ឥណ្ឌូណេស៊ី ជម្លៀសប្រជាជនជាកិច្ចការពារគេចពីភ្នំភ្លើងសកម្ម
ប្រជាពលរដ្ឋជាង ៣៤០០០នាក់បាននាំគ្នាគេចខ្លួនពីតំបន់ជុំវិញភ្នំភ្លើងសកម្ម នៅកោះទេសចរណ៍ដ៏ល្បីល្បាញ បាលី ព្រោះភ្នំភ្លើង ហាក់មានសកម្មភាពកាន់តែសកម្មឡើងៗ អាចផ្ទុះឆេះជាលើកទីមួយ បន្ទាប់ពីសំងំអស់រយៈពេលជាងកន្លះសតវត្សរ៍។ នេះបើតាមការគូសបញ្ជាក់របស់អ្នកទទួលខុសត្រូវឥណ្ឌូណេស៊ី នៅថ្ងៃអាទិត្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ចំនួនពលរដ្ឋត្រូវជម្លៀសចេញពីផ្ទះសម្បែងមិនឆ្ងាយពីភ្នំភ្លើង បានកើនឡើងមួយទ្វេជាបី គិតចាប់ពីថ្ងៃសុក្រ ថ្ងៃដែលឥណ្ឌូណេស៊ីចេញក្រឹត្យអាសន្នកំពូលមក។ ហើយប្រតិបត្តិការជម្លៀសនៅតែបន្តធ្វើ ! ដូច្នេះចំនួនជនភៀសខ្លួននឹងត្រូវកើនឡើងទៀត។ នេះបើតាមសេចក្តីប្រកាសរបស់ភ្នាក់ងារជាតិគ្រប់គ្រងមហន្តរាយធម្មជាតិ។
អាកាសយានដ្ឋានអន្តរជាតិក្រុងបាលី ដែលទទួលភ្ញៀវទេសចររាប់លាននាក់ក្នុងមួយឆ្នាំៗ មិនទាន់ត្រូវប៉ះពាល់ដោយវិធានការការពារនេះទេ ប៉ុន្តែអាជ្ញាធរបានត្រៀមស្ថានការណ៍រួចជាស្រេចហើយ ក្នុងករណីត្រូវបិទជាបន្ទាន់ជាយថាហេតុណាមួយ។
ភ្នំភ្លើងAgung ស្ថិតនៅចម្ងាយប្រមាណ៧៥គីឡូម៉ែត្រពីទីក្រុងទេសចរណ៍ គូតា គ្រហឹមតាំងតែពីខែសីហាមក។ អាជ្ញាធរបានចេញអនុសាសន៍ឱ្យប្រជាពលរដ្ឋ ដកខ្លួនមកនៅឱ្យឆ្ងាយជាង៩គ.ម.ពីមាត់ភ្នំភ្លើង។
ពេញមួយសប្តាហ៍នេះ ការរញ្ជួយដីកំរិតទាបបានរំញ័រភ្នំភ្លើង ជាហេតុធ្វើឱ្យប្រជាពលរដ្ឋជាងមួយម៉ឺននាក់បង្ខំរត់ចោលផ្ទះ។ នៅថ្ងៃអាទិត្យ ការរញ្ជួយដីនៅតំបន់ភ្នំភ្លើងលែងសូវញាប់ តែហាក់ដូចជាមានកម្លាំងខ្លាំងជាងថ្ងៃមុនៗ។
សូមបញ្ជាក់ថាឥណ្ឌូណេស៊ីមានទីតាំងភូមិសាស្ត្រស្ថិតចំលើខ្សែក្រវ៉ាត់ភ្លើងនៃតំបន់ប៉ាស៊ីហ្វិក ដែលជាហេតុធ្វើឱ្យប្រទេសនេះងាយជួបគ្រោះរញ្ជួយដី និងភ្នំភ្លើងញយ។ ភ្នំភ្លើងអាគូន នេះធ្លាប់បានផ្ទុះឆេះឡើង កាលពីឆ្នាំ១៩៦៣ ដែលកាលណោះបានកំអែលភ្នំភ្លើងបានសម្លាប់ជីវិតមនុស្សអស់ជាង១ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ