អារ៉ាប៊ីី សាអួឌីតផ្លាស់ប្តូររាជបុត្រស្នងរាជ្យដែលមានវ័យក្មេងត្រឹម៣១ឆ្នាំ
នៅថ្ងៃពុធនេះ ព្រះមហាក្សត្រអារ៉ាប៊ីសាអ៊ូឌីត ផ្លាស់ប្តូររាជទាយាទដោយដកសិទ្ធស្នងរាជពីក្មួយមកដាក់ឲ្យកូនប្រុសវិញ។ ព្រះអង្គម្ចាស់ Mohammed ben Salmane ដែលជារដ្ឋមន្ត្រីក្រសួងកាពារជាតិនឹងក្លាយជារាជបុត្រស្នងរាជ្យទីមួយវិញ ជំនួសបងប្រុសជីដូនមួយគឺព្រះអង្គម្ចាស់ Mohamed bin Nayef។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ព្រះរាជ្យក្រឹត្យតែងតាំងព្រះអង្គម្ចាស់ Mohammed ben Salmane ជារាជបុត្រស្នងរាជ្យថ្មី បានបង្កឲ្យមានការភ្ញាក់ផ្អើលយ៉ាងខ្លាំងនៅទូទាំងអារ៉ាប៊ីសាអ៊ូឌីតដោយហេតុថាព្រះអង្គម្ចាស់នេះ មានវ័យក្មេងអាយុត្រឹមតែ៣១ព្រះវស្សា។
មុននឹងត្រូវតែងតាំងជារាជបុត្រស្នងរាជថ្មី ព្រះអង្គម្ចាស់ នេះ ធ្លាប់មានកេរ្តិ៍ឈ្មោះដ៏ល្បីល្បាញ ថាជាបុគ្គលដ៏ឆ្លាតវៀងវ័យដ៏អសារ្យនិងក្តោបក្តាប់បានយ៉ាងល្អឥតខ្ចោះ សំណុំឯកសារនានារបស់ខ្លួន។
រាជទាយាទថ្មីនេះ ក៏មានឥទ្ធិពលខ្លាំងក្លាដែរទៅលើបិតារបស់ទ្រង់គឺព្រះមហាក្សត្រ Salmane ដែលបច្ចុប្បន្នមានព្រះជន្ម ៨១ព្រះវស្សាទៅហើយ។មិនតែប៉ុណ្ណោះ ព្រះអង្គ ក៏ជាអ្នកផ្តួចផ្តើមគំនិតមុនគេនៅក្នុងការតាក់តែងកម្មវិធីកំណែទម្រង់សេដ្ឋកិច្ចដ៏ធំធេងមួយសំរាប់ប្រទេសជាតិផង។
ក្រៅពីមុខតំណែងជាឧបនាយករដ្ឋមន្ត្រីនិងរដ្ឋមន្ត្រីការពារជាតិ រាជទាយាទថ្មីអារ៉ាប៊ីសាអ៊ូឌីត ក៏មានតួនាទីសំខាន់ផ្សេងទៀត ដូចជាមុខងារទីប្រឹក្សាពិសេសរបស់ព្រះមហាក្សត្រ ជាពិសេស ជាប្រធានក្រុមប្រឹក្សាភិបាលទទួលបន្ទុកកិច្ចការសេដ្ឋកិច្ចនិងការអភិវឌ្ឈន៍ដែលជាស្ថាប័នមួយសម្រាប់ការត្រួតពិនិត្យលើក្រុមហ៊ុនយក្ខទីមួយរបស់អារ៉ាប៊ីសាអ៊ូឌីតខាងផលិតប្រេងនៅលើលោកឈ្មោះ Aramco។
ក្នុងនាមជារដ្ឋមន្ត្រីការពារជាតិ ព្រះអង្គម្ចាស់ ben Salmane បានធ្វើការត្រួតពិនិត្យលើប្រតិបត្តិការយោធានានាដែលអារ៉ាប៊ីសាអ៊ូឌីតបានចាប់ផ្តើមធ្វើឡើងនៅយេមែននិងដឹកមុខកងសម្ព័ន្ធអារ៉ាប់កាលពីឆ្នាំ២០១៥ ដើម្បីវាយប្រយុទ្ធពួកឧទ្ទាមChiites ដែលអារ៉ាប់ប៊ីសាអ៊ូឌីតចោទថាមានទំនាក់ទំនងជាមួយអ៊ីរ៉ង់។
នៅឆ្នាំ ២០១៥ដែរ ព្រះអង្គម្ចាស់ Salmane បានរៀបចំសន្និសីទសាព័ត៌មានលើកទីមួយដើម្បីជូនដំណឹងពីការបង្កើតសម្ព័ន្ធអ៊ីស្លាមមួយដែលចូលរួមដោយបណ្តាប្រទេសចំនួន៣៩ដើម្បីប្រយុទ្ធប្រឆាំងទល់នឹងអំពើភេរវនិយមជីហាតនៅខណៈពេលដែលលោកខាងលិច បានចោទថាអារ៉ាប៊ីសាអ៊ូឌីត មានភាពធូររលុងនៅក្នុងបញ្ហាពួកអ៊ីស្លាមជ្រុលនិយមជីហាតនេះ។
មានសញ្ញាប័ត្រខាងផ្នែកច្បាប់នៅសាកវិទ្យាល័យ King Saud ក្នុងរាជធានីរីយ៉ាត រាជទាយាទថ្មីរបស់អារ៉ាប៊ីសាអ៊ូឌីត មានបុត្រ ចំនួន៤នាក់គឺស្រី២និងប្រុស២ តែព្រះអង្គម្ចាស់រូបនេះ ពុំមែនជាបុគ្គលដែលចូលចិត្តមានភរិយាច្រើនទេ ទោះបីជាប្រទេសរបស់ព្រះអង្គ បើកសិទ្ធឲ្យបុរសអាចមានភរិយាជាច្រើននាក់ក៏ដោយក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ