នៅអារ៉ាប៊ី សាអូឌីត ជេរប្រមាថព្រះមហាក្សត្រ មានន័យស្មើនឹងការបង្កអំពើភេរវកម្ម
អង្គការការពារសិទ្ធិមនុស្សអន្តជាតិ Human Rights Watch នៅថ្ងៃព្រហស្បតិ៍ម្សិលមិញ បានចេញសេចក្តីថ្លែងការណ៍ ថ្កោលទោស ច្បាប់ប្រឆាំងភេរវកម្មថ្មី របស់ប្រទេសអារ៉ាប៊ី សាអូឌីត។ យោងទៅតាមច្បាប់ថ្មី ការជេរប្រមាថ ព្រះមហាក្សត្រ និងរាជបុត្រស្នងរាជ្យត្រូវគេចាត់ចូលជាការបង្កអំពើភេរវកម្ម និងអាចប្រឈមនឹងទោសជាប់ពន្ធនាគារ ពី៥ ទៅ១០ឆ្នាំ។
ចុះផ្សាយនៅថ្ងៃ៖
ប្រទេសមហាសេដ្ឋីប្រេង អារ៉ាប៊ី សាអូឌីត គ្មានកិត្តិនាមល្អទេ នៅក្នុងរឿងគោរពសិទ្ធិមនុស្ស។ សម្រាប់អង្គការការពារសិទ្ធិមនុស្សHuman Rights Watch ដែលមានទីតាំងនៅទីក្រុងញូវយ៉ក អារ៉ាប៊ី សាអូឌីត បានបង្កើនការរឹតបន្តឹង បិទសិទ្ធិសេរីភាពបញ្ចេញមតិ តាមរយៈសរសេរច្បាប់ថ្មី ដើម្បីប្រឆាំងភេរវកម្ម។
ច្បាប់ប្រឆាំងភេរវកម្មថ្មី ដែលបានចូលជាធរមាន តាំងពីខែវិច្ឆិកានេះនឹងចូលទៅជំនួសច្បាប់ចាស់ ដែលអារ៉ាប៊ីសាអូឌីត តាក់តែងឡើង នៅឆ្នាំ ២០១៤។ អង្គការការពារសិទ្ធិមនុស្សអន្តរជាតិបានរិះគន់ រហូតមក ច្បាប់ប្រឆាំងភេរវកម្មនៅអារ៉ាប៊ី សាអូឌីត ព្រោះថា និយមន័យទំលំទូលាយនៃពាក្យភេរវកម្ម បានបើកផ្លូវឲ្យអាជ្ញាធរអារ៉ាប៊ី សាអូឌីត បង្ក្រាបយ៉ាងចាស់ដៃ អ្នកប្រឆាំងនៅក្នុងប្រទេស។ ទៅតាមច្បាប់ចាស់ ការបង្កអសណ្តាប់ធ្នាប់សាធារណៈ ការធ្វើឲ្យសន្តិសុខរបស់សហគមន៍រង្គោះរង្គើ និងការប៉ុនប៉ងធ្វើឲ្យផ្អាកព្យួរច្បាប់ជាមូលដ្ឋានរបស់រដ្ឋាភិបាល ត្រូវចាត់ទុកជាសកម្មភាពភេរវកម្ម។ តាមអង្គការការពារសិទ្ធិមនុស្ស Human Rights Watch ដោយសារតែនិយមន័យទូលំទូលាយ អ្នកប្រឆាំងជាច្រើនត្រូវជាប់ក្នុងសំណាញ់ច្បាប់ និងទោសជាប់ពន្ធនារ របស់តុលាការដែលអនុវត្ត យោងច្បាប់ប្រឆាំងភេរវកម្ម។
ច្បាប់ប្រឆាំងភេរវកម្មថ្មី នៅរក្សាច្រើនខ្លឹមសាររបស់មាត្រាមុន ប៉ុន្តែ គ្រាន់តែបន្ថែម មាត្រាសំខាន់មួយចំនួន ដូចជា ការជេរប្រមាថ ព្រះមហាក្សត្រ និងរាជបុត្រស្នងរាជ្យ ត្រូវគេចាត់ទុកជាសកម្មភាពធ្វើភេរវកម្ម។ លើសពីនោះ ច្បាប់ថ្មី មានដាក់បញ្ចូលផងដែរ ទោសប្រហារជីវិត សម្រាប់ជនប្រព្រឹត្តអំពើភេរវកម្ម។
នៅខែឧសភាកន្លងទៅ ប្រេសិតពិសេសរបស់អង្គការសហប្រជាជាតិ ធ្លាប់បានអំពាវនាវឲ្យអារ៉ាប៊ី សាអូឌីត ឈប់ប្រើប្រាស់និយមន័យដ៏ទូលំទូលាយ នៃច្បាប់ភេរវកម្ម ដើម្បី វាយប្រហារ ចាប់ខ្លួន សកម្មជនការពារសិទ្ធិមនុស្ស អ្នកសរសេរBlog ឬអ្នកនិពន្ធ ដែលសរសេររិះគន់រដ្ឋាភិបាល។ អារ៉ាប៊ីសាអូឌីត នៅមិនទាន់មានប្រតិកម្មយ៉ាងណាទៅនឹងសេចក្តីថ្លែងការណ៍ របស់អង្គការ Human Rights Watchនៅឡើយទេ។ ជារឿងងាយយល់ ព្រោះថា អារ៉ាប៊ី សាអូឌីត ជាមហាសេដ្ឋីប្រេង ប៉ុន្តែ មានកេរ្តិ៍ឈ្មោះមិនល្អ ក្នុងរឿង រំលោភសិទ្ធិមនុស្សរហូតមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ