អាជ្ញាធរប៉ាឡេស្ទីនប្រកាសផ្តាច់ការទាក់ទងផ្លូវការជាមួយអ៊ីស្រាអែល
ចុះផ្សាយនៅថ្ងៃ៖
ស្តាប់ - ០៥:៤០
ជម្លោះអ៊ីស្រាអែល-ប៉ាឡេស្ទីន នៅតំបន់ដើមបូព៌ា កំពុងស្គាល់ភាពតឹងជាថ្មី។ មានស្លាប់ សរុប ៦នាក់ បីនាក់ជាអ៊ីស្រាអែល បីនាក់ជាប៉ាឡេស្ទីន នៅស៊ីហ្សកដានី និងនៅក្រុងហ្សេរ៉ុយសាឡិម បន្ទាប់ពីមានអំពើហិង្សាប្រឈមមុខគ្នារវាងបាតុករប៉ាឡេស្ទីននិងកងរក្សាសន្តិសុខអ៊ីស្រាអែល នៅរសៀលថ្ងៃសុក្រ ថ្ងៃសូត្រធម៌របស់សាសនិកជនអ៊ីស្លាម។ ប្រធានាអាជ្ញាធរប៉ាឡេស្ទីន លោក ម៉ាមូត អាបាស បានប្រកាសបង្កករាល់គ្រប់ទំនាក់ទំនងផ្លូវការជាមួយអ៊ីស្រាអែល។
ប្រធានអាជ្ញាធរប៉ាឡេស្ទីន លោក ម៉ាមូត អាបាស ដែលមានទម្លាប់សំងំនៅក្នុងការិយាល័យ នៅក្រុងរ៉ាម៉ាឡះ នៃតំបន់ស៊ីហ្ស័កដានី បង្ហាញមុខតាមកញ្ចក់ទូរទស្សន៍ យ៉ាងកម្របំផុត និងផ្តល់សេចក្តីថ្លែងការណ៍ដោយផ្ទាល់ យ៉ាងតិចតួចបំផុត។ ដូច្នេះ នៅពេលណាដែលលោកបង្ហាញវត្តមាននៅចំពោះមុខប្រជាជាតិ នោះគឺជាសញ្ញា ប្រាប់ ថា មានការណ៍ធំ មានសំណុំរឿងរសើបខ្លាំង និងមានសារសំខាន់ ត្រូវផ្តល់ដំណឹងជូនពលរដ្ឋប៉ាឡេស្ទីនហើយ។
នៅក្នុងសុន្ទរកថាយប់មិញ លោក ម៉ាមូត អាបាស បានប្រកាសផ្អាកទំនាក់ទំនងជាផ្លូវការជាមួយអ៊ីស្រាអែល គ្រប់កំរិតទាំងអស់ ! កិច្ចសហប្រតិបត្តិការសន្តិសុខរវាងអ៊ីស្រាអែលនិងប៉ាឡេស្ទីន ក៏ត្រូវព្យួរដែរ។ ដូច្នេះ ចាប់ពេលនេះទៅ ទំនងជាគ្មានទៀតទេ ការផ្តោះប្តូរការណ៍សម្ងាត់ និងយុទ្ធនាការដែលត្រូវឆ្លងកាត់ការពិគ្រោះយោបល់គ្នានោះ។
យុទ្ធនាការនិងកិច្ចសហប្រតិបត្តិការសន្តិសុខអ៊ីស្រាអែល-ប៉ាឡេស្ទីន ទើបកកើតជារូបរាងថ្មីថ្មោង ជាក្តីសង្ឃឹមថ្មី និងបានទទួលការអបអរសរសើរពីសហរដ្ឋអាមេរិកខ្លាំង។ ការដែលអ៊ីស្រាអែល និងប៉ាឡេស្ទីន អាចកាន់ដៃគ្នារក្សាសន្តិសុខ វាជាអាវុធដ៏ប្រពៃ និងមានប្រសិទ្ធិភាពបំផុត ក្នុងការទប់ស្កាត់អំពើហិង្សាក្នុងតំបន់។ តែបើលុបវាចោលនោះ ហានិភ័យនៃការវាយប្រហារសងសឹកគ្នា ពិតជានឹងអាចកើនឡើងខ្លាំង។
ការបង្ហាញវត្តមាននិងថ្លែងសុន្ទរកថាជាតិ របស់ប្រធានអាជ្ញាធរដែនដីប៉ាឡេស្ទីនយប់មិញ អាចជាមធ្យោបាយមួយនៃការរុញច្រានរដ្ឋបាលអាមេរិក ព្រមទាំងសហគមន៍អន្តរជាតិ ឱ្យជួយដាក់សម្ពាធលើរដ្ឋាភិបាលអ៊ីស្រាអែល ឱ្យដកវិធានការប្រឆាំងនឹងជនប៉ាឡេស្ទីន។ លោក អាប៉ាស បានដាក់លក្ខខណ្ឌថា ដរាបណាអ៊ីស្រាអែលមិនលុបចោលវិធានការប្រឆាំងនឹងពលរដ្ឋប៉ាឡេស្ទីន និងនៅវិហារអ៊ីស្លាមទេ ដកទ្វារចាប់ជាតិផ្ទុះឬអាវុធចេញពីទីលានសក្តិសិទ្ធនៅទីក្រុងហ្សេរ៉ុយសាឡិមទេ គ្មានទេការទាក់ទងជាផ្លូវការរវាងគ្នា។
ហាមប៉ាឡេស្ទីនអាយុក្រោម៥០ឆ្នាំចូលវិហារ
ក្រោយពីមានហេតុការណ៍ជនអារ៉ាបអ៊ីស្រាអែលបីនាក់ បានសម្លាប់ប៉ូលិសអ៊ីស្រាអែលពីរនាក់នៅថ្ងៃទី ១៤កក្កដា ២០១៧មក អាជ្ញាធរអ៊ីស្រាអែល បានចេញក្រិត្យចាត់វិធានការ យ៉ាងតឹងតែងការពារសុវត្ថិភាពតំបន់ក្រុងចាស់ហ្សេរ៉ុយសាឡិម ដែលជាទឹកដីសក្តិសិទ្ធិ មានវិហារអ៊ីស្លាម និងទីភ្នំសក្ការៈរបស់អ្នកកាន់សាសនាជ្វីហ្វ (អ៊ីស្រាអែល) ដោយដាក់ ទ្វារសុវត្ថិភាព ចាប់ជាតិផ្ទុះនិងអាវុធ នៅច្រកចូលទីលាន។
សម្រាប់អ៊ីស្រាអែល វិធានការនេះ ធ្វើឡើងដើម្បីទប់ស្កាត់កុំឱ្យមានការកាត់អាវុធ លោកហៈ ចូលទៅដល់កន្លែងប្រារព្ធសាសនា។ អ៊ីស្រាអែលក៏បានចេញបម្រាមហាមឃាត់មិនឱ្យជនប៉ាឡេស្ទីនប្រុសអាយុក្រោម៥០ឆ្នាំចូល ទៅកាន់វិហារនោះឡើយ។
ប៉ាឡេស្ទីនស្លាប់បីនាក់ របួសជាង៤៥០នាក់
វិធានការនេះបានធ្វើប្រជាប៉ាឡេស្ទីនខឹងសម្បារខ្លាំងណាស់ និងបានប្រមូលផ្តុំគ្នាជាកម្លាំងរួម ធ្វើបាតុកម្មប្រឆាំងនៅ ក្រុងហ្សេរ៉ុយសាឡិម ជុំវិញវិហារ។ នៅថ្ងៃសុក្រ ដែលជាថ្ងៃសូត្រធម៌តាមទម្លាប់អ៊ីស្លាមមកដល់ ជនប៉ាឡេស្ទីនទាំងចាស់ទាំងក្មេង បានសម្រេចចិត្តនាំគ្នាសូត្រធម៌ ក្រាបនៅតាមផ្លូវ សាធារណៈ និងមុខច្រកផ្លូវចូលវិហារទាំងអស់គ្នា។
ក្រោយពិធីសូត្រធម៌ដែលប៉ូលិសអ៊ីស្រាអែលឈរព័ទ្ធធ្វើជារបង ចប់ ការប៉ះទង្គិចដោយហិង្សាក៏បានផ្ទុះឡើង និងបង្កឱ្យមានអ្នករងរបួសដោយគ្រាប់ជ័រ យ៉ាងហោច១១០នាក់។
ជាសរុបមានស្លាប់ជនប៉ាឡេស្ទីនបីនាក់ ក្នុងនោះពីរនាក់មានអាយុទើបតែ១៧ និង១៨ឆ្នាំ ដោយត្រូវគ្រាប់កាំភ្លើងរបស់ប៉ូលិសអ៊ីស្រាអែល នៅហ្សេរ៉ុយសាឡិមខាងកើត ឆ្ងាយបន្តិចពីទីលានសក្តិសិទ្ធិ។ អ្នកទីបីស្លាប់នៅស៊ីហ្ស័កដានី ដោយស្នាដៃប៉ូលិសអ៊ីស្រាអែលដែរ ដែលបាញ់គ្រាប់ពិតចំបេះដូង។ បើតាមកាកបាទក្រហម ក្នុងមួយថ្ងៃសុក្រម្សិលមិញ គេរាប់ឃើញមានអ្នករងរបួស ៤៥០នាក់ ក្នុងការប៉ះទង្គិចជាមួយប៉ូលិសអ៊ីស្រាអែល នៅហ្សេរ៉ុយសាឡិមខាងកើត នៅក្រុងចាស់ហ្សេរ៉ុយសាឡិម និងនៅស៊ីហ្ស័កដានី។ ហើយនៅតំបន់ហ្កាហ្សា មានរបួស៤០នាក់ដែរ ដោយការត្រូវគ្រាប់កាំភ្លើងប៉ូលិសអ៊ីស្រាអែល។
អ៊ីស្រាអែលបីនាក់ស្លាប់
ហើយក្រោយសេចក្តីប្រកាសរបស់លោកប្រធានអាជ្ញាធរភ្លាម អ៊ីស្រាអែលក៏ប្រកាសថាមានពលរដ្ឋខ្លួនបីនាក់ដែរបានស្លាប់ គឺដោយស្នាដៃរបស់ជនប៉ាឡេស្ទីនដែលលួចចូលធ្វើឃាតជនអ៊ីស្រាអែលដល់ផ្ទះ ក្នុងតំបន់អាណានិគមកិច្ចអ៊ីស្រាអែល សម្លាប់ឪពុកនិងកូនពីរនាក់ ដែលកំពុងជួបជុំគ្រួសារទទួលទានអាហារពេលល្ងាច តាមប្រពៃណី។
ជនដៃដល់ប៉ាឡេស្ទីនដែលមានអាយុទើបតែ២០ឆ្នាំនេះ បានសរសេរសារលើប្រព័ន្ធសង្គមហ្វេសប៊ុកថា “ខ្ញុំមានអាយុ២០ឆ្នាំ តែក្រោយវិធានការនៅវិហារអ៊ីស្លាមនៅក្រុងចាស់ហ្សេរ៉ុយសាឡិម ខ្ញុំគ្មានជីវិតទៀតឡើយ។”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ