នាយករដ្ឋមន្ត្រីអ៊ីស្រាអែលរងសម្ពាធកាន់តែខ្លាំងក្នុងបទសង្ស័យពុករលួយ
តើនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ នឹងអាចខ្ទាតចេញពីតំណែងឬ នៅលើកនេះ ? អតីតសហការីដ៏ជំនិតរបស់លោក បានព្រមព្រៀង នៅល្ងាចមិញ ជាមួយតុលាការ ធ្វើជាសាក្សី ដាក់បន្ទុកប្រឆាំងនឹងលោកនាយករដ្ឋមន្ត្រី ក្នុងសំណុំរឿងសង្ស័យពុករលួយពីរ។ លោកនេតាន់យ៉ាហ៊ូ បានចេញមុខបដិសេធច្រានចោលរាល់ពាក្យចោទប្រកាន់តែទាំងនោះ ប៉ុន្តែការបំប៉ោងព័ត៌មានទាក់ទងនឹងជោគវាសនាជាប្រមុខរដ្ឋាភិបាលមានគ្រប់យ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
ការសង្ស័យលើលោកនាយករដ្ឋមន្ត្រីដែលមានពីមុន ហាក់ដូចជាកំពុងចាប់ផ្តើមរំលេចរូបភាពកាន់តែច្បាស់ឡើងៗ។ សំណុំរឿងពុករលួយបានវិវឌ្ឍន៍ចូលដំណាក់កាលថ្មី ដោយលើកនេះមានប្រភពចេញពីមនុស្សដែលធ្លាប់ជាជំនិត របស់លោកតែម្តង។
ម្សិលមិញ អតីតសហការីរបស់លោកនាយករដ្ឋមន្ត្រីដែលត្រូវតុលាការចាប់ខ្លួនកាលពីឆ្នាំ២០១៥ ពីបទពុករលួយដែរ និងដើម្បីទទួលការបន្ធូរបន្ថយទោសខ្លួនឯង បានចុះហត្ថលេខាព្រមព្រៀងជាមួយតុលាការ ធ្វើជាសាក្សីដាក់បន្ទុកប្រឆាំងនឹងលោកនាយករដ្ឋមន្ត្រី ក្នុងសំណុំរឿងអង្កេតពុករលួយពីរករណី។
ប៉ូលិសអ៊ីស្រាអែល សង្ស័យ និងធ្លាប់កោះហៅលោកនេតាន់យ៉ាហ៊ូមកសួរចម្លើយម្តងហើយ កាលពីដើមឆ្នាំ ពីបទពុករលួយនិងកេងបន្លំ ដោយបានទទួលកាដូខុសច្បាប់ពីអ្នកជំនួយជាតិនិងអន្តរជាតិ ព្រមទាំងបានលួចចុះកិច្ចព្រមព្រៀងដោយស្ងាត់ៗជាមួយម្ចាស់សារព័ត៌មានជាតិអ៊ីស្រាអែល ដើម្បីឱ្យកាសែតនេះចុះផ្សាយតែព័ត៌មានល្អៗលើកតម្កើងលោកនាយករដ្ឋមន្ត្រី។
តុលាការអ៊ីស្រាអែល ក៏បានទទួលការព្រមព្រៀងពីសាក្សីម្នាក់ទៀត មកដាក់បន្ទុកលើរូបលោកនេតាន់យ៉ាហ៊ូដែរ តែលើកនេះគឺក្នុងសំណុំរឿងទិញនាវាមុជទឹកអាល្លឺម៉ង់។ ដំណឹងនេះ បើតាមប្រភពសារព័ត៌មានអ៊ីស្រាអែលដដែល ធ្លាក់មកជួនចំពេលដែលភរិយារបស់លោកនេតាន់យ៉ាហ៊ូ ទើបត្រូវបានប៉ូលិសកោះហៅទៅសួរចម្លើយ ពីបទជាប់សង្ស័យបង្វិលលុយសាធារណៈទៅចំណាយក្នុងកិច្ចការឯកជន។
ឡើងកាន់អំណាចតាំងពីឆ្នាំ២០០៩ លោកនេតាន់យ៉ាហ៊ូ ដែលគេមើលឃើញថានឹងបន្តអាណត្តិជានាយករដ្ឋមន្ត្រីជាថ្មីទៀត បានចេញមុខបដិសេធរាល់ការចោទប្រកាន់ និងអះអាងអំពីភាពស្អាតស្អំរបស់លោក។ ប៉ុន្តែទោះជាយ៉ាងដូច្នេះ ក៏អ្នកធ្វើអត្ថាធិប្បាយជាច្រើនបានឱកាសនាំគ្នាស្រែកថាដល់វេលាដែលត្រូវប្តូរនាយករដ្ឋមន្ត្រី។ ពាក្យចចាមអារាមស្តីពី ការលាលែងចេញពីតំណែងនិងបោះឆ្នោតមុនអាណត្តិបាននិងកំពុងបន្តផុសផុលយ៉ាងខ្លាំង។
សូមបញ្ជាក់ថានេះមិនមែនជាលើកទីមួយទេ ដែលលោកនាយករដ្ឋមន្ត្រីនេតាន់យ៉ាហ៊ូ វ័យ៦៧ឆ្នាំ ជាប់សង្ស័យពុករលួយនោះ។ នៅលើកនេះ ថ្វីបើទម្ងន់សម្ពាធមានខ្លាំងមែន តែរដ្ឋមន្ត្រីក្រសួងយុត្តិធម៌បានចេញមុខការពារ រួចទៅហើយថាទោះបីជាតុលាការធ្វើការចោទប្រកាន់ក្តី ក៏លោកនេតាន់យ៉ាហ៊ូគ្មានកាតព្វកិច្ច តាមផ្លូវច្បាប់ត្រូវលាលែងចេញពីតំណែងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ