ផលិតកម្មប្រេងលីប៊ីត្រូវធ្លាក់ចុះក្រោយពីមានការផ្ទុះបំពង់បង្ហូរប្រេងដ៏ចម្បងមួយ
នៅលីប៊ី បំពង់បង្ហូរប្រេងជាតិដ៏ចម្បងមួយ ត្រូវរងអន្តរាយដោយសារការផ្ទុះមួយកាលពីថ្ងៃអង្គារម្សិលមិញ។ ក្រុមហ៊ុនប្រេងជាតិលីប៊ី បានចាប់បើកការស៊ើបអង្កេតមួយ ដើម្បីកំណត់ឲ្យបានជាក់ច្បាស់ពីប្រភពនៃការផ្ទុះនេះ។ ហេតុការណ៍នេះ ធ្វើអោយលីប៊ី អាចបាត់បង់ផលិតផលប្រេងរបស់ខ្លួនប្រមាណជា៩ម៉ឺនបារីលក្នុងមួយថ្ងៃៗ និងក៏ជម្រុញឲ្យតម្លៃទីផ្សារប្រេងឡើងខ្ពស់កប់ពពក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ក្រោយពីការផ្ទុះបំពង់ប្រេងឆៅដ៏ចំបងមួយនៅក្នុងប្រទេសលីប៊ីកាលពីម្សិលមិញ តម្លៃប្រេងឆៅ បានឡើងថ្លៃប្រមាណជា ៦៧ដុល្លារអាមេរិកក្នុងមួយធុងបារីល។ ហេតុការណ៍នេះ បានកើតឡើងនៅម្តុំភូមិមួយដែលស្ថិតនៅចម្ងាយប្រមាណជា៤០០ គមភាគនិរតីនៃក្រុងកំពង់ផែដ៏សំខាន់បំផុតមួយរបស់ជាតិលីប៊ីនៅ Benghazi ។
នៅខណៈនេះ ក្រុមហ៊ុនប្រេងជាតិលីប៊ី NOC បានគូសបញ្ជាក់ប្រាប់ដល់ទីភ្នាក់ងារព័ត៌មានបារាំង AFP ថា ក្រុមហ៊ុន បានការបើកការស៊ើបអង្កេតមួយដើម្បីកំណត់ឲ្យបានជាក់ច្បាស់ថា តើការផ្ទុះនេះ បណ្តាលមកពីបញ្ហាបច្ចេកទេសឬមួយក៏មកពីសកម្មភាពវិច្ឆេទកម្ម ឬ ក៏ជាអំពើភេរវនិយម?
យោងតាមប្រភពយោធាលីប៊ីវិញ ដែលដកស្រង់ដោយទីភ្នាក់ងារព័ត៌មានអង់គ្លេស Reuters បានគូសបញ្ជាក់ប្រាប់ថា ជនប្រដាប់អាវុធមួយក្រុម បានធ្វើវិច្ឆេទកម្មដោយដាក់គ្រឿងផ្ទុះនៅតាមបណ្តោយបំពង់បង្ហូរប្រេងនោះ។
ប្រភពដដែលបានអះអាងទៀតថា បំពង់បង្ហូរប្រេងរងអន្តរាយនោះ ជាកម្មសិទ្ធិរបស់ក្រុមហ៊ុន Waha Oil ដែលជាសាខាមួយរបស់ជាតិលីប៊ី។ ម្យ៉ាងទៀត Waha Oil ដែលជាក្រុមហ៊ុនដៃគូរបស់ក្រុមហ៊ុនប្រេងអាមេរិកឈ្មោះ Hess និង Marathon Oil ធ្វើការបូមប្រេងក្នុងមួយថ្ងៃៗរហូតដល់ចំនួន ២៥ម៉ឺនធុងបារីលនៅក្នុងភាគខាងត្បូងប្រទេសលីប៊ី។
ហើយយោងតាមក្រុមហ៊ុនប្រេងជាតិលីប៊ីដដែល ការរងអន្តរាយនៅបំពង់បង្ហូរប្រេងនេះ ជម្រុញអោយជាតិលីប៊ីបាត់បង់ផលិតផលរបស់ខ្លួនប្រមាណជា៩ម៉ឺនធុងបារីលក្នុងមួយថ្ងៃៗឬប្រមាណជា ១០% នោះហើយដែលជម្រុញអោយតម្លៃប្រេងក្នុងមួយបារីលឡើងថ្លៃកប់ពពកនៅលើទីផ្សារប្រេងអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ