អ៊ីរ៉ាក់ស្វែងរកថវិកា ១០០ពាន់លានដុល្លារ ដើម្បីកសាងប្រទេសឡើងវិញ
អ៊ីរ៉ាក់ត្រូវការ១០០ពាន់លានដុល្លារដើម្បី ស្តារ កសាងប្រទេសឡើងវិញ។ រដ្ឋាភិបាលអ៊ីរ៉ាក់នៅថ្ងៃសុក្រម្សិលមិញ បានបញ្ជាក់ឲ្យដឹងពីតម្រូវការវិនិយោគ តម្លៃ ១០០ពាន់លានដុល្លារ សម្រាប់ វិស័យថាមពល កសិកម្ម និងវិស័យគមនាគមន៍ ដែលត្រូវបានបំផ្លាញខ្ទេចខ្ទីរ នៅក្នុងសង្រ្គាម បីឆ្នាំ ជាមួយ ក្រុមជីហាតអង្គការរដ្ឋអ៊ីស្លាម។
ចុះផ្សាយនៅថ្ងៃ៖
គណៈកម្មការវិនិយោគជាតិអ៊ីរ៉ាក់ នៅថ្ងៃសុក្រ បានចេញផ្សាយតារាងបញ្ជី រាយមុខ គម្រោងវិនិយោគ ដែលគេត្រូវការសម្រាប់កសាងទឹកដីមួយផ្នែករបស់អ៊ីរ៉ាក់ ដែលរងការបំផ្លាញ យ៉ាងធ្ងន់ធ្ងរ ដោយសារសង្រ្គាម វាយប្រហាររបស់ក្រុមជីហាតអង្គការរដ្ឋអ៊ីស្លាម។ ជារួម គេត្រូវការគម្រោងវិនិយោគចំនួន ១៥៧ ដែលមានតម្លៃសរុប១០០ពាន់លានដុល្លារ ដើម្បីវិនិយោគទៅលើវិស័យកសិកម្ម គមនាគមន៍ និងថាមពលរបស់ប្រទេសអ៊ីរ៉ាក់។ នៅក្នុងចំណោម គម្រោង ១៥៧ មាន១៦គម្រោងដែលនឹងផ្តោតសំខាន់ទៅលើការកសាងឡើងវិញ ហេដ្ឋារចនាសម្ព័ន្ធ ដូចជា អគារ មន្ទីរពេទ្យ សាលារៀន ផ្លូវថ្នល់ និងជាពិសេស ព្រលានយន្តហោះ នៅក្រុងមូស៊ូល ដែលត្រូវបានបំផ្លាញ នៅក្នុងការប្រយុទ្ធគ្នា រវាង កងទ័ពរដ្ឋាភិបាលអ៊ីរ៉ាក់ និងក្រុមជីហាតអង្គការរដ្ឋអ៊ីស្លាម។
នៅក្នុងវេទិកាសេដ្ឋកិច្ចអន្តរជាតិនៅក្រុងដាវ៉ូស ប្រទេសស្វ៊ីស នាយករដ្ឋមន្រ្តី អ៊ីរ៉ាក់ ដែលធ្លាប់បានប្រកាសពីជោគជ័យ និងការវាយដណ្តើមយកបានទឹកដី ទាំងស្រុងពីការកាន់កាប់របស់ក្រុមជីហាតអង្គការរដ្ឋអ៊ីស្លាម បានប្រកាសស្វែងរកការវិនិយោគពីបរទេសសម្រាប់កសាងទឹកដីមួយផ្នែករបស់អ៊ីរ៉ាក់។ នៅឆ្នាំ ២០០៣ នៅក្រោយការដួលរំលំ នៃរបបផ្តាច់ការសាដាម ហ៊ូសេន ដោយសារសង្រ្គាមឈ្លានពានរបស់អាមេរិក អ៊ីរ៉ាក់បានបើកទ្វារស្វាគមន៍ក្រុមវិនិយោគទុន បរទេស ដើម្បីអភិវឌ្ឍន៍សេដ្ឋកិច្ចរបស់ប្រទេសឡើងវិញ។ ប៉ុន្តែ រហូតមក អ្នកវិនិយោគបរទេស ផ្តោតសំខាន់តែទៅលើការផលិតប្រេង។ នៅក្នុងចំណោមប្រទេសសមាជិក អង្គការOPEC អ៊ីរ៉ាក់ក្លាយជាប្រទេសនាំចេញប្រេងធំទី២ បន្ទាប់ពីអារ៉ាប៊ី សាអូឌីត។ ប៉ុន្តែ ហេតុអ្វី បានជាអ៊ីរ៉ាក់នៅតែមិនមាន និងនៅតែត្រូវការការវិនិយោគពីបរទេសដើម្បីកសាងប្រទេសឡើងវិញ។ អ៊ីរ៉ាក់នាំចេញតែប្រេងឆៅ ដែលធ្វើឲ្យរដ្ឋាភិបាលមិនអាចទទួលបានផលចំណេញច្រើន។ មួយវិញទៀត សង្រ្គាម រើសអើងនិកាយសាសនា និងអំពើពុករលួយ នៅតែធ្វើឲ្យប្រទេសត្រដាប ត្រដួស ងើបមិនរួច ពីភាពក្រីក្រ គ្មានមធ្យោបាយ សម្រាប់កសាងប្រទេសឡើងវិញ។
បញ្ជីរាយមុខគម្រោងការវិនិយោគ បង្ហាញឲ្យឃើញ នៅថ្ងៃសុក្រ នឹងត្រូវរដ្ឋាភិបាល អ៊ីរ៉ាក់ដាក់បង្ហាញ នៅក្នុងសន្និសីទស្វែងរកជំនួយបរទេស នៅថ្ងៃចន្ទ សប្តាហ៍ក្រោយ ដែល រដ្ឋាភិបាលអ៊ីរ៉ាក់ រៀបចំឡើង ដោយសហការជាមួយធនាគារពិភពលោក។
រដ្ឋាភិបាលអាមេរិកដែលបើកសង្រ្គាមឈ្លានពានទៅលើអ៊ីរ៉ាក់ នៅឆ្នាំ ២០០៣ បានប្រកាសថា ខ្លួននឹងមិនផ្តល់ថវិកាសម្រាប់គម្រោងការសាងសង់ប្រទេសអ៊ីរ៉ាក់ឡើងវិញទេ ប៉ុន្តែ មន្រ្តីអាមេរិកដែលសុំមិនបញ្ចេញឈ្មោះ ម្នាក់បាននិយាយថា ផ្ទុយទៅវិញ ក្រុមហ៊ុនអាមេរិកជាង ១០០នឹងចូលរួមនៅក្នុងសន្និសីទនៅថ្ងៃចន្ទ។ នៅក្នុងសន្និសីទនៅសប្តាហ៍ក្រោយ រដ្ឋាភិបាលអ៊ីរ៉ាក់ សង្ឃឹម រៃអង្គាស និងស្វែងរកការវិនិយោគពីអាមេរិក អឺរ៉ុប និងជាពិសេស ពីក្រុមប្រទេសអារ៉ាប់។ ខុសពីលើកមុនៗ ការវិនិយោគបរទេស លើកនេះ នឹងផ្តោតសំខាន់ទៅលើកសាង ហេដ្ឋារចនាសម្ព័ន្ធ ការផ្តល់ការងារដល់យុវជន ការសង់រោងចក្រសម្រាប់ស្តុក ចម្រាញ់ប្រេង ហើយនិងការវិនិយោគទៅលើការដាំដុះស្រូវសាឡី ដែលរហូតមកដល់ពេលនេះ ជាទំនិញត្រូវការនាំចូលខ្លាំងរបស់អ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ