រដ្ឋាភិបាលអ៊ីស្រាអែល ចង់បិទការិយាល័យរបស់បណ្តាញទូទស្សន៍ Al-Jazeera
ប្រទេស អ៊ីស្រាអែល ទើបបានជូនដំណឹងកាលពីថ្ងៃអាទិត្យ៦សីហាម្សិលមិញ អំពីចេតនារបស់ខ្លួនដើម្បីបិទការរិយាល័យរបស់បណ្តាញទូរទស្សន៍កាតាឈ្មោះ ” Al-Jazeera” ។ Al-Jazeera ដែលត្រូវបានអាជ្ញាធរអ៊ីស្រាអែល ចោទថា”ពន្យុះ ឲ្យកើតមានអំពើហឹង្សានៅលើទឹកដីអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ជាថ្មីម្តងទៀត បណ្តាញទូរទស្សន៍ Al-Jazeera ត្រូវស្ថិតនៅក្នុងការត្រួតពិនិត្យយ៉ាងល្អិតល្អន់បំផុតពីសំណាក់រដ្ឋាភិបាលអ៊ីស្រាអែល។ លើកនេះ គឺក្រសួងទំនាក់ទំនងរបស់អ៊ីស្រាអែល ដែលនឹងស្នើលុបចោលការទទួលស្គាល់ជាផ្លូវការនៃក្រុមអ្នកកាសែតរបស់ Al-Jazeera ក៏ព្រមទាំងការបញ្ឈប់ការតភ្ជាប់ខ្សែកាបនិងផ្កាយរណបរបស់ខ្លួនទៀតផង។
ទន្ទឹមនេះ ក្រសួងទំនាក់ទំនងរបស់អ៊ីស្រាអែល នៅក្នុងសេចក្តីជូនដំណឹងមួយរបស់ខ្លួន បានគូសបញ្ជាក់ថា “នៅក្នុងអំឡុងពេលចុងក្រោយនេះ បណ្តាប្រទេសអារ៉ាបទាំងអស់នៅឈូងសមុទ្រពែក្ស ជាអាទិ៍ អារ៉ាប៊ីសាអូឌីត អេហ្ស៊ីបនិងហ្ស៊កដានី បានធ្វើការសន្និដ្ឋានរួមគ្នាថា” Al-Jazeera “បានញុះញង់ជម្រុញឲ្យមានអំពើភេរវនិយមនិងភាពជ្រុលនិយមក្នុងផ្លូវសាសនា”។ នៅក្នុងស្ថានភាពបែបនេះ គឺវាមិនទំនងទាល់តែសោះ ដែលយើងទុកឲ្យបណ្តាញទូរទស្សន៍នេះ នៅបន្តការផ្សព្វផ្សាយព័ត៌មាននៅលើទឹកដីអ៊ីស្រាអែល"។
ក្រសួងទំនាក់ទំនងរបស់អ៊ីស្រាអែល ដដែល បានគូសបញ្ជាក់ទៀតថា “ក្រសួងសន្តិសុខជាតិអ៊ីស្រាអែលនឹងចាប់ផ្តើមធ្វើនិតិវិធីមួយ ដើម្បីបិទការរិយាល័យរបស់ Al-Jazeera នៅលើទឹកដីអ៊ីស្រាអែល”។
កាលពីសប្តាហ៍មុន រដ្ឋមន្ត្រីក្រសួងទំនាក់ទំនងអ៊ីស្រាអែល លោក Ayoub Kara បានជូនដំណឹងដែរ អំពីចេតនារបស់លោកដើម្បីបិទការរិយាល័យរបស់បណ្តាញ Al-Jazeera។ គម្រោងនេះ ត្រូវបានលោក Netanyahu នាយករដ្ឋមន្ត្រីអ៊ីស្រាអែល អបអរសាទរ និងវាយតម្លៃថា ជា"វិធានការជាក់ស្តែងមួយដើម្បីលុបបំបាត់”ការពន្យុះអំពើភេរវនិយម” នៅលើទឹកដីអ៊ីស្រាអែល។
គួររំលឹកថា លោក Netanyahu ធ្លាប់បានដៀលត្មះបណ្តាញទូរទស្សន៍ Al-Jazeera នេះរួចមកហើយ នៅអំឡុងពេលផ្ទុះវិបត្តិឡើងនៅលើទីលានព្រះវិហារអ៊ីស្លាម ដោយលោកចាត់ទុកថា” Al-Jazeera នេះ ធ្វើការពន្យុះផងដែរ ឲ្យមានភាពតានតឹងនៅជុំវិញទីកន្លែងសក្ការៈបូជានានានៅក្នុងទីក្រុង Jérusalem៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ