អ៊ីស្រាអែលចោទអ៊ីរ៉ង់ថា បានចាយលុយរាប់លានដុល្លារ ដើម្បីចិញ្ចឹមក្រុមអ៊ីស្លាម នៅដើមបូព៌ា
អ៊ីរ៉ង់បានចំណាយលុយរាប់រយលានដុល្លារ ក្នុងមួយឆ្នាំ ដើម្បីឧបត្ថម្ភសម្ព័ន្ធមិត្ត ដែលកំពុងធ្វើសង្រ្គាមនៅស៊ីរី លីបង់ យេម៉ែន និងនៅអ៊ីរ៉ាក់។ នេះបើតាមការលើកឡើងរបស់នាយសេនាធិការអ៊ីស្រាអែល កាលពីថ្ងៃអង្គារម្សិលមិញ។ អ៊ីស្រាអែលដែលជាសត្រូវតតាំងរបស់អ៊ីរ៉ង់ បានចោទអ៊ីរ៉ង់ ថា បានចំណាយលុយរាប់លានដុល្លារ ដើម្បី ចិញ្ចឹមធ្វើសង្រ្គាម បង្កអសន្តិសុខ នៅដើមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
សម្រាប់នាយសេនាធិការកងទ័ពអ៊ីស្រាអែល Gadi Eizenkot អ៊ីរ៉ង់បានចំណាយលុយរាប់រយលានដុល្លារ ដើម្បី ឧបត្ថម្ភចិញ្ចឹម សម្ព័ន្ធមិត្តនិកាយស្ហ៊ីអ៊ីត របស់ខ្លួន ដែលកំពុងជាប់ដៃធ្វើសង្រ្គាម នៅក្នុងប្រទេសស៊ីរី យេម៉ែន អ៊ីរ៉ាក់ លីបង់ ឬបារ៉ែនជាដើម។ តាមប្រធានកងទ័ពអ៊ីស្រាអែល អ៊ីរ៉ង់បានចំណាយក្នុងមួយឆ្នាំៗ ពី៧រយ ទៅ ១ពាន់លានដុល្លារ ដើម្បីផ្គត់ផ្គង់ក្រុមទាហានអេស្បូឡា របស់លីបង់ ដែលកំពុងប្រលូកធ្វើសង្រ្គាមនៅស៊ីរី។ តាមមន្រ្តីយោធាអ៊ីស្រាអែល ចាប់តាំងពីឆ្នាំ ២០១២ អ៊ីរ៉ង់ ដែលបានបញ្ជូនទីប្រឹក្សាយោធាជាង ២ពានាក់ ដើម្បី ទៅប្រយុទ្ធ ជួយកងទ័ព រដ្ឋាភិបាលរបស់លោកបាស្ហា អាល់អាសាដ បានចំណាយ លុយរាប់ពាន់លានដុល្លារ ធ្វើសង្រ្គាមនៅស៊ីរី។
លោក Gadi Eizenkot ដែលមាននាទីផងដែរជាទីប្រឹក្សាយោធាពិសេសរបស់លោកនាយករដ្ឋមន្រ្តីអ៊ីស្រាអែល បានបន្ថែមដែរថា ក្រៅតែពីឧបត្ថម្ភក្រុមអេស្បូឡា និងចំណាយយោធាសន្ធឹកសន្ធាប់ សម្រាប់ធ្វើសង្រ្គាមនៅស៊ីរី នៅអ៊ីរ៉ាក់ និងនៅយេម៉ែន អ៊ីរ៉ង់បានបង្កើនផងដែរ កញ្ចប់ជំនួយយោធា សម្រាប់ក្រុមហាម៉ាសប៉ាឡេស្ទីន និងក្រុមអ៊ីស្លាមជីហាត ដែលតែងតែបាញ់មីស៊ីលចេញពីតំបន់ហ្កាហ្សា សំដៅ វាយប្រហារទឹកដីអ៊ីស្រាអែល។ តាមនាយសេនាធិការអ៊ីស្រាអែល ជំនួយថវិកាប្រចាំឆ្នាំ របស់អ៊ីរ៉ង់សម្រាប់ ក្រុមអ៊ីស្លាមជីហាត និងហាម៉ាសប៉ាឡេស្ទីន បានកើនឡើងពី៧០ទៅ ១០០លានដុល្លារ។
ប្រធានកងទ័ពអ៊ីស្រាអែលមិនបានបញ្ជាក់លម្អិត ថា តើលោកបានតួលេខខាងលើមកពីខាងណានោះទេ។ ប៉ុន្តែ ជាទូទៅ អ៊ីស្រាអែលប្រមូលបានព័ត៌មានកន្លងមក ទាក់ទងនឹងជំនួយរបស់អ៊ីរ៉ង់ តាមរយៈ ភ្នាក់ងារសម្ងាត់របស់អ៊ីស្រាអែល។
ការលើកឡើងរបស់នាយសេនាធិការកងទ័ពអ៊ីស្រាអែល កើតឡើង ចំជួន ដែលបាតុកម្ម ប្រឆាំងរដ្ឋាភិបាល កំពុងផ្ទុះឆេះ ជាច្រើនកន្លែងនៅក្នុងប្រទេសអ៊ីរ៉ង់។ បាតុករអ៊ីរ៉ង់ចុះថ្នល់ ធ្វើបាតុកម្ម ដើម្បីបញ្ចេញកំហឹងប្រឆាំងនឹងទំនិញឡើងថ្លៃ និងបរិហារអសមត្ថភាពរបស់រដ្ឋាភិបាលអ៊ីរ៉ង់ ក្នុងការធ្វើកំណែទម្រង់សេដ្ឋកិច្ច។ នៅក្នុងពាក្យស្រែកតវ៉ារបស់បាតុករអ៊ីរ៉ង់ គេបានលឺផងដែរ ពាក្យទាមទារឲ្យរដ្ឋាភិបាលអ៊ីរ៉ង់ ឈប់ចំណាយលុយ ដើម្បី ធ្វើសង្រ្គាម នៅបរទេស និងត្រូវបង្វិលលុយទាំងនោះ មកអភិវឌ្ឍសេដ្ឋកិច្ចរបស់អ៊ីរ៉ង់វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ