អ៊ីស្រាអែលហាមមនុស្សប្រុសអាយុក្រោម៥០ឆ្នាំ ចូលទៅទីសក្ការៈអ៊ីស្លាមនៅហ្ស៊េរុយហ្សាឡិម
ថ្ងៃសុក្រនេះ ជាថ្ងៃសូត្រធម៌សម្រាប់អ្នកកាន់សាសនាអ៊ីស្លាម តែអ៊ីស្រាអែលបានបន្ថែមភាពតានតឹងជាថ្មីមកវិញ ដោយបានហាមមនុស្សប្រុសអាយុក្រោម៥០ឆ្នាំ មិនអោយចូលទៅទីសក្ការៈអ៊ីស្លាម នៅក្រុងហ្ស៊េរុយហ្សាឡិម។ អ៊ីស្រាអែលទើបតែបានព្រមបន្ថយភាពតានតឹងជាមួយប៉ាឡេស្ទីន ក្រោយបានដកទ្វារសុវត្ថិភាពសន្តិសុខ ចេញពីច្រកចូលទៅវិហារសូត្រធម៌អ៊ីស្លាមប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ថ្ងៃសុក្រនេះ ជាថ្ងៃសូត្រធម៌របស់ប្រជាជនប៉ាឡេស្ទីន ប៉ុន្តែមនុស្សប្រុសអាយុក្រោម៥០ឆ្នាំ ត្រូវបានអ៊ីស្រាអែលហាមចូលទៅទីលានវិហារអ៊ីស្លាម នៅក្រុង ហ្ស៊េរុយហ្សាឡិម។ មនុស្សប្រុសអាយុ៥០ឆ្នាំឡើងទៅ និងមនុស្សស្រីគ្រប់វ័យទើបអាចចូលទៅបាន។ អ៊ីស្រាអែលលើកឡើងថា បានវាយតម្លៃផ្នែកសន្តិសុខ និងមានសញ្ញាថា អាចនឹងមានបាតុកម្ម រឺចលាចលនៅទីសក្ការៈសូត្រធម៌មួយនេះ។ អ៊ីស្រាអែលហាមប្រាមដូច្នេះ ដោយសារតែម្សិលមិញនេះដែរ អ្នកកាន់សាសនាអ៊ីស្លាមរាប់ពាន់នាក់ ដែលចូលទៅសូត្រធម៌នៅវិហារអ៊ីស្លាមនៅទីនោះ បានប៉ះទង្គិចគ្នា ជាមួយប៉ូលិសអ៊ីស្រាអែល។ ការប៉ះទង្គិច ធ្វើអោយមានមនុស្សជាង១០០នាក់រងរបួស។
អ៊ីស្រាអែលហាមឃាត់មនុស្សប្រុសអាយុក្រោម៥០ឆ្នាំ មិនអោយចូលទៅវិហារសូត្រធម៌ នៅហ្សេរុយហ្សាឡិម ថ្ងៃសុក្រនេះ មិនអាចកាត់បន្ថយភាពតានតឹងជាមួយប៉ាឡេស្ទីនទេ។ ប្រជាជនប៉ាឡេស្ទីនទើបបានសម្រេចចិត្តនាំគ្នាត្រលប់ចូលមកសូត្រធម៌នៅទីនេះវិញ នៅថ្ងៃព្រហស្បតិ៍ម្សិលមិញប៉ុណ្ណោះ។ ពួកគេបានធ្វើពហិការចូលទីសក្ការៈមួយនេះ អស់២សប្តាហ៍ហើយ។ ពួកគេសម្រេចចូលមកសូត្រធម៌វិញ ព្រោះអ៊ីស្រាអែលបានដកចេញវិធានការសន្តិសុខ ដកទ្វារសុវត្ថិភាពដែលចាប់សញ្ញាលោហធាតុ និងជាតិអាវុធ ពីទីនោះ។ ទ្វារសុវត្ថិភាពនេះ ត្រូវបានអ៊ីស្រាអែលដាក់ឡើង ក្រោយពេលប៉ូលិសអ៊ីស្រាអែល២នាក់ ស្លាប់ក្នុងការវាយប្រហារពីសំណាក់ជនជាតិប៉ាឡេស្ទីន កាលពីថ្ងៃ១៤កក្កដា។
វិធានការសន្តិសុខអ៊ីស្រាអែលបានបង្កអោយមានកំហឹងពីប្រទេសហ្ស៊កដានី ដែលជាអ្នកគ្រប់គ្រងទីលានសក្ការៈហ្សេរុយហ្សាឡិម ស្របច្បាប់។ ជនជាតិហ្ស៊កដានីម្នាក់បានចាក់ប៉ូលិសអ៊ីស្រាអែល នៅស្ថានទូតអ៊ីស្រាអែល នៅហ្ស៊កដានី ធ្វើអោយប៉ូលិសអ៊ីស្រាអែលបាញ់សម្លាប់គាត់នោះវិញ។ ដោយសារស្ថានការណ៍តានតឹងពេក ទើបអ៊ីស្រាអែលបានសម្រេចដកទ្វារសុវត្ថិភាពសន្តិសុខនេះចេញទៅវិញ កាលពីថ្ងៃអង្គារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ