អាជ្ញាធរអ៊ីរ៉ង់ ចាប់ផ្តើមប្រតិបត្តិការរុករកឡើងវិញយន្តហោះដឹកអ្នកដំណើរដែលបាត់ស្រមោល តាំងពីម្សិលមិញ
នៅអ៊ីរ៉ង់ បន្ទាប់ពីលើកផ្អាកប្រតិបត្តិការរុករកយន្តហោះដឹកអ្នកដំណើរមួយគ្រឿងដែលបាត់ដានតាំងពីព្រឹកថ្ងៃអាទិត្យម្សិលមិញ អាជ្ញាធរអ៊ីរ៉ង់ បានចាប់ផ្តើមប្រតិបត្តិការរុករកយន្តហោះធ្លាក់ នៅថ្ងៃចន្ទទី១៩កុម្ភៈនេះឡើងវិញ។ ទន្ទឹមនេះ អាជ្ញាធរអ៊ីរ៉ង់ បានវាយតម្លៃដែរថា យន្តហោះ បានរងគ្រោះថ្នាក់ធ្លាក់ រីឯ អ្នកដំណើរទាំង៦៦នាក់ ក៏សន្មត់ថា ស្លាប់ទាំងអស់គ្នា។
ចុះផ្សាយនៅថ្ងៃ៖
ស្តាប់ - ០១:៥៨
អាជ្ញាធរអ៊ីរ៉ង់ បានលើកផ្អាកប្រតិបតិបត្តិការណ៍រុករកយន្តហោះដែលធ្លាក់ក្នុងតំបន់ភ្នំនៅពេលយប់ថ្ងៃអាទិត្យម្សិលមិញ ដោយសារតែអាកាសធាតុអាក្រក់ខ្លាំងដែលបណ្តាលមកពីខ្យល់ព្យុះ ព្រិល និងទឹកភ្លៀងធ្លាក់យ៉ាងខ្លាំងក្លា។ សូមបញ្ជាក់ថា យន្តហោះរងគ្រោះថ្នាក់នោះ ជាយន្តហោះ របស់ក្រុមហ៊ុន អ៊ីរ៉ង់ Aseman Airlines ដែលធ្វើដំណើរពីទីក្រុងតេអេរ៉ង់និងដឹកអ្នកដំណើរចំនួន ៦៦នាក់។
នៅក្នុងហេតុការណ៍នេះ អាជ្ញាធរអ៊ីរ៉ង់ បានវាយតម្លៃថា យន្តហោះ បានរងគ្រោះធ្លាក់ រីឯអ្នកដំណើរក្នុងយន្តហោះទាំងអស់ក៏សន្មត់ថា ត្រូវស្លាប់ទាំងអស់គ្នាដែរ។
គួរបញ្ជាក់ថា យន្តហោះរបស់ក្រុមហ៊ុន អ៊ីរ៉ង់នេះ ដែល ធ្វើការដឹកជញ្ជូនអ្នកដំណើរចេញពីទីក្រុងតេអេរ៉ង់ ឆ្ពោះទៅកាន់ក្រុង Yasouj ដែលស្ថិតនៅចម្ងាយប្រមាណជា ៥០០គម ពីរដ្ឋធានី អ៊ីរ៉ង់ បានបាត់ដានពីអេក្រង់រ៉ាដាតាំងពីព្រលឹមថ្ងៃអាទិត្យនៅខណៈពេលដែលយន្តហោះ កំពុងធ្វើដំណើរទៅជិតដល់គោលដៅរបស់ខ្លួន។
សូមបញ្ជាក់ថាពេញមួយថ្ងៃអាទិត្យម្សិលមិញ ប្រតិបត្តិការ រុករកយន្តហោះ ត្រូវបានរាំងស្ទះដោយអាកាសធាតុមិនអំណោយផល តែនៅថ្ងៃចន្ទទី១៩កុម្ភៈនេះ ក្រុមអ្នកជួយសង្គ្រោះរបស់អ៊ីរ៉ង់ បានចាប់ផ្តើមប្រតិបត្តិការរបស់គេឡើងវិញ អមដោយ ជំនួយឧត្ថម្ភភាគចក្រផង។
ចំណែកទីភ្នាក់ងារព័ត៌មាន អ៊ីរ៉ង់ Irna វិញ បានដកស្រង់សំដីរបស់អ្នកទទួលខុសត្រូវអ៊ីរ៉ង់ម្នាក់ខាងជំនួយរុករកដែលបានគូសបញ្ជាក់ថាប្រតិបត្តិការរុករកយន្តហោះធ្លាក់ ត្រូវធ្វើឡើងនៅតាមតំបន់ភ្នំខ្ពស់ៗប្រមាណជា១០០កន្លែង។
ទន្ទឹមនេះ ការរិយាល័យបារាំងផ្នែកសិក្សានិងវិភាគសន្តិសុខនៃអាកាសចរណ៍ស៊ីវីល (BEA) បានជូនដំណឹងនៅយប់ថ្ងៃអាទិត្យម្សិលមិញថា នឹងបញ្ជូនក្រុមអ្នកអង្កេតនិងទីប្រឹក្សាបចេ្ចកទេសរបស់ខ្លួនចំនួន៣នាក់ដើម្បីទៅធ្វើការអង្កេត ដើម្បី កំណត់រកពីមូលហេតុឲ្យបានច្បាស់លាស់នៅលើគ្រោះថ្នាក់ធ្លាក់យន្តហោះអ៊ីរ៉ង់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ