អង្គការHuman Rights Watchចោទកងកម្លាំងអ៊ីរ៉ាក់ពីបទឧក្រិដ្ឋសង្គ្រាមនៅមូស៊ូល
អង្គការសិទ្ធិមនុស្សHuman Rights Watchបានចោទកងកម្លាំងអ៊ីរ៉ាក់មួយក្រុម ដែលទទួលបានការបណ្តុះបណ្តាលពីអាមេរិក ថាបានបង្កបទឧក្រិដ្ឋសម្លាប់អ្នកទោស នៅមូស៊ូល ភាគខាងជើងអ៊ីរ៉ាក់។ អង្គការបានអំពាវនាវអោយអាមេរិកព្យួរជំនួយសម្រាប់កងទាហានមួយនេះ ក្នុងពេលរង់ចាំអោយមានការស៊ើបអង្កេត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
អង្គការសិទ្ធិមនុស្សHuman Rights Watch ចោទទាហានអ៊ីរ៉ាក់មកពីកងពល១៦ ពីបទឧក្រិដ្ឋសង្គ្រាម ចោទថាទាហានមួយក្រុមនេះ បានសម្លាប់អ្នកទោសច្រើននាក់នៅមូស៊ូល។ Human Rights Watch បានទទួលភស្តុតាងជាច្រើនបង្ហាញទង្វើកងកម្លាំងអ៊ីរ៉ាក់នៃកងពលនេះ។ ក្រុមទាហានកងពល១៦បានទទួលការបណ្តុះបណ្តាលពីអាមេរិក។ កងទ័ពអ៊ីរ៉ាក់ទើបតែបានប្រកាសជោគជ័យលើក្រុមភេរវជនរដ្ឋអ៊ីស្លាម នៅមូស៊ូល កាលពីថ្ងៃ១១កក្កដាកន្លងទៅប៉ុណ្ណោះ។
មានភស្តុតាងជារូបភាពវិដេអូជាច្រើន ចុះផ្សាយក្នុងអ៊ីនធ័រនែត បានបង្ហាញថាទាហានអ៊ីរ៉ាក់មួយក្រុមនេះ បានសម្លាប់អ្នកទោសយ៉ាងព្រៃផ្សៃ។ វីដេអូទាំងនេះប្រហែលជាបានថត នៅមូស៊ូល។ ក្នុងវីដេអូ គេឃើញទាហានវាយធ្វើបាបអ្នកទោសម្នាក់ ហើយយកគាត់ទៅទំលាក់ពីច្រាំងថ្ម ចុះទៅក្រោមព្រមទាំងបាញ់ទៅលើគាត់ថែមទៀតផង។ រូបភាពវីដេអូផ្សេងទៀតបង្ហាញថា ទាហាននិងប៉ូលិសអ៊ីរ៉ាក់បាននាំគ្នាវាយធ្វើបាបអ្នកទោស។
អ្នកសង្កេតការបរទេស២រូបបានប្រាប់អង្គការសិទ្ធិមនុស្សដែរថា កាលពីពាក់កណ្តាលខែកក្កដានេះ ពួកគេឃើញទាហានច្រើននាក់ មកពីកងកម្លាំងអ៊ីរ៉ាក់ដែលអាមេរិកបណ្តុះបណ្តាល បាននាំខ្លួនបុរស៤នាក់ ដែលមានខ្លួនននោលគកចេញទៅ ហើយក្រោយមកអ្នកសង្កេតការណ៍បរទេសទាំង២រូបនេះ បានលឺស្នូរកាំភ្លើងច្រើនគ្រាប់។ អ្នកសង្កេតការណ៍បរទេសប្រាប់ដែរថា មានមនុស្សច្រើននាក់ត្រូវបានទាហានសម្លាប់ ក្នុងនោះមានកុមារតូចម្នាក់ទៀតផង។ អ្នកកាសែតអ៊ីរ៉ាក់ម្នាក់ក៏ធ្លាប់ប្រាប់ដែរថា ទាហានទាំងនេះបានបង្កបទឧក្រិដ្ឋដូចជាធ្វើទារុណកម្ម បំពានភេទរឺក៏សម្លាប់មនុស្សជាដើម។
សូមបញ្ជាក់ថា ក្រុងមូស៊ូលដែលកងទ័ពអ៊ីរ៉ាក់រំដោះបាន សំបូរអ្នកកាន់និកាយស៊ុននីតរស់នៅ។ ចំណែកកងកម្លាំងអ៊ីរ៉ាក់ដែលរងការសង្ស័យថា បំពានធ្វើបាបអ្នកទោសទាំងនោះ ច្រើនជាអ្នកកាន់និកាយស្ហ៊ីអ៊ីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ