ស៊ីរីប្រកាសជោគជ័យលើពួកជីហាតរដ្ឋអ៊ីស្លាម នៅអង្គការសហប្រជាជាតិ
បន្ទាប់ពីរំដោះបានក្រុង រ៉ាកា កងកម្លាំងរដ្ឋាភិបាលស៊ីរី បានដណ្តើមទីតាំងចុងក្រោយមួយទៀត ពីពួកអង្គការរដ្ឋអ៊ីស្លាម នៅថ្ងៃម្សិលមិញ។ មានន័យថា ស៊ីរីកំពុងបោះជំហានទៅរកជោគជ័យទាំងស្រុងលើពួកជីហាតរដ្ឋអ៊ីស្លាមហើយ។ នេះជាសេចក្តីប្រកាសរបស់រដ្ឋមន្ត្រីក្រសួងការបរទេសស៊ីរី នៅលើវេទិកាមហាសន្និបាតអង្គការសហប្រជាជាតិ ដោយបញ្ជាក់សេចក្តីសង្ឃឹមរបស់ខ្លួនបន្ថែមទៀតថា នឹងអាចរៀបចំដំណើរការគ្រប់គ្រងតំបន់រំដោះបានក្នុងពេលឆាប់ៗ។
ចុះផ្សាយនៅថ្ងៃ៖
“រំដោះបានក្រុងអាឡិប ប៉ាល់មៀរ រ៉ាកា គាល់រំលើងទីតាំងពួកជីហាតរដ្ឋអ៊ីស្លាមនៅ Deir Ez Zour និងកម្ចាត់កម្ចាយបានពួកភេរវនិយមចេញពីតំបន់មួយចំនួនធំរបស់ស៊ីរី បញ្ជាក់បានយ៉ាងច្បាស់ថា ស៊ីរីកំពុងមានជោគជ័យលើពួកអង្គការរដ្ឋអ៊ីស្លាមហើយ ! នេះជាប្រសាសន៍របស់លោករដ្ឋមន្ត្រីការបរទេសស៊ីរី ថ្លែងទៅកាន់អង្គមហាសន្និបាតអង្គការប្រជាជាតិ នៅយប់មិញ។
ជាការពិត នៅលើសមរភូមិ កងកម្លាំងរដ្ឋាភិបាស៊ីរី ទើបដណ្តើមកាន់កាប់បានទីតាំងចុងក្រោយ នៅភាគនីរតីនៃខេត្តរ៉ាកា កាលពីថ្ងៃសៅរ៍។ ឯទីតាំងធំនៅកណ្តាលក្រុងរ៉ាកា រដ្ឋធានីស្វ័យប្រកាសរបស់អង្គការរដ្ឋអ៊ីស្លាម ក៏ត្រូវបានកងកម្លាំងសម្ព័ន្ធប្រឆាំងនឹងពួកជីហាត គាំទ្រដោយសហរដ្ឋអាមេរិក គ្រប់គ្រងបាន នៅសប្តាហ៍នេះដែរ។ មូលដ្ឋានចុងក្រោយបង្អស់ ជារោងចក្រចម្រាញ់ប្រេងដ៏សំខាន់របស់ស៊ីរីនៅភាគខាងកើតប្រទេស ក៏ទើបត្រូវកងសម្ព័ន្ធអារ៉ាបគួដដណ្តើមបានដែរ។ ពោលគឺនៅសល់តែការបោសសម្អាត ពួកជីហាតរដ្ឋអ៊ីស្លាមទៀត ដែលសំងំលាក់ខ្លួន នៅតាមកន្លៀតកន្លុក ក្រោមដី តែប៉ុណ្ណោះ។
ពីលើវេទិកាអង្គការសហប្រជាជាតិ ប្រមុខការទូតស៊ីរី ក៏បានស្វាគមន៍តួនាទីស្ថាបនារបស់រុស្ស៊ី និងអ៊ីរ៉ង់ ជាសម្ព័ន្ធមិត្តរបស់រដ្ឋាភិបាល និងសង្ឃឹមថាអាចដាក់ឱ្យមានដំណើរតំបន់រំដោះ បានក្នុងពេលឆាប់ៗ។
ការគ្រប់គ្រងតំបន់រំដោះ ជាវិធានការបណ្តោះអាសន្ន ដែលមិនត្រូវរំលោភបំពានការបង្រួមបង្រួមដែនដីតែមួយទេ។ នេះបើតាមការបញ្ជាក់របស់លោករដ្ឋមន្ត្រី ដែលបានអះអាងទៀតថា វិធានការនេះបានចាប់ដំណើរការនៅខែកញ្ញានេះ នៅក្នុងខេត្តIdlib ក្រោមការតាមដានរបស់អ្នកសង្កេតការណ៍រុស្ស៊ី អ៊ីរ៉ង់ និងតួកគី។
រុស្ស៊ី តួកគី និងអ៊ីរ៉ង់ បានដឹកនាំចរចាតាំងពីជាច្រើនខែមកហើយនៅក្រុងAstana ដើម្បីបញ្ចុះភាពតានតឹងនៅក្នុងប្រទេសស៊ីរី ដែលកំពុងហែកហួរដោយភាគីបក្សដិបក្សជាច្រើន (មិនរាប់ពួកអង្គការរដ្ឋអ៊ីស្លាម) ទន្ទឹមនឹងដំណើរការដោះស្រាយវិបត្តិតាមផ្លូវការទូត ដឹកនាំដោយអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ