នៅពេលខាងមុខនេះ ។ ហើយនៅថ្ងៃពុធនេះដែរ គឺជាលើកទីមួយហើយដែល មាន អ្នកតំណាងរាស្រ្តមា្នក់នៃគណបក្សផ្ទាល់របស់លោកនេតានយ៉ាហ៊ូ បានអំពាវនាវ អោយ លោកនេតានយ៉ាហ៊ូ លាលែងចុះចេញពីមុខតំណែងរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ