ប្រតិបត្តិការដឹកជម្លៀសប្រជាជនដែលត្រូវការជំនួយសង្គ្រោះជាបន្ទាន់ បានចាប់ផ្តើមនៅថ្ងៃពុធម្សិលមិញនៅ Ghouta
ក្រុមបុគ្គលិកអង្គការមនុស្សធម៌នានា បានចាប់ផ្តើមដឹកជម្លៀសប្រជាជនស៊ីរីដែលត្រូវការជំនួយសង្គ្រោះជាបន្ទាន់ចេញពីតំបន់Ghouta ភាគខាងកើតនៅថ្ងៃពុធម្សិលមិញ។ ជាតំបន់មួយដែលស្ថិតនៅជិតទីក្រុងដាម៉ាស និងជាទីដែលក្រុមឧទ្ទាមស៊ីរី នៅកាន់កាប់ទីតាំងនានានៅឡើយ-នេះជាការជូនដំណឹងរបស់គណៈកម្មាធិការរបស់អង្គការកាកបាទក្រហមអន្តរជាតិនៅថ្ងៃពុធទី២៧ធ្នូកាលពីម្សិលមិញ។ ប្រតិបត្តិការនេះ ត្រូវបានប្រព្រឹត្តទៅ បន្ទាប់ពីការរង់ចាំអស់រយៈពេលជាច្រើនខែកន្លងមកដែលនៅនាឱកាសនោះ ជនចំនួនយ៉ាងតិច១៦នាក់ត្រូវបានបាត់បង់ជីវិត-នេះបើយោងតាមអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ប្រតិបត្តិការដឹកជម្លៀសប្រជាជនស៊ីវីលស៊ីរីដែលត្រូវការជំនួយសង្គ្រោះពេទ្យជាបន្ទាន់ដោយបញ្ហាសុខភាពចុះដុនដាបនេះ ត្រូវបានទទួលការអនុញ្ញាតពីអាជ្ញាធរស៊ីរី បន្ទាប់ពីមានការចរចាគ្នាអស់រយៈពេលដ៏យូររួចមក។ ប្រតិបត្តិការនេះ ត្រូវបានដឹកនាំដោយអង្គការអឌ្ឈចន្ទក្រហមស៊ីរីផង គណៈកម្មាធិការអន្តរជាតិនៃអង្គការកាកបាទក្រហមនិងក្រុមអង្គការមនុស្សធម៌នានាផ្សេងទៀត។ យោងតាម អង្គការមនុស្សធម៌មួយឈ្មោះ Syrian american medical society ប្រជាជនចំនួន៤រូប ត្រូវបានគេដឹកជម្លៀសរួចហើយពីតំបន់ Ghouta ភាគខាងកើតប្រទេសស៊ីរី កាលពីយប់ថ្ងៃអង្គារឆ្លងមកថ្ងៃពុធម្សិលមិញ។ ចំណែកប្រតិបត្តិការដឹកជម្លៀសជនចំនួន ២៥នាក់ផ្សេងទៀតនឹងត្រូវប្រព្រឹត្តទៅនៅក្នុងរយៈពេលប៉ុន្មានថ្ងៃខាងមុខទឿត។
ការបើកឲ្យមានប្រតិបត្តិការដឹកជម្លៀសប្រជាជនស៊ីរីដែលត្រូវការជំនួយសង្ក្រោះពេទ្យជាបន្ទាន់ឡើងវិញនេះ បានបញ្ជាក់ផងដែរ ពីពន្លឺនៃក្តីសង្ឃឹមមួយ សម្រាប់ប្រជាជនចំនួន ៤០ម៉ឺននាក់ផ្សេងទៀតដែលកំពុងត្រូវជាប់ក្នុងតំបន់ឡោមព័ទ្ធក្នុងភាគខាងកើតនៃទីក្រុងដាម៉ាស ក្រោមការត្រួតត្រារបស់ពួកឧទ្ទាមស៊ីរី។
យោងតាមអង្គការស.ប.ជ.និងអង្គការនានាដទៃផ្សេងទៀត ប្រជាជនស៊ីរី នៅតំបន់Ghouta កំពុងជួបប្រទះនូវកង្វះខាតសម្ភារៈគ្រប់សព្វ។ រីឯករណីអត់ម្ហូបអាហារទទួលទាន វិញ ក៏ត្រូវបានគេជូនដំណឹងអោយដឹងដែរ។
នៅខណៈនេះ ក្រុមឧទ្ទាមស៊ីរី បានចោទប្រកាន់ទៅលើកងកម្លាំងរដ្ឋាភិបាលស៊ីរី ថាបានធ្វើការបិទខ្ទប់យ៉ាងជិតស្លុងនៅក្នុងតំបន់ ដោយហាមមិនឲ្យនាំចូលនូវផលិតផលស្បៀងអាហារ ថ្នាំពេទ្យ និងប្រេងឥន្ទនៈ ។ រីឯ របបស៊ីរីវិញ បានអះអាងថា គឺក្រុមឧទ្ទាមប្រដាប់អាវុធទេ ដែល បានស្តុកទុកស្បៀងអាហារ ប្រេងម៉ាស៊ូតនិងផលិតផលថ្នាំពេទ្យ សម្រាប់តែពួកគេប៉ុណ្ណោះ។ នៅក្នុងករណីទាំងពីរនេះ គឺមានតែប្រជាជនស៊ីវីលស្លូតត្រង់ តែប៉ុណ្ណោះ គត់ ដែលជាអ្នកត្រូវរងគ្រោះស្លាប់មុនគេនៅក្នុងសង្គ្រាមស៊ីវីលនៅស៊ីរីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ